Ke Kumu Hawaii, Volume I, Number 20, 30 Kepakemapa 1835 — Page 159

1835.) KUMU HAWAII 159

palaia, No'u no ka hoopai ana, na'u no e uku aku, wahi a ka Haku.
                20 No ia hoi, ina pololi kou enemi, e hanai ia ia; ina e makewai ia, e hoohainu ia ia. No ka mea i kau hana ana pela e hoahu oe i na lanahu maluna iho o kona poo.
                21 Mai lanakila ka hewa maluna ou, aka e hoolanakila i ka pono maluna o ka hewa.
                Mokuna xiii. E hoolohe na kanaka a pau i ka ke alii maluna iho; no ka mea, aole alii, ke ae ole mai ke Akua, a o ka poe e alii ana, na ke Akua no lakou i hooalii mai.
                2 No ia mea, o ka mea e hoole i ka ke alii, oia ke hoole i ka ke Akua kauoha; a o ka poe hoole, o lakou ke hoohewaia.
                3 No ka mea, aohe mea makau na alii no na hana maikai, aka no na hana ino. Aole anei oe e makau i ke alii? E hana oe i ka mea pono a e hooponoia mai no oe e ia.
                4 No ka mea, he kauwa ia na ke Akua e pono ai oe. Aka ina e hana oe i ka hewa, e makau oe, no ka mea, aole he mea ole kona lawe ana i ka pahi kaua, no ka mea o ke kauwa ia na ke Akua, he ilamuku e hoopai ana i ka mea hana hewa.
                5 No ia mea, he mea pono no kakou e hoolohe aku aole no ka inaina wale no, aka no ka manao aku i ka pono kekahi.
                6 Nolaila hoi, he pono no oukou e hookupu aku kekahi, no ka mea, he poe lawehana na ke Akua ka poe e malama ana ia mea.
                7 Nolaila e haawi aku i na kanaka a pau i ka lakou, i ka waiwai auhau i ka mea he pono nona ke auhau mai, a i ka waiwai ohi i ka mea he pono nona ke ohi mai, a i ka makau i ka mea he pono ke makauia'ku, a i ka hoomaikai i ka mea pono ke hoomaikaiia'ku.

KA HOOMOAKAKA ANA.

