Ke Kumu Hawaii, Volume I, Number 19, 16 Kepakemapa 1835 — Page 151

1835.) KUMU HAWAII. 151

haahaa, e hooemi iho, e manao ewaewa ole mamuli no o ka haawina a ke Akua i hoopomaikai ai ia ia ma ka manaoio.
                4, 5 He nui na lala o ke kanaka hookahi, he kino hookahi kona, pela hoi kakou he poe lala lehulehu, he kino hookahi hoi o ka ekalesia iloko o Kristo, he lala keia ohua kela ohua, he hana okoa ka kekahi lala a me ka kekahi.
                6 No ia mea, no ko ke Akua haawi ana mai i keia kanaka i kela kanaka o kakou i haawina okoa, like ole ko kekahi me ko kekahi, e pono e hana aku oia ma kona haawina i loaa mai. Ina i loaa i kekahi ka wanana, ina i haawi ke Akua i kekahi e hoikeike i kona makemake, malaila hoi ia e hana'i, me he kaula la, ma kamea a ke Akua i hoomaopopo mai ai ia ia.
                7 Ina i loaa i kekahi ka oihana puuku ekalesia, malaila ia e lawelawe pono ai. A i na lilo kekahi i kumu nana e ao, ma ke ao ana e noho ai ia, o kana hana no ia, e hoikeike aku i ke ano o ka ke Akua olelo.
                8 A i hoolilo ke Akua i kekahi i kumu hooikaika aku i kanaka, malaila ia e hana'i e paipai aku, e olelo hooikaika aku, e koi aku i kanaka e malama i ka pono, e papa aku i ka hewa o make ka mea i hewa. A ina lilo kekahi i mea haawi waiwai, o kona iho paha, o ko ka ekalesia paha, e haawi ia me ka naau kupono, a me ka lokomaikai, me ka ewaewa ole, a me ka pololei. A ina lilo kekahi i luna, e kiai pono ia i ka ohana me he kahuhipa la, me ke ahonui loa. 1 Tes. v: 12; 1 Tim. v: 19. A ina haawi mai ke Akua i kekahi e malama i ka poe mai, a i ka poe popilikia, e hana hoi oia ma ia hana me ka hoihoi a me ka oluolu o ka naau. 2 Kor. ix: 7.
                9 E hookamani ole ko oukou aloha. E aloha oiaio no. E hoowahawaha i ka ino, e pale aku i ka huhu a me ka oolea, e hoomau ma ka lokomaikai, e hahai i ka pono.
                10 Ma ke aloha hoahanau, e pono ke lauana io kekahi i kekahi, e hoomaikai kekahi i kekahi, me ka hoihoi, e lilo oukou i kumu hoohalike ma ia hana ana.
                11. Ma ka hana ana, e hana me ka ikaika, me ka hoomalowa ole, i nui mai ka ikaika o ka naau, a pela e malama ai i ka Haku ma kahana ana.
                12 Ma ka manaolana i ka Haku, e hauoli ai oukou; a maloko o ka popilikia, e ahonui ai.
                13 Ina i nele kekahi mau haipule, e kokua kau, e haawi aku, i pomaikai pu lakou. E pono hoi e hookipa ma ko oukou hale me ka lokomaikai, me ka aua ole. O na mea haihele i ka olelo a ke Akua kekahi e hookipaia, a me na malihini e, a me na hoahanau, Heb. xii: 2. 1 Tim. 10 1 Pet. iv: 9. 2 Ioane 5 - 8.

HE MAU NINAU.

xi: 30 Owai ka poe hoolohe ole mamua?
                Loaa i ko na aina e ka aha?
                Ma ka hoolohe ole owai ko lakou pomaikai ana?
31 E pomaikai hou ana na Iudaio ma ke aha la?
32 Kuuia iho la owai i ka manaoio ole?
                Kuu iho ka Akua ia lakou i ka manaoio ole i aha?
33 Heaha ka mea a Paulo i mahalo nui ai?
                Heaha ke ano o ko ka Haku manao a me kana hana ana ma ia mea?
34 Maopopo anei ia kakou ke ano a pau o kona manao?
                Ua lilo anei he kanaka i kakaolelo, i kuhina paha, i hoakukakuka no ke Akua?
35 Ua aie anei ke Akua i ka ke kanaka no kona kokua ana aku ia ia?
36 Nawai mai na mea a pau?
                Ma owai la e mau ai na mea a pau?
                No wai hoi na mea a pau?
                Ia wai ka hoonani mau ia?
xii I. Ma ke aha la i no ai o Paulo i kona hoahanau?
                E haawi lakou i ke aha i ke Akua?
                Haawi ia lakou iho i aha?
2 papa aku o Paulo i ke aha?
                Kauoha hoi ia lakou e hoopahaohao io pehea? I ike lakou i ke aha?
3 He aha ko Pualo haawina?
                Kauoha oia i na hoahanau pehea la?
4, 5 Ua hoohalikeia na hoahanau me ke aha?
6 He haawina okoa anei ko kekahi ko kekahi?
                Ina he wanana, e aha hoi?
7 Ina loaa ka puuku i kekahi, pehea aku la ia?
                Ina lilo kekahi i kumu ao, pehea aku la ia?
8 Ina he kumu hooikaika pehea la ia?
                Ina he luna, pehea la ia?
9 Pehea la e aloha aku ai? Hoowahawaha i ke aha? Hoomau i ke aha?
10 Pehea la e hana'i ma ke aloha hoahanau?
11 Ma ka hana maoli ana, pehea la e pono ai?
12 Hauoli mahea? E ahonui i ke aha?
13 E kokua ia wai? Pehea la e kokua ai i na haipule nele?
                Hookipa ia wai? E hookipa pehea?

