Ke Kumu Hawaii, Volume I, Number 20, 30 September 1835 — Page 157
1835.) KUMU HAWAII. 157
nele ai lakou i ka olelomaikai ole, a no ko lakou ike ole hoi ia Iesu a me kona ola.
2 Aohe mea e ae i noonoo nui ka poe ike ia Iesu i na lahuikanaka i ike ole?
He mea e no, o ke aloha aku i ke Akua no ka olelomaikai ana i haawi mai ai no lakou.
3 Aole anei wahi i koe na kanaka i loaa iho nei ka olelomaikai?
No lakou no kekahi hana. He mea pono ia lakou ke noonoo nui malaila. Ina i haawi wale mai ke Akua i kela mea maikai no lakou, he pono ia lakou ke haawi wale aku i ka poe i nele. Na lakou ma keia hope aku e hele aku a ao aku hoi i kanaka i ike lakou ia Iesu a me kona ola.
4 Heaha ka lakou e hana'i ia manawa?
Na lakou e hooikaika ma ka pule i kela la i keia la i loaa koke ka poe naaupo i ka olelomaikai. He pono hoi ia lakou ke hooikaika ma kela mea ma keia mea e makaukau auanei ia kahi poe misionari e hoounaia aku.
5 Aohe pono e oi aku ka hana a ka poe i loaa iho nei ka ike ia Iesu mamua i ka ka poe naaupo i keia manawa?
Pono e oi nui aku; no ka mea, ua ike lakou i ka ino o ka naaupo. Ua ike lakou aneane ka poe ike ole ia Iehova e make. Nui ko lakou hoohewa ana ke hooikaika ole lakou ma ia mea.
6 Pehea la e hoomakaukau ia ia lakou iho i keia hana?
Ma ka hoomana ana he mea nui ka uhane, a nani wale kona make ana; ma ka pule nui hoi, a ma ka hooikaika ana i ke ao i naauao lakou, a ma ka hoole i ka lakou iho a me ka haawi wale ana i maa lakou malaila.
7 He mea nui anei ka hoole iho i pono ai ia mea?
Aole; piliwale no ka hoole iho i ka mea o ke kino a me ko keia ao; a ua aneane ka poe ike ole ia Iehova e make mau loa.
8 Pehea ka manao mai a ke Akua i ka poe hoole i ka lakou iho i pono ai, ka poe e?
Ina e ku pono ko lakou naau me ka hana ana, ina ua oluolu mai oia.
9 Heaha ka uku i waihoia'i ma ka lani na ka poe i hoomanawalea io aku?
He nui wale ka uku. Na lakou i ike maka ia Iesu, a e noho pu hoi me ka poe pono a pau, a e hiilani mau loa aku i kona inoa.
WAILUKU, MAUI, Augate 19, 1835.
E Tineka. - Ke hoouna aku nei au ia oe i kekahi olelo kamakamailio, i mea e pono ai paha ka poe heluhelu me ka noonoo.
Kou kaikuana, J. S. GERINA.
HE KAMAKAMAILIO.—HELU I.
Naili. Ke manao nui au, aole pono kou manao, i keia mau la. Ua kulou kou mau maka. Pehea? ua eha paha oloko.
Maanu. Ae. ua eha no paha.
N. Pehea? E hai mai oe ia'u i kau mea. E hiki ia'u ke hoomaha aku, aole paha.
M. Aole e hiki ia oe. O ke Akua wale no ka i hoomaha mai ia'u. Aka, aole manao au e huna i ko'u eha ia oe.
N. Aloha oe, i kou lokomaikai mai ia'u. E hai mai oe.
M. Ua noonoo pinepine au i keia mau la, i ka hopena o ko keia pae aina, ke hoomau kakou, na'lii a me kanaka, a ko kakou ku e ana i ka mea wale no e pono ai.
N. O kaua pu malaila. Ua moakaka lea ia - nui na mea e poino ai ka aina, i keia mau la. Nui ka poe ilihune, a me ka poe mai, a kii pinepine mai o ka Make i kana mau mea e makemake ai, e like me ka holoholona hihiu.
