Ke Kumu Hawaii, Volume I, Number 16, 5 August 1835 — Page 128
128 KUMU HAWAII. (AU GATE.
KAHI MELE.
HE MELE NO KE KULA SABATI.
1 Hala na la no
Ma ka paani;
Olioli loa
Ma na mea liilii.
Uuku nae ka pomaikai,
Ke ole o ka la kula'i.
2 Wehe maikai no
O ka wanaao,
Auhee ae ka po,
Puka mai ke ao;
E manao na kamalii
Ma ke kula Sabati.
3 Olioli no,
O ka pepeiao,
I ka lohe hou
'Ka olelo mau.
E wikiwiki kakou nei
I ke kula Sabati.
4 Aloha e oukou,
E na kumu nei,
I ao mai ia makou
I na mea ola'i.
E hele mau mai kakou nei
Ma ke kula Sabati.
5 Ke ma ae la no
O ke ao laelae;
Uhi mai ka po
O ka la maikai;
E hauoli kakou nei,
No ke kula Sabati.
L. L.
NO NA WAHINE.
WAIMEA, KAUAI, ME 19, 1835.
E na wahine; aole anei kakou i lihaliha a pakuikui, kenakena i ka ino, i ka hewa, a me ka pio ana o ko kakou mau kino ilaila? Ua like me ka pio ana o Aigupita. Pela no ko na wahine pio ana, i kela manawa. Ua oi loa ko na wahine poino.
Eia ka poino ana o kakou, e na wahine. Ua poina paha i oukou na ino o kakou i noho ai me ka hoomanawanui loa. Aohe maka, aohe iuhu, aohe ili, aole iwi, ke kau nei no ke alina ka maewaewa ia kakou a me ke koe a io ana o ko kakou mau naau e noho nei.
Auhea oukou, e na wahine? E hoomanao kakou i ka ino o kela noho ana. E holo koke aku kakou ia Iesu. Oia ka mea nana i kala mai ka haumia o na wahine i keia manawa. Ua hala aku na ino, a me ka make, ua lanakila na wahine e noho nei. I keia manawa, ua pau kela mau hana ino loa, a me kela poino ana o kakou, i kela manawa. Ua hala e aku keia mau mea. Auhea oukou, e na wahine? Ua oluolu ko kakou mau kino i keia manawa e noho nei.
Auhea oukou, e na wahine. E hoomanao kakou i ko ke Akua mana. O na awawa a pau, ua hoopihaia. O na puu me na mauna, ua hoohaahaaia. Ua hoikeia mai ka nani o Iehova.
He mea kupanaha ka newenewe, ka hiluhilu, ka ihi, ka nani, ke kuonoono o na wahine haipule.
Auhea oukou, e na wahine. O Solomona i kona kahiko ana, i kona nani a pau, o Kaahumanu i kahiko ai i ka olelo a ke Akua ma keia pae aina.
Pomaikai wale na wahine haipule, ke make iloko o Kristo Iesu.
NA DEBORA KAPULE.
HE NINAU HOAKAKA.
E na misionari a pau ma na wahi a pau o keia pai aina, e hoolohe mai.
Ina e makemake kekahi o oukou i ka Pi-a-pa maoli, a i ka Pi-a-pa Kamalii paha, e pai hou ia, e hoakaka mai.
Ina paha i lawa keia mau pepa paiia i kekahi o oukou, e hai mai, i akaka ke koena o keia mau palapala e koe mai ana ma kela wahi keia wahi o na misionari i noho ai.
Ua pau ka makou nei pepa like, aole koe, a ua noi hou ia mai e ka poe ao hou i ka palapala i keia manawa.
A ke manao nei no ka poe nana e malama i ka mea pai palapala ma Honolulu nei e pai hou i 10,000 o ka helu ana.
E hai mai i ehia o kela a o keia, oukou e makemake ai.
Eia hou keia mea hoakaka no na palapala haole.
Ina ia oukou ka palapala ma Amerika mai i waiho liilii a kaawale paha;---ka palapala o kela ano a o keia ano i waiho wale e helelei paha, a makemake e houluulu a humu hou a paa i ka ili, e hoouna mai ia i ka mea nana e malama i na palapala o ka poe misionari. Honolulu, Augate 1, 1835.
NO NA MOKU.
Mai 9. Holo mai ka moku kalepa, o ke kia alua, o Griffin kona inoa, mai Kanetona mai, o W. C. Little ke alii Ua holo aku ai i St. Blas, Mei 20.
Mei 9. Adaline, he moku o kohola, mai Nuberipota mai,---Buckley ke alii, 17 mau malama ka holo ana, 700 barela aila i loaa. Ua holo aku ua moku la i Iapana, Mei 10.
16. Canton, Gardner, Nu Bedefoda, 7 mau malama, aole aila. Holo aku i Iapana, Mei 18.
19 O ke kia alua, Lady Wrengell, Hart, mai Nowete mai, 25 mau la ka holo ana.
24. O ke kia alua, Guamenia, Spense, mai Guamosa mai. Ua holo hou aku ia malaila, Iulai 3.
26. O Avon, J. C. Jones, Esq., mai Monterey mai, 20 mau la ka holo ana. Holo hou aku oia i ua wahi la, Iune 24.
Iune 4. Holo mai o ke kia alua, o Flibbertygibbet, Thayer ke alii, mai St. Blas mai.
6. Unity, Shaw, St. Blas.
6. O Hellespont, o ke kia akoulu, Henry ke alii, mai Bosetona mai. Holo aku keia i Batavia, Iune 27.
NA SOLOMONA.
E kuu keiki e, mai hele pu oe me lakou ma ke ala, E haalele kou wawae i ko lakou mau kuamoo;
No ka mea, holo kiki na wawae i ka hewa, Wikiwiki hoi lakou i ka hookahe koko.
Make hewa no ke kau ana i ka hei, Ke nana mai ka mea eheu.
Moemoe hoohalua lakou i ke koko, Makaala lakou no na uhane.
Pela ka aoao o ka poe makee waiwai a pau, Kaili aku la i ka haku nana ia.
Hea ae la ka noiau mawaho. Pane mai la kona leo ma ke alanui,
Ma ke poo o na ala kahea mai oia, Ma ka wehe ana o na oukou kulanakauhale kana olelo, i mai la;
Pehea ka loihi, e ka poe ike ole, E manao nui ai oukou i ka ike ole? Oukou hoi e ka poe hoowahawaha, E makemake anei oukou i ka hoowahawaha ana? Pehea ka loihi, e ka poe naauao?
E huli mai oukou i ka'u ao ana, E ninini aku au i ko'u Uhane ia oukou, E hooike aku ia oukou i ka'u mau olelo.
OAHU:—MI SSION PRESS, R. TINKER, Editor. E. O. HALL, Printer.