Ke Kumu Hawaii, Volume I, Number 15, 22 July 1835 — Page 116

116 KUMU HAWAII. IULAI,

                35. Ke makemake nei anei na kamaaina i ke ao ana?
                Makemake no; iini lakou i hele ilaila na kumu e ao aku ia lakou, a ua hele kekahi i Beritania e imi i ke ao ana.
                36. Pehea ko lakou noho ana ia manawa?
                Pau kekahi o ko lakou mea hihiu, mahiai kahi poe, ua loaa ia lakou ka ike iki i kela mea maikai i keia mea maikai, aole nae he nui o lakou i paa ma ka pono.

NO NA AINA BORABORA.

                37. Pehea ka hana ana malaila?
                Kanakolu makahiki a me kumamawalu i hoomakaia'i ka hana a na misionari malaila. No Beritania aku ka poe misionari. Mamua kuee nui kamaaina. Make kekahi poe misionari ia lakou, ua puehuia kekahi.
                38. Pehea ia mau makahiki i hala aku nei?
                Nui wale ka poe i huli i ka pono. —Pau ka hoomana i na kii, ua lilo lakou a pau i poe manao i ka pono, a huli io no kekahi poe i ka pono. Nui wale ka poe haumana; nui hoi na hale kula, a me na hale pule i kela moku i keia moku, a ua ulu nui ka pono.

NA NA KAMALII.

HE WAHI KAAO NO NA KAMALII KULA SABATI.

                Komo aku la kekahi kahuna pule iloko o ke kula Sabati no na kamalii, aia no ma kau wahi o Amerika. Nana aku la ia i na kamalii e noho lalani ana, a i aku la ia,
                "E na pokii e; he wahi olelo ka'u ia oukou. He kula Sabati ka'u mamua aku nei. A ma na la Sabati, ku ae la wau a ninau aku la i na haumana, i ka ke Akua olelo. A ike aku la au i kekahi kaikamahine uuku nawaliwali e noho kokoke mai ana, nana no i hai pololei mai i na mea i ninauia'ku ai.
                Hoao pinepine aku la au i kona ike ana i ka olelo a ke Akua, a he mea e ka kona makaukau. He kapa eleele kona, a he maikai hoi, aole pelapela, aole nahaehae. A he noho malie loa kona ma ke kula.
                Ninau aku au i kana kumu penei "Heaha la ke ano o na kaikamahine?
                I mai la ke kumu, "He huahaule no oia, aole ona makuakane, aole hoi makuawahine. Ua ilihune loa. A he kaikamahine akamai, a noho malie, a lokomaikai, aole hakaka, aole inaina aku i kona mau hoa."
                A i kekahi la Sabati, he ahaaina a ka Haku. A hele mai la kekahi kumu, i mai la, "E, ke makemake nei kekahi haumana a'u e kamailio malu aku me oe."
                I aku la au? "Ailaihea."
                I hou mai la ia, "Aia no io i kona wahi la."
                I aku la au, "E kii aku oe ia ia, e hele mai i o'u nei."
                A kii no ia a hele mai la ka haumana, komo ae la iloko o kuu keena mehameha. Nana aku la au, aia ka! o kela wahi kaikamahine ilihune iho la no ia.
                Hoonoho iho la au ia ia, a ninau aku la, "Heaha kau e makemake nei?"
                Uwe nui iho la ia, aole hiki ke ekemu mai, no ka nui loa o ka waimaka. A liuliu iki ae la, i mai la oia, "Ke ake nei au e hele i ka ahaaina a ka Haku. Ua ike no au i ko Iesu make ana no'u, a me kana kauoha ana mai ia'u e hele aku io na la, a e ai hoi ma kana papa aina; a makemake no au e malama ia ia.
                Kaumaha loa kuu naau i keia mau malama iho nei i ka manao ana,