Ke Kumu Hawaii, Volume I, Number 16, 5 ʻAukake 1835 — Page 126
126 KUMU HAWAII. (AUGATE,
Ua lohe kona pepeiao,
I na olelo liilii a'u,
Na paani o'u me na manao,
Ua ike ia, ua ike mau,
Pehea la e hewa ai?
Na kamalii i ke Akua mau,
Aole hiki ke huna'e,
Haalele i na hewa a pau.
L.L.
HELU 21.
KA EPISETOLE A PAULO I KO ROMA.
MOKUNA 9:23--33.
22 Heaha hoi, ina, e manao ana ke Akua, e hoomaopopo i kona huhu, a e hoike hoi i kona mana, ua hoomanawanui mai ia me ke ahonui loa i na ipu e huhuia i hoomakaukauia e lukuia.
23 A e hoike mai hoi i ka nui o kona lokomaikai mai i na ipu e alohaia ana i hoomakaukau mua ai no ka nani.
24 Ia kakou hoi ka poe ana i koho mai ai, aole mawaena o ka poe Iudaio wale no, mawaena o na kanaka e kekahi.
25 E like me kana i olelo mai ai ma Hosea, E kapa ana au i ka poe kanaka aole no'u, i poe kanaka no'u, a me ka mea i aloha ole ia, i me aloha.
26 A ma kahi i oleloia'i ia lakou, Aole o ko'u poe kanaka oukou, malaila e hapaia'i lakou he poe keiki lakou a ke Akua ola.
27 Ua olelo mai hoi o Isaia no ka Iseraela, Ina he lehulehu na mamo a Iseraela, e like me ke one o ke kai, he hapaka poe e hoolaia.
28 No ka mea, e hooko ana oia i kana olelo, a pau ia ma ka pono, no ka mea, e hana ana ka Haku ma ka honua, i kana mea i hai maopopo ai.
29 E like hoi me ka Isaia i olelo mua mai ai, Ina i waiho ole mai Iehova Sabaota i koena no kakou, ina, ua like pu kakou me Sodoma, a ua hoohalikeia hoi me Gomora.
30 Heaha ka kakou e olelo nei no ia? O ko na aina e ka poe i imi ole i ka hoaponoia, ua loaa ia lakou ka hoaponoia, o ka hooponoia ma ka manaoio;
31 Aka, o ka Iseraela ka poe i imi i ke kanawai e hoaponoia'i, aole loaa ia lakou ke kanawai e hoaponoia'i.
32 No ke aha? No ka mea, aole ma ka manoio, aka ma na hana ana o ke kanawai: no ka mea, ua kuia lakou i kela pohaku e kuia'i.
33 E like me ka mea i palapalaia, Eia hoi, ke waiho ne au ma Ziona i ka pohaku e kuia'i, a i ka pohaku e hina ai; o ka mea i manaoio ia ia, aole ia e hoka.
KA HOOMOAKAKA ANA.
9 22. Ina i hoomanawanui loa ke Akua i ka poe ku e, i maopopo kona huhu i ka hewa ma ka hoopai ana, a i ikea hoi kona mana ma kona lanakila ana maluna o ka poe oolea i makaukau no ka lukuia, heaha hoi ka hewa o ke Akua? He pono kona manao.
23 24, A ina i manao ke Akua e hoike i kona nani i ka poe ana i koho mai ai, a i hoomakaukau ai hoi, e lilo i ka hoopomaikaiia ma ka lani, o kakou ka poe i manaoio, na Iudaia a me ko na aina e, auhea la ka hewa o ia hana ana?
25 Ma Hosea 2:23: ua hoike mai ke Akua i kona manao e hoopomaikai i kekahi poe kanaka e aole i kapa e ia he poe kanaka nona e like me na Iudaia, a e kapa hoi ia lakou, O kona poe kanaka.
26 Pela hoi i olelo ai ke Akua ma Hosea, no kona poe kanaka ana i kipaku e aku ai, e kapa hou ia lakou, "He poe keiki na ke Akua ola." Pela i aloha ai ke Akua i ko na aina e.
27 Ua haaleleia ka nui o ka Iseraela i ka wa ia Paulo ma, he nui ka poe i make; he hapa ke koena i hoolaia ia Iesu i kela wa, e like me ka ke Akua olelo ma Iudaia, 10:20:21, 22.
