Ke Kumu Hawaii, Volume I, Number 16, 5 ʻAukake 1835 — Page 123
1835.) KUMU HAWAII. 123
NO KA LA HOOKOLOKOLO.
[Ka hope o ke koena.]
Ka la o ke Akua e hookolokolo ai i ko ke ao nei, oia ka la e makau ai ka poe hewa, no ka mea.
3 E hookaawale mai ke Akua i na kanaka a pau, a e uku mai no ia i kela mea, i keia mea e like me ka mea ana i hana'i iloko o ke kino.
I keia ao, noho pu ka poe hewa me ka poe pono. Ma ka aina hookahi, aia no ke Alii maikai, a me ke kanaka hewa, aole ia, ke Alii hewa, a me kanaka maikai. Ma ka hale pule hookahi, aia no ka poe malama ole ia ia. Ma ka hale hookahi, aia no ka makua haipule, a me ke keiki hoomoloka, ka wahine hana maikai, a me ke kane hana ino. Aka, i ka la a ke Akua e hookolokolo ai i ko ke ao nei, ua pau ka noho pu ana o ka poe hewa me ka poe pono. I mai la Iesu penei; Aia hiki mai ke Keiki a ke kanaka i kona hanohano me na anela hemolele a pau pu me ia, alaila, e noho iho oia maluna o kona nohoalii hanohano. A e hoakakaia na kanaka a pau loa imua o kona alo, a e hookaawale oia ia lakou e like me ke kahuhipa e kaawale ai i ka hipa a me ke kao.
A e hoonoho aku ia i ka poe hipa, oia ka poe pono, ma kona lima akau, a o ka poe kao, oia ka poe hewa ma kona lima hema. Alaila, e olelo mai ke Alii ia lakou, ma kona lima akau, E hele mai oukou, e ka poe i hoomaikaiia'i e ko'u makua, i loaa ia oukou ke aupuni i hoomakaukauia no oukou mai ka hookumu ana mai o ka honua.
Alaila, e olelo aku la oia i ka poe ma kona lima hema, e ka poe i hoohewaia, e hele oukou pela, mai o'u aku nei iloko o ke ahi aa mau i hoomakaukauia'i no ka diabolo a me kana poe anela." A pau keia olelo a Iesu, alaila, e hookaawaleia na kanaka. Eia paha ke Alii nui e hele ana, mai ke alo o Iesu aku i ka po, a me kekahi o kona poe kanaka pu me ia. Aia kekahi kanaka malama i ko ke Akua kanawai e hele pu ana me Iesu i ka lani, a o kana wahine e hele ana i ka po.
Eia ke keiki maikai e pii ana iluna, a o kona makua e poho ana ilalo. Nui ka uwe ana, i kela la, no ka hookaawale ana o ka poe pono a me ka poe pono ole. No ia mea, ua akaka lea ia, o ka la a ke Akua e hookolokolo mai i ko ke ao nei, oia ka la a makau ai ka poe hewa.
Ke noi ikaika nei au ia oukou, e na lii, a me na kanaka o keia pae aina, e hoomakaukau no keia la nui, a me ka makau. E pau koke na lani a me ka honua i ke ahi; alaila e hele mai o Iesu e hookolokolo mai ia oukou mai ia oukou; aka, owai ka mea hiki ke hoomanawanui i ka la o kona hiki ana mai, owai ka mea ku paa i ka wa e ikea mai ai oia? Aole hiki ia oukou ke hoomanawanui, i kela la, aole hiki ia oukou ke ku paa, ia wa, ke makaukau ole oukou.
Pehea e lilo ai oukou i poe makaukau no kela la nui? Penei: E imi oukou ia Iesu i makamaka ponoi no oukou.
Ua lohe no oukou, o Iesu, oia ka mea nana e hookolokolo mai i ko ke ao nei. I keia manawa, nui kona aloha mai, a me kona ahonui mai i kanaka a pau. He makemake nui ia e haalele lakou a pau loa i ka hewa, e mihi pono, a e paulele ia ia, i ola lakou.
Aka, i kela la nui, a me ka makau, ua pau kona ahonui i kona poe enemi. Auwe lakou noka huhu io mai o Iesu. E olelo mai ia ia lakou me ka leo nui, e like me ka leo o ka hekili, " E hele oukou pela mai o'u aku nei iloko o ke ahi aa mau." E haalulu lakou imua ona, me ka hilahila, a me ka makau nui. Pela oukou a pau ke ku paa oukou ma ka hewa.
Aka, i lilo oukou i poe makamaka o Iesu, a lilo mai ia i makamaka no oukou, ua pau ka hilahila, a me ka makau nui i ka wa o ko oukou ku ana imua i ka noho hookolokolo o Kristo.
