Ke Kumu Hawaii, Volume I, Number 26, 23 Kekemapa 1835 — Page 202

202 KUMU HAWAII. (DETEMABA,

manawa i ka noho wale—i ka moe ana kekahi, a i ka paani kekahi. Aka, pono lakou ke mihi koke i ko lakou hewa. O oe kekahi. E hele i ke Akua me ka uwe nui iho la a me ka hoopailua ia oe iho, a e moe ilalo ma ko Iesu kea a pau kou hewa i ke kalaia. A mahope, mai noho a poina hou i ka waiwai io o ka manawa. E malama pono i kela mea waiwai, o lilo auanei oe i kanaka ilihune, ma keia ao, a make mau loa kou uhaue i kela ao mahope. E wikiwiki oe i keia hana, no ka mea, ua pokole wale no ka wa i koe o kou noho ana ma keia ao. A ma ka lua, kahi a kakou e hele ai. "Aohe manao, aohe noonoo, aole akamai, aole hana."
                N. Pehea la e hiki ia'u ke malama i ka manawa? E hoakaka lea mai ia'u, no ka mea e kupu iho ana iloko o'u ka makau o make auanei au i ka huhu o ke Akua i ko'u hoomaunauna ana i kona waiwai.
                M. Mamuli paha au e hoakaka ia oe i keia mea. Aole hiki ia'u ke hai aku i keia wa no ka mea, ua hiki mai ka hora, a e huli ana i ka hana. Aloha oe.
                N. Aole no paha.

OREGONA.

                Ua hiki kekahi mau kumu i ka aina Oregona ma ka muliwai nui o Noweti, o Kolumebia ka inoa.
                Eha kumu malaila, hookahi makahiki o ka noho ana. Mi. Li ka inoa o kekahi mau kumu elua. Ua hoomaka lakou i ka hana, i ke kula, a i ka hai aku i ka olelo a ke Akua, a i ka mahiai kekahi. Na ke Akua lakou i malama mai i ko lakou imi ana i na hipa nalowale, i kela waonahele pouli loa kahi i hiki ole ai ka malamalama mamua.
                A mai kekahi kumu, o Mi. Li. Holo mai ia i Oahu nei e hoomaha i keia manawa, i ka la 13 Nov, i pae mai ai a ua hookipaia e na kumu maanei a huipu na lima aku me ka olioli, i ka halawai ana me ke kumu i hele akau, a maluna o na Mauna Pohaku a hiki i kekahi aoao o Amerika 2500 mile.
                Eia kekaki. Ua hiki hou mai kekahi kumu hou ma kela aina Oregona a ma kela muliwai nui, i keia manawa, o Pareka ka inoa, maluna mai o na Mauna Pohaku, a loaa ka moku, ma kela muliwai, palapala mai oia ia Binamu ma Oahu nei i kona aloha i na hoalawehana a pau i keia pae aina. Na na luna Misionari o makou, [A. B. C. F. M.] oia i hoouna mai e makaikai i ka waonahele nui e imi i kahi e hoolaha ai i ka olelo a ke Akua. Eia mai kau wahi o ka palapala a Mi. Pareka. Ma ka muliwai Kolumebia, Okatoba 20, 1835.
                Ua ike au i na ohana Inikini he nui no.—Eia na wahi pono e hanai na Misionari, mawaena o na Ogelala, ma ka hikina o na Mauna Pohaku, a o na Utau kokoke ma Sanetefe, a o na Nez Perses. [Salisa] ma ke komohana o na Mauna Pohaku, o na Kaiusa ma ka hui ana o na muliwai Kalaka a me Lui, a me na Walawala ma ka lele ana o ka wai o Kolumebia. Malalo mai nui ka make o na kamaaina i ke kuni.
                He hoahele ko'u o Kauka Witemana [Dr. Marcus Whitman,] aka hoi aku la, e kii i mau hoalawehana e hana pu mawaena o ka poe Ne Perese, no ka mea ua kahea lakou e like me ko Makedonia leo e hea ana [E hele mai e kokua ia makou.]
                O keia aina , he maikai no ka lepo, a mai Aperila a Novemaba uuku ka ua, aia kekahi mea i pono ole ai. He nui no na mauna. Mai ke kuahiwi nui a hiki i ka Pakifika he aina o na pele kahiko. O ko'u manao, o ka papu nui Misisipi aia ka mala nani o Amerika, a o ke ao nei paha.
                E noho au ma Vanekora i keia hooilo, e lokomaikai mai oe a e palapala mai ia'u.
                Owau no kau ma ka euanelio,
SAMUELA PAREKA.

WAILUKU, Maui, Detemaba 7, 1835.
                Aloha oe, e Tineka, e ko'u kaikaina. —Ua loaa mai ia'u ke Kumu Hawaii, pepa 23, aia no ka'u palapala aku ia oe, a me kau palapala mai ia'u. A i ko'u heluhelu ana i kau, manao iho la au, ua hewa au i ko'u hoowahawaha ana i ua mea a ma ka pepa 19. Auhea oe? Aole au manao e hoole i kou pai ana i ko Iehova kanawai ma ke Kumu. Ua maopopo i ko'u manao, aole mea like me ka olelo a ke Akua, a me kona kanawai.
                Eia kekahi. No na mea e piha ai ke Kumu Hawaii palapala mai, oe, "Ua paipaiia ka mea nana e hooponopono ai ka pepa, e hooemi i na huaolelo, a me na manao loihi iloko o ke Kumu Hawaii a e hoonui i na kii. He maikai ka manao liilii."
                Eia ko'u manao. Ua maikai ka manao nui, a me ka manao liilii kekahi. Makemake kekahi poe i ka manao nui e like me "ke Kaikamahine a ka mea hanai pipi.'' a me "ke Kaao no Lousa.'' a me "Wiliama Kurekamana.'' I ko'u manao, " O ka waiu ka mea e pono ai" ka nui o kanaka ma keia pae aina; aka o "ka ai paa'' oia ka mea e pono ai "ka poe oo." Aka, ea, pono no oe e nana mamuli o kou manao iho, aole loa e hiki ia oe ke hana mamuli o ka manao o kou poe hoahanau a pau loa. E noonoo oe, a e hoopiha i ke Kumu Hawaii i na mea e oluolu ai kou naau. E hoomaikai mai ke Akua ia oe a me kau hana ana e pono ai.
                Kou kaikuaana me ke aloha.
J.S. GERINA.

NO NA KAMALII.

KEKAHI KEIKI WAHAHEE.

                Hai mai la kekahi kahuna pule i keia wahi kaao, i mea i akaka'i ka mihi io. He makuakane lokomaikai ko'u; a i ko'u wa uuku, alakai aku la oia ia'u i ke kula maluna o ka lio, a olioli au. Aia loaa ia'u na makahiki eono, loohia ko'u