Ke Kumu Hawaii, Volume I, Number 26, 23 December 1835 — Page 203

1835 KUMU HAWAII 203

makuakane i ka mai. A hala kekahi mau la, mahuahua ae la kona mai. Kiina'ku ke kahuna lapaau, a hele mai la ia i ike ia ia. A ia Sabati iho aole io o ka nui o kona mai. Komo aku la au iloko o kona keena, a kikoo mai la oia i kona lima, a i mai la, "E kuu keiki, he mai nui loa ko'u, e kii aku oe i wahi laau no'u."
                Kii aku la au — aole loaa, ua hala ke kahuna ma kahi e - aole au i imi ia ia. Hoi aku la no au. A i ka hoi ana hopohopo iho la ko'u naau, "Pehea la wau e hooluolu aku ai i kuu makuakane?" A hiki au i kona wahi, nana aku la au, auwe! ikaika loa kona eha, a kahe mai la ka hou ma kona lae. Kaumaha iho la wau no ka imi ole ana i ke kahuna.
                A liuliu iki, i mai la kela ia'u, "Ua loaa paha ka laau, e kuu keiki."
                Kulou iho la kuu poo, no ka hilahila, a hoole aku la au, "Aole; i mai la ke kahuna, aole laau, ua pau."
                Kahaha mai la kela, "Ka inoa he nui loa kona laau; ua pau ka! auwe; e make paha auanei au no kou lawe ole mai i ua laau la.''
                Hele aku la wau iwaho, ma kahi mehameha, a uwe iho la no au no kuu hoopunipuni ana. A ia'u i uwe ai, hea mai la kekahi penei: "E wikiwiki oe i ka hele mai maanei; e make ana kou makuakane."
                Hoi hou aku la au iloko o ka hale; aia hoi, kokoke pau kona hanu. I aku la oia i o'u mau kaikuaana, e noho uwe ana, "Ea, e malama pono oukou i ko oukou makuwahine.'' A owau ka muli loa; kau mai la kona lima maluna o kuu poo, a i mai la ia, "A hala kekahi mau hora alaila make au, a kanuia auanei ma ka lepo. A ooe, aole ou makuakane, ma keia hope aku. E malama oe i ke Akua i lilo oia i makua nou; e hana mau ma ka pono, aole loa e hoopunipuni iki; no ka mea ke nana mau mai nei ka maka o ke Akua ia oe, i kela la, i keia la; ma kela wahi ma keia wahi."
                Aneane au e make i ke kaumaha. Kau hou iho la kona lima maluna o kuu poo, a pule aku la ia i ke Akua e malama mai ia'u i ke keiki huahaule.
                Aole hiki ia'u ke nana pono aku ia ia, no ka hilahila i kuu hewa.
                Holo aku la au mawaho me ka haaloulou nui ana, a o ko'u makemake, e pau koke au i ka make.
                Hai mai la kekahi, "Ua pau ka leo o kou makuakane." A makemake nui au e hele io na la e hoike aku i kuu wahahee ana ia ia, a e noi aku ia ia e kau hou mai i kona lima ma kuu poo a e kala mai i kuu wahi hewa. Komo hou aku la au loko o ka hale, a lohe au i ke kahuna e pule ana no ko'u makua e waiho make ana, a eha loa kuu naau. Lalau aku la au i kuu papale a holo aku la i ka hale o ke kahuna lapaau, a loaa kela wahi laau a'u i wahahee ai mamua, a wikiwiki au i ka hoi, a hiki i kahi o ko'u makua, komo aku la au iloko o kona keena me ka manao ana e hoike i kuu hewa ia ia, hea aku au, "Auhea oe e kuu makuakane?"
                Papa mai la kekahi, "E; e noho malie oe.'' Nana aku la au, a ua pau kona ea — ua waiho aoao oia - a e uwe ana la na hoahanau. A o ka'u olelo wahahee ka, ia.
                Hoomanao iho laau i kona aloha mai ia'u, a i kuu hewa aku ia ia, a mai make au i ka uwe ana. A ia la iho, hele mai ke kumu e pule, olelo mai la oia i na olelo oluolu, owau wale no ka i ike i kuu kaumaha iho. A pau ka pule, kanuia aku la ko'u makuakane ma ka lepo.
                Hele aku la au i ke kula nui; a hala na makahiki he umikumamalua, hoi mai la au; a imi au i ka lua kupapau o ko'u makua; mai nalowale ia i ka nahelehele, ua loaa no nae ia'u; ku malie au a nana iho la; hiki hou mai kuu hewa iloko o'u, aole la i nalo; a walania kuu naau. Ina hiki ia'u ke lohe i kona leo e i mai ana, ua kalaia kuu hewa; aole ka! ua pau kona leo; aole au e lohe hou ia ma keia ao.
                Auwe; pehea la wau e pono ai? Eia; e pule aku au i ke Akua e kala mai i kuu hewa ma o Iesu Kristo la. A oia iho la ka mea i oluolu ai kuu naau. L. L.

HE HIMENI KAMALII.

1 O ka la olinolino,

Aia ka! ke puka mai;

A ole hiki mai ka ino,

Ia kakou i moe ai.

Ala kakou;

Ia Iesu e hoomaikai.

 

2 Nana kakou i hoala,

Mai ka hiamoe ana,

Oia hoi ko kalahala;

Ia ia kakou e ola'i.

E mahalo

I ke alakai maikai.

 

3 Hele kakou i ka pule,

I loaa ka makaukau,

E ao no hoi ma ke kula,

Kahi o ka naauao,

I ikaika

Ma na mea kula a pau.

 

4 Pau ke kula, hoi aku

Na haumana nei a pau.

Hana kakou no ka Haku,

Nona mai ke ola mau.

Hana maikai,

A loaa i kela ao. L. L.

 

O KA LALA LAAU E LAPALAPAIA ANA.

                E na kamalii, e nana oukou i keia kii palapala.
                Ua ike oukou i ke kanaka, a me na hipa.
                Ehia hipa?
                Owai ko lakou kahu?
                O Mose kona inoa.
                Ua kapaia he kahu hipa.