Ke Kumu Hawaii, Volume I, Number 23, 11 November 1835 — Page 184
184. KUMU HAWAII. (NOVEMABA,
na hoahanau a me na kanaka, aole pono anei oukou a pau ke huki i ka baka e ulu ana, a e hoolei iloko o ke ahi, i haumia ole ka aina? aole pono anei oukou ke kanu i ka pulupulu ma ka aina kahi e ulu ana ka baka i keia manawa? E noonoo oukou a akaka, alaila, e hana koke i na mea a pau e pono ai ka aina a me ke aupuni--i na mea a pau e oluolu ai ke Akua.
4. I ko'u hele ana a puni ka moku me Mi Kalaka ko'u kaikaina i alohaia, aole au manao nui i ka hoike ana o na kula. Makemake maua e hoonoho i kekahi mau kumu hou--i lilo lakou i malamalama ma kahi pouli. Makemake no hoi maua e hai aku i ka Iesu olelo--e kuhikuhi i ke kea o Iesu, a e hooikaika i kanaka e hele koke io na la, i pakele ai lakou i ka make, a e loaa mai ia lakou ke ola mau loa ma ka lani. Pela no maua i hana'i. I ko maua hele ana, lulu maua ma kela aina, keia aina, i ka hua o ka ke Akua olelo me ka makemake i haule ua hua la, ma kahi maikai wale no, i kupu iho, a i ulu maikai, a e hua koke mai i ka hua o ka pono, i hoonaniia'i ko maua Akua i ka lani. I lilo ko maua hele ana, a me ka maua hana ana, i mea e pono nui ai ka aina, a me kanaka a pau, e pulekakou ke Akua. J. S. GELINA
KAHI MELE.
HALELU 92, NO KA LA SABATI.
He hana e hauoli ai
Ke mele me ka hoomaikai,
E hai i kou aloha mau,
E ke'Lii pono o ke ao.
He nani kou la kapu nei,
E waiho ai na hana e,
E hapai i kou inoa mau,
Kuu ino pu ma kuu naau.
E olioli nui au
I kau mau hana nani no,
Hohonu maoli kou manao,
Kupaianaha kou aoao.
E pau no kou mau enemi,
Puehu hoi ka poe ku e,
Ua ulu me na lau, a mae,
Pau e ko lakou pomaikai.
A hemolele kuu naau,
A lelepau i kela ao,
Alaila e hauoli ai,
Malaila mau kuu pomaikai.
H. B.
NO NA MOKU.
KA HOLO MAI.
Oka. 27, May Flower, Chase, Nu Bedefoda, 12 mal., 400 bar.
Stonington, Lawton, Nu Ladana, 22 1/2 mal., 950 bar.
28. Onatario, Barnard, Nanetuketa, 34 1/2 1,500.
Nov. 2 Winalow, Barnard, Nu Bedefoda, 22, 600.
Susan, Swain, Nu Bedefoda, 23, 800.
Folkstone, Bliss, Ladana, 24, 1,800.
Lady Amherst, Hammond, Ladana, 26, 2,500
Superior, Saunders, Nu Ladana, 24 1/2, 1,850
3. Franklin, Griffin, Saga Haba, 26, 1,700.
Phoebe, Russell, Nu Bedefoda, 17, 500.
5. Beaver, Gardner, Hudesona, 28 1/2, 1,950.
Corinthian, Grinnell, Berisetola, 34, 1,250.
Rose, Davis, Nanetuketa, 26, 1,800.
7. Mentor, Rice, Nu Ladana, 25, 1,900.
Dryade, Keplia, Ladana, mai Kolumebia mai. O ka hulu ilio ka ukana.
KA HOLO AKU.
Oka 26, May Flower, Chase.
30. Velocity, Peck, Valparaiso.
Nov. 2. Cheviot, Bateman.
4. Luminary, Gardner.
5. Tuscan, Stavers.
NO KEKAHI ALII MA KINA.
Hele aku la o Tahou, ke alii nui o Kina, me ka manao e nana i kona aupuni, a o kana keiki makahiapo kekahi i hele pu. A hiki aku la laua ma kekahi mahina ai, ma kahi i hana luhi ai na kanaka, ku malie laua, a olelo mai la ke alii i kana keiki; "E kuu keiki, ua makemake au ia oe, e hele mai maanei, e ike maka i keia poe makaainana; i ka eha, a ma ka luhi o ka lakou hana, e aloha aku oe ia lakou, a e hooluhi ole ia lakou me ka auhau." A. C.
O KA ULA.
Ina e mahuahua ka io o ka honu, e mahuahua pu no hoi ka iwi mawaho, a pela no ka ea, a me ka pipi, a me ka pu, a me ka leho, a kela mea keia mea maloko o ke kai. Aka o ke ula ua okoa no ia. E ulu no kona io a piha loa ka iwi, alaila moku ae la ka iwi a kaawaleia. Aole loa e mahuahua iki ia, aka e moku no ia, a heleleila, a haalele ke ula, o kana io wale no e koe. Pela no e haule ai kona iwi i keia makahiki i kela makahiki; hookahi makahiki, hookahi haalele ana i ka iwi. A i ka wa o kona nele ana, huna ae la no ia i na ana a me na hakahaka o na pohaku. Aole nae liuliu; elua la wale no, a ulu ka iwi hou, he iwi mahuahua no ia, puka aku la ka ula, a holo hou ma na wahi e. A. C.
O NA IOLE MA IAMAIKA.
Ma Iamaika, kekahi moku o na moku Iniana Komohana, lehulehu loa na iole a kolohe loa no hoi. Pepehi no nae na kanaka, a me na ilio a me na popoki, i na iole, aka aole e hiki ia lakou ke hoouuku. I ka aina o kekahi kamaaina, ua pepehiia kanakolu tausani iole i ka makahiki hookahi. E ai no lakou i na uala, a me na ipu, a me ke kulina, a me na ohia, a me kela mea keia mea, aka o ke ko ka mea ono loa, a he nui no ke ko i pau ia lakou. Ina i kuaiia, na mea a pau i aiia e lakou, ina ua loaa i na kala ewalu haneri tausani a keu, i ka makahiki hookahi. A. C.
O KA HANA MA MESIKO.
Ma ke kulanakauhale o Mesiko, na ka poe malama kulanakauhale e kii aku me na kaa a hoakoakoa pu i ka poe ona ma kahi hookahi. Aia moe no ka poe ona ma ka po i kela wahi keia wahi e like me na kupapau. A kakahiaka ae, alaila, komo aku la ka wawae o ua poe ona la i ke komo hao paa loa, a o ka hoomaemae i na alanui o ke kulanakauhale ka hana. Ekolu la hana no ka ona hookahi ana.
MAKE.
Make ma Wailuku, Sepatemaba 24, o Waikoloa. He kanaka haipule io paha. I kona wa mai, nui kona mano i ka Haku a mahuahua kona haahaa ka naau. He kanaono paha kona mau makahiki. J. S. G.
Wailuku, Okatoba 10, 1835.
Ua paiia KE KUMU HAWAII ma ka, mea Paipalapala a na Misionari, Honolulu, elua hebedoma hookahi pepa, o Wenede ka la e pai iho ai.
Eia ke kuai ana, HOOKAHI MAKAHIKI $1, a na mea e lawe i ka pepa a pau.