28 E hooko ke Akua i kana olelo e kipaku, a e hoopuehu i ka Iseraela no ko lakou malama kii, a no ka hookamani, a no ka pepehi ana i kana Keiki. Ua hooko no hoi ia ma ka pono.
29 Iehova Sabaota, Haku Sabaota, Akua Sabaota. O ka Haku ia o ka poe anela lehulehu loa o ka lani. Ua hookoe no oia i ke koena o ka Iseraela o pau lakou i ka make. Na Isaia i olelo mai, Ina aole Iehova Sabaota i malama mai i kekahi poe o kakou, ina ua papapau ka Iseraela i ka lukuia e like Sodoma a me Gomora. Isaia 1:9.
30 31. Pehea la e hai aku ai i keia mau mea a pau? Peneia, o kanaka e, ka poe i imi ole i ka hoaponoia, ka poe ike ole i ke kanawai ia Mose, ua hoopomaikaiia lakou mamuli o Iesu, ua hoaponoia hoi ma ka manaoio ia ia, aka o ka poe Iudaio, ka poe i imi i ka hoaponoia maka lakou hana ana, aole lakou i hoaponoia, aole maopopo ia lakou ke kanawai e hoaponoia'i, me ka hilinai ole ia Iesu.
32 No ke aha la i loaa ole ai i ka Iseraela ka hoaponoia? No ka mea, aole lakou i imi i ka hoaponoia i haawi wale ia mai no Iesu, he pohaku ia e hana ai lakou, aka, manao lakou e kuai, e hoolimalima paha ma ka lakou hana ana, e hoaponoia lakou no ko lakou pono iho.
33 Elua olelo i kakauia ma Isaia 28:16, a me Isa. 8:14. Lawe liilii iho la o Paulo e hui pu i hookahi olelo, penei, Ke waiho nei au ma Ziona i ka pohaku e kuia'i, ka pohaku hoi e hina ai; a o ka mea e manaoio ia ia aole e hoka.
O ka Mesia ka Pohaku, he mea maikai, he makamae hoi, he mea i alohaia, aka no ka makemake ole o na Iudaio, ua lilo ia i pohaku e kuia'i, a e hina'i hoi. O ka mea hoi i manaoio ia ia e ola ia. O ka manaoio ka mea e pono ai.
HE MAU NINAU.
22 Heaha na ipu e huhuia?
Ua makaukau e aha?
I ko ke Akua hoomanawanui ana ia lakou, manao oia e aha?
23, 24 Heaha na ipu e alohaia?
Hoomakaukauia no ke aha?
Hoike mai ke Akua ia lakou i ke aha?
25 Owai ka poe e kapaia'ku o ko ke Akua poe kanaka?
26 Mahea ia olelo?
Owai keia poe i kapa ole ia he poe kanaka no ke Akua i kekahi manawa?
27, 28, 29 Heaha ka Isaia olelo?
O ka like ana me ke one o ke kai, heaha ia?
Nui ka poe owai i make?
I ka wa hea ka hapa ana o ka poe o ka Iseraela i hoolaia? Ina aole hookoe ke Akua i kekahi poe o ka Iseraela, lilo anei lakou me ke aha?
30, 31 Imi ole na kanaka e i ke aha?
Loaa ia lakou ke aha?
Heaha ka mea a ka Iseraela i imi ai?
Ua loaa anei i ka lehulehu o lakou ka hoaponoia?
32 No ke aha la i loaa ole ai i ka Iseraela ka hoaponoia. Kuia lakou i ke aha?
33 Heaha ka Pohaku e kuia'i?
He mea pono anei ia pohaku?
Mahea la i loaa'i ia Paulo keia olelo?
O ka mea i paulele aku ia pohaku heaha kona hope?
HELU 22.
KA EPISETOLE A PAULO I KO ROMA.
MOKUNA 10; 1-14.
E na hoahanau, eia ka makemake io o ko'u naau, a me ka'u pule i ke Akua no lakou e ola lakou.
2 No ka mea, ke hoike aku nei no wau no lakou he manao ikaika ko lakou no ke Akua, aole nae mamuli o ka ike.
3 No ka mea, i ko lakou ike ole ana i ka hoaponoia mai e ke Akua, a i ko lakou imi ana e hooku paa i ko lakou pono iho, aole lakou i noho aku mamuli o ka hoapono ana mai a ke Akua.
4 No ka mea, o Kristo ko ke kana-