NO NA KULA MA WAILUKU A ME KA HANA LOLE.

                Ua hoomaka hou maua me Mika Gerina i na kula ma Wailuku nei. He Kula honua kana. Ke komo mai nei na kane a me na wahine iloko o ia kula ma ka po akahi, ma ka po akolu, a me ka po alima. Elua a'u kula; o ke kula kamalii kekahi, a o ke kula kumu kekahi. He kula nui ke kula kamalii. Eha kanaha haumana i keia manawa, a aole pau mai na kamalii. Ua hookaawaleia keia kula. Iloko o ka luakini, ka wahi e kula ai o ka poe ike ole i ka hua a me ka hookui; a iloko o ka hale kula ka poe ike i ka heluhelu a me kekahi mea e ae. Uuku keia poe - kanaha paha. Nui loa ka poe ike ole. Ikaika loa ka manao o na kamalii i ke kula i keia manawa. I ka wa e kani ai kapu, holo mai lakou me ka olioli i ke kula. Aole paha liuliu keia manao ikaika; mamuli paha emi aku na haumana, ke komo mai ka palaka.
                Na na kumu kanaka maoli e ao aku i ka poe ike ole, a loaa ia lakou ka heluhelu, alaila e unuhiia lakou e komo iloko o ke kula o ka poe ike. Malaila ko lakou makemake. No ka mea, ke komo lakou iloko o ia kula, e loaa ia lakou kekahi palapala, a me ka papakahakaha, me ka pepa a me ka peni me ka inika. Eia kekahi mea e ikaika ai ka manao o ka poe ike ole, i loaa ia lakou keia mau mea. Elima la makou me na kamalii e kula'i i ka hebedoma hookahi. Elima la no hoi kula'i makou me na kumu. A elua kula i ka la hookahi me keia poe. I ke kakahiaka nui a me ke ahiahi. Mamuli paha e mahuahua iki ka naauao ma keia wahi, ke hooikaika makou i ke kula.
                O ke kula hana lole kekahi. Na Mika Berona keia. eono wale no ana haumana i neia manawa. Oia kona makemake, eono wale no, a makaukau lakou, alaila komo kekahi poe hou. Nui ka poe i makemake i ke kula hana lole. Eia no maanei Kuakini i keia mau la mamua iho nei. Ua hele mai oia e ike i keia hana a makemake loa oia. I kona manao he mea maikai loa. Aole pau kekahi lole i ka ulanaia, hilo a hoomakaukau wale no lakou i keia manawa:kokoke paha paa kekahi.
                Eia no keia mea a'u e hai aku. Ua mahuahua ka makemake i ka palapala ma Maui hikina nei. Ua pau ka maua palapala i ka hoolimalima, aole pau ka poe makemake i ka loaa. He mea e oluolu ai ka naau keia.
Wailuku, Aug. 24, 1835. L.

NA SOLOMONA.

                E imi i ka lokomaikai a me ka ike oiaio, imua o Iehova a me kanaka.
                E paulele ia Iehova me kou naau a pau, mai hilinai hoi ma kou naauao ana.
                Ma kou aoao a pau e ike oe ia ia, a nana no e hoopololei i kou hele ana.
                Mai hoakamai oe ma kou manao iho, e makau ia Iehova a e haalele i ka hewa.
                Oia ke ola no kou mau olona, a me ka lolo no kou mau iwi.
                E hoonani ia Iehova ma kau waiwai, a me na hua mua o kau mea i loaa'i a pau.
                A e hoopihaia kou wahi waihona a hu, e hu ae kau mau mea kaomi i ka waina hou.