M. Oiaio; ke manao nui au, aole liuliu ka wa i koe, a pau kakou i ka make.
N. Aloha ino! Aka, ea, eia ka'u mea e ninau ia oe. Pehea ka make pinepine ana o kanaka, i keia mau la? aole pela i ka wa kahiko. No ka poe haole mai paha?
M. Ae no paha. Nui na mea ino i komo pu me ua poe la, o ka make paha no ia. Aka, eia ko'u mea kaumaha loa. Ko kakou hoole ana i ka mea wale no e ola'i ko keia pae aina.
N. Heaha ia? aole akaka ia'u.
M. No ka noonoo ole paha i na mea au heluhelu ma ka ke Akua olelo. I mai o Paulo penei, "O ka manao i ke Akua he mea ia e pono ai i na mea a pau, ua olelo mua ia mai no hoi, nona keia ola ana e noho nei, a me kela ola ana." 1. Timoteo 4. 8.
N. Ua poina ia'u ua olelo la. He olelo maikai ia, oluolu. Pono kakou ke noi aku i ke Akua, i hooko mai i ai kana olelo, i ola kanaka a pau loa ma Hawaii nei ia ia.
M. He oiaio, e hooko mai no o Iehova i kanaka olelo, e hoomaikai mai no, a e hoola mai no hoi i ka poe a pau i manao pono aku ia ia. Aka, mai manao oe e ola na kanaka a pua ma keia aina malaila.
N. E ola no paha; no ka mea, aole kanaka i manao ole akui ke Akua. Pehea?
M. Kakaikahi wale no ka poe i manao pono akui ke Akua. Aka, ua hala ko'u manawa e kamailio pu me oe. Mamuli paha e halawai pu kaua. Aloha oe.
N. Aloha no paha.
HELU 2.
Nalii. Aloha ka oe. Ke hauoli nei ko'u naau i keia halawai hou ana o kaua. E hoomoakaka mai oe ia'u i ka poe manao i ke Akua, no ka mea, olelo mai oe mamua kakaikahi wale no ka poe i manao malaila.
Maanu. Eia ka mea a'u e hoakaka. Kakaikahi ka poe i manao pono i ke Akua. Nui ka poe i manao wale i ke Akua. Pela ke Diabolo a me kanaka poe anela, a me kekahi poe hewa. Aole paha lakou makemake e manao aku ia ia, aka aole hiki ia lakou ke uumi i ka manao ia ia i kona kupu ana iloko o lakou. Aka, okoa ka manao ana i ke Akua e pono ai kanaka.
N. Pehea ia? E hoakaka mai ia'u o make hewa paha kuu manao ana ia ia.
M. Eia ka ano o ka poe manao pono aku i ke Akua. Hoomaopopo aku lakou i kona ano, a me kona maikai. Manao lakou i kona nui, a me kona mana, a me kona hemolele, a me kona maemae o ka naau. Manao lakou i ka oiaio a me ka maikai o kana olelo. Manao lakou i kona huhu mai i ka poe hewa, a me kona manao paa e luku mai ia lakou. Mano lakou i ke Akua me ka makau, a me ka makemake nui, a me ka malama i kana mau kauoha. Pela o ka manao ana i ke Akua e pono ai, oia ka mea e lilo ai ke kanaka i mea hou ma na mea a pau. Pehea kou manao, ua nui anei ka poe i manao i ke Akua?
N. Aole no paha. He mea e keia. Aka ea, e hai mai oe ia'u i ka hua o ka manao i ke Akua. Pehea e pono ai kanaka ua manao la?
M. I mai o Paulo, "he mea ia e pono ai i na mea a pau, ua olelo mua ia mai no hoi, nona keia ola ana e noho nei, a me kela ola ana." Eia ke ano. O ka manao pono i ke Akua, oia ka mea e waiwai ai kanaka ma keia ao, a oia ka mea nohoi e ola'i ko lakou poe uhane ma kela ao mahope.
N. Oia, nolaila paha ka makemake o kanaka ma keia pae aina i ka ekalesia. Imi nui kekahi poe e komo iloko olaila, i noho lakou e like me na'lii, me ka