                Mok. xii: 15. E olelo aloha aku, i ka poe e hookaumaha mai ia oukou me ka awahia. O ka hoomaikai aku ka pono, aole ka hoino. Mai hoohalike me ka poe kuamuamu. Mataio v: 44. Luka vi: 28.
                15 E hauoli pu oukou me na hoahanau i ko lakou olioli i ka pomaikai; a ina e uwe kekahi poe i ka popilikia a i ka mea e kaumaha ai ko lakou naau, he pono ke uwe pu oukou me lakou.
                16 E hoolike pu i ko oukou manao i hiki pono ka pule a me ka hana, aole e kuee. Mai manao nui aku i na mea e hookano ai a e haaheo ai, aka ma na mea kiekie ole e hahai ai. E hoohaahaa pono i ko oukou manao. Mai hoakamai; mai kapa iho ko oukou manao ia oukou iho he akamai, a ua nui ka ike.
                17 Mai hoopai aku kekahi kanaka i ka hana ino ana o kekahi; aole e hana ino aku ke hana ino ia mai, e hoomanawanui; na ke alii paha e hooponopono ke hoopii ia ia, a i ole ia, na ke Akua no.
                18 E hoao me ka ikaika e kuikahi like me ka noho malie, a ina he mea hiki ia, a ina e hiki i ko oukou akamai, a me ke akahai, a me ke aloha, a me ka ikaika, e noho kuikahi oukuu me na kanaka a pau. Alaila, ina aole ae mai ka poe kue, no lakou ka hewa.
                19 Aole pono keia hoahanau kela hoahanau iloko o ka Haku ke hoopai aku nona iho, he pono ke haawi aku na ka Haku e hooponopono mai, nana no e hoopai i ka mea hana hewa. Nona ka inaina hewa ole, nona ka manao e hoopai pololei. Pela i palapalaia ma ke Kanawailua, xxxii:35. "No'u ka hoopai ana, na'u no e uku aku.'' Na ka Lunakanawai nui keia hana, aole na keia kanaka kela kanaka.
                20 No ka mea no ke Akua ka hoopai ana, nolaila e aloha aku i ka mea ku e, ina pololi ia, he pono ke haawi i ai nana, a i wai hoi ke makewai ia, a ike ia i kou pono a me kou lokomaikai ia ia, e walania paha ia i ka hilahila i kona hewa iho, e like me ka eha o ke poo ke kau na lanahu ahi maluna iho, a lilo kona oolea i palupalu.
                Moku. xiii 1. He pono no keia kanaka kela kanaka o ke aupuni ke hoolohe i ka leo o ke'lii ma na mea a pau i papa ole ia mai e ke Akua. Ina e hooluhi hewa a hookaumaha wale kela i kanaka, o ko lakou pono ke hoolohe aku ma na hana a pau i papa ole ia mai ma ke kanawai o Iehova. He pono nae ke hoikeike i ka pono imua i kona alo.
                Aole he alii maopopo ke ae ole mai ke Akua nona na mea a pau.
                Ua ae mai ke Akua i ke alii ana o Kaisara maluna o na Iudaio, a o ko lakou pono ke hoolohe aku ia ia, ma na mea pono ke hana.
                No ke Akua mai ke alii ana o na'lii a pau. Maloko o kona lima lakou.
                2 O ka mea i malama ole i ka ke'lii, oia ke malama ole i ka ke Akua kauoha, no ka mea ua kauoha ke Akua e hoolohe i ke alii ma na mea i papa ole ia mai eia. A o ka mea i hookuli a malama ole, e lilo ia i ka hoahewaia.
                3 O na'lii, aole lakou he mea e haalulu ai ke hana kakou ma ka pono. He mea lakou e makau ai ke hana hewa. Ina manao oe e lilo ole i ka pilikia i ke alii, a me ka makau haalulu, e hana oe ma ka mea pono, alaila e hoaponoia oe e ia, e mahaloia oe no kou noho malie, a me kou hewa ole. Ma keia pauku ua akaka ke ano o na'lii a Paulo i manao ai he pono ke hoolohe aku na haumana a Kristo, o na'lii i kokua i ka pono a i kinai i ka hewa.
                4 O ke alii hoomalu i ka aina, he kauwa ia na ke Akua e pomaikai ai ka poe hana pono, ka poe makemake ole i ka haunaele, nolaila aole pilihua oe ke hana pono oe, aka ina hana hewa oe, alaila e weliweli oe, o hoopaiia. Aole haawi mai ke Akua ia ia i ka pahikaua hoopai, i mea ole, o ko ke Akua ilamuku ia e hoopai ana i ka poe hana hewa.
                5 No keia mea he pono ke hoolohe aku, aole no ka hoopai ana wale no, aka no ka ike ana i ka pono kekahi, a no ka manao o ka naau e hana i ko ke Akua makemake.
                6 No ia mea, he pono ke hookupu na kanaka, e haawi i kau wahi o ko lakou waiwai i ke lii, no kona hoomalu ana ia lakou, i mea ola na ke lii, a me na lunakanawai, a me na ilamuku, he poe kauwa lakou na ke Akua.
                7 E ho aku no keia mea no kela mea i kana ae i kana ae. E haawi i na lii a pau a me na kanaka a pau i ka mea he pono no lakou ke kii mai. O ke kala no ke kino a me ka waiwai o ka aina, a me ka waiwai i hoomaluia e ke lii, a o ka waiwai ohi no ka waiwai kuai, e haawi aku i ka mea he pono nona ke auhau, a ke ohi hoi. E weliweli aku i na lii, e hoomaikai aku a e mahalo aku i na mea maikai.

HE MAU NINAU.

14 E pono ke olelo aloha ia wai?
15 E pono ke hauoli me wai? Ke uwe me wai?
16 E lilo ka manao o kakou pehea?
Pehea aku i na mea kiekie e hanohano ai?
E hahai mamuli o ke aha ?
17 Pehea aku ke hana ino mai kekahi ?
E imi i ke aha? I kaponoia imua owai ?
18 Pehea la e imi ai i ke kuikahi?
Pehea la e kaawale ai kakou ke ae ole mai ka poe ku e?
19 Owai ka poe i papaia, Mai hoopai?
Hookaawale no ke aha? Heaha ia inaina?
Heaha ka mea maopopo ma ka palapala hemolele no ka hoopai ana?
20 E hana i ka mea ku e, pehea?
Lilo ia lokomaikai i mea aha?
21 E ao oe o lanakila ke aha?
E hoolanakila i ke aha?
Pehea la e lanakila ai ka hewa maluna o ka hewa?
xiii 1 E hoolohe na kanaka o ke aupuni i ke aha?
Nohea ke alii ana o na'lii?
Owai ke'lii maluna o na'lii a pau?
2 Ina pela kekahi i ka ke alii, ua pale ia i ke aha? E ahaia ka mea hoolohe ole?