Heaha ka oukou e hana'i i lilo mai o Iesu i makamaka no oukou.
1. E makau i ke Akua. Nui ka poe makau ole ia Iehova, i ke Akua nui o ka lani, a me ka honua; makau ole i kona maka, a me kona huhu; makau ole i ka la mahope. Auwe lakou no ka paakiki o ko lakou naau. He poe nawaliwali lakou me he poe uhini la imua i ke alo o Iehova. Mai hoopaakiki oukou i ko oukou mau naau imua ona. E makau oukou ia ia. I mai la o Iesu i kanaka, Mai makau aku oukou i ka poe ke pepehi mai i ke kino, aole nae e hiki ia lakou ke pepehi i ka uhane, aka, e makau aku oukou i ka mea nona ka mana e make ai ka uhane a me ke kino iloko o ka lua ahi.
2. E mihi pono oukou i ko oukou hewa. O ka hewa, oia ka mea e makau ai na kanaka i ka la a Iesu e hookolokolo ai i ko ke ao nei, oia ka mea e hilahila ai lakou ia wa, oia ka mea e make ai ko lakou uhane. Aole anei oukou i ike, ole e loaa i ka poe hewa ke aupuni o ke Akua? O ka hewa, oia ka mea e hoopailua ai ko Iesu naau. Nui kona inaina ia mea, a nui loa kona huhu a me kona ukiuki i ka poe kupaa ma ka hewa. Ina makemake oukou ia Iesu i makamaka no oukou, i ka la nui ana e hookolokolo ai i ko ke ao, e mihi pono oukou i ko oukou hewa, a me ka ehaeha o ka naau, a me ka hoopailua ia oukou. E haalele oukou i ka hewa, i na mea a pau loa a ke Akua i papa mai ai.
3. Eia kekahi. E manaoio aku oukou ia Iesu, i ke Keiki a ke Akua. Ninau mai la ka poe Iudaio ia Iesu. Heaha ka makou mea e hana aku ai i ka hana ke Akua. Olelo akula Iesu ia lakou, i aku la, "Eia ka ke Akua hana, e paulele mai oukou i kana mea i hoouna mai ai." Eia kekahi, "O ka mea paulele aku i ke Keiki, he ola mau loa kona---o ka mea paulele ole i ke Keiki, aole ia e ike i ke ola, ua kau mai ka huhu o ke Akua maluna iho ona." Eia ka mea wale no e pakele ai oukou i ka make, a e ola'i ko oukou uhane.
No ia mea, ke noi aku nei au ia oukou, E hele koke io Iesu la. E makemake nui aku ia ia. E noi pinepine aku ia ia, i kala mai i ko oukou mau uhane i kona koko mana e maemae. E malama no hoi oukou i kona kanawai a pau loa, pela e lilo ai oia i makamaka io no oukou; a i ka la nui, a me ka makau, ka la mahope a ke Akua e hookolokolo mai i ko ke ao nei, e ae mai no ia i ko oukou noho pu ana me ia ma kona aupuni maikai ma ka lani. Pomaikai ka poe e noho malaila.
Auhea oukou, e na'lii, a me kanaka a pau loa o keia pae aina? Heaha ko oukou manao no ka la a ke Akua e hookolokolo ai i ko ke ao nei? Mai manao oukou aole paha e hiki mai ua la la. E hiki mai no. He mea oiaio, E ike maka auanei oukou a pau loa ia Iesu maluna o ka noho hookolokolo e ike maka oukou i na kanaka a pau loa mai ka wa o Adamu mai a hiki i ka hopena o keia ao. E ku iluna oukou a pau me lakou imua i ke alo o Iesu ka lunakanawai: alaila, e loaa ia kakou a pau e like me ka mea a kakou i hana'i iloko o ke kino, ina paha he maikai, ina paha he hewa.
Mai hoopoina oukou i kela la. E hoomakaukau oukuou e halawai pu me ke Akua ia manawa. E haalele i ka hewa, i na mea a pau a ke Akua i papa mai ai. E lilo oukou i poe hou---i poe haumana na Iesu, alaila, e hoikeia auanei oukou imua o ka noho hookolokolo o Iesu Kristo me ka oluolu o ka naau. Amene.---J. S. G.
O KA NAAUPO.—HELU II.
2. O ka naaupo, oia ka mea e hooemi nui ia mai ka pomaikai o ko ka hale.
Nani ka pomaikai o ko ka hale naauao io maoli. He poe noonoo na makua. He poe molowa ole. Imi lakou i na mea waleno e pono