Ke Kumu Hawaii, Volume I, Number 13, 29 April 1835 — Page 101

1835.) KUMU HAWAII 101

HELU 19.
KA EPISETOLE A PAULO I KO ROMA.
MOKUNA 7. - PAUKU 15 - 25.
Mei 18-29.

                15 No ka mea, o ka mea a'u i hana'i, aole au e hoapono, no ka mea aole ka mea a'u i makemake ai ka'u i hana'i, aka hana no wau i ka mea a'u i hoowahawaha ai.
                16 Ina hoi e hana wau i ka mea a'u i makemake ole ai, ua ae aku au i ke kanawai, he pono.
                17 Ano hoi aole na'u ia i hana, aka na ka hewa e noho ana iloko o'u;
                18 No ka mea, ua ike au, aole noho iloko o'u, iloko o ko'u kino, kekahi mea maikai; no ka mea, o ka makemake eia no ia'u ia, aka o ka hana i ka pono, aole i loaa ia'u.
                19 No ka mea aole au i hana i ka pono a'u i makemake ai, aka o ka hewa a'u i hoowahawaha ai, oia ka'u i hana'i.
                20 A ina i hana au i ka mea a'u i makemake ole ai, aole na'u ia i hana, aka na ka hewa no e noho ana iloko o'u.
                21 Ua loaa hoi ia'u he kanawai no'u, i ko'u wa e makemake ai e hana pono, ua kokoke mai no ka hewa.
                22 No ka mea, ua oluolu no wau i ke kanawai o ke Akua, ma ke kanaka oloko,
                23 Aka, ua ike au i kekahi kanawai iloko o ko'u mau lala e hakaka ana me ke kanawai o ko'u manao, a e hoolilo ana ia'u i pio no ke kanawai o ka hewa iloko o ko'u mau lala.
                24 Auwe hoi au ke kanaka poino! nawai hoi au e hoopakele ae i ke kino nana keia make.
                25 Ke aloha aku nei au i ke Akua ma o Iesu Kristo la o ko kakou Haku! No ia hoi, Owau nei la, ua malama wau i ke kanawai o ke Akua, aka ma ko'u kino i ke kanawai o ka hewa.

KA HOOMOAKAKA ANA.

                15 O ke kanaka ma ke kino, me he mau kanaka la elua ia i ka Paulo olelo, he hookahi no nae, a o kona naau, me he mau naau la elua ia. Noonoo kekahi i ka pono a hoapono no, a kuko kekahi i ka hewa, a hana no malaila, aole hiki i kekahi naau ke hoapono i ka hewa ana i hana'i.
                16 Ina e hoahewa ke kanaka i ka hewa ana i hana'i ua hooiaio ia i ke kanawai me he mea la, he pono io no.
                17 Aole na'u, aole ua ke kanaka hoapono i ka pono, aole na'u i hana i ka hewa, aka na ka hewa, na ka naau kuko hewa, i hana, na ke kino hewa.
                18 He mea maopopo no keia, aole he mea pono e noho ana iloko o ke kino, iloko e ka naau kuko hewa, aohe mea maikai ko laila e hoaponoia e ke Akua. He ino loa ia kumu he ino no kana mau hua. Oia ko ke kino manao i malu ole i ke kanawai o ke Akua aole loa e hiki ia ia ke malama. Rom. viii. 7
                l9 O ka pono a kekahi naau i manao ai e hana, aole ia i hanaia e ke kanaka, no ke keakea ana o ka naau kue, a o ka hewa a kekahi naau i manao ai e waiho, oia ka ke kanaka i hana, ai no ka ikaika loa o kekahi naau malaila. Ua maopopo lea paha ia i ke kanaka e hooikaika ana i ka imi i ke ola, aole nae i lanakila maluna o ka hewa. O ka hewa ka lanakila.
                20 Ina e hana no ke kanaka i ka hewa ana i manao ai e waiho no, alaila, na ka hewa iloko ona i hana, na ka naau hewa no.
                21 Oia hoi, malaila i maopopo ai he kanawai o ke kino, ua makaukau i ka hana hewa, i ka wa e manao kekahi naau e hana pono. Ua launa mai ka hewa ia ia.
                22 Oluolu no ka naau noonoo pono, ua ike hoi ia he pono ko ke Akua kanawai, nana aku ko loko kanaka, he pololei ke kanawai, he mea e oluolu ai, he mea e pono ai ko ke Akua aupuni, he mea e hele pololei ai na kanaka.
                23 Aka he kanawai okoa, he ikaika, he kuko, iloko o ke kino, iloko o na lala hewa, iloko o kekahi naau, he mea e hakaka ana me ko kekahi naau manao oluolu i ka pono, a no ka mana o keia kanawai ku e, ua pio ke kanaka i ka hewa e make ai. I ka wa i noho ai kakou ma ke kino, o ko kakou kuko hewa ua hooikaika iloko o ko kakou mau lala, e hoohua i ka hua no ka make. Rom. vii. 5.
                24 Poino no ke kanaka i pio i kona kuku hewa. Ua ike no i ke kanawai, he pono, aka ua ikaika ke kuko hewa o kona naau a kaumaha, weliweli ia, makau no i ka make, manao paha e holo i ke ola, aka na paa, ua pio no i kona naau hewa. Auwe iho la ia, me ka ninau ikaika, "Nawai la hoi au e hoopakele ae i ke kino nana keia make,'' i pakele io wau i ka ikaika o ko'u kako hewa, o make au ilaila?
                O ke kino nana keia make, ua like ia me ka naau hewa e make ai ka uhane. O ka manao ma ke kino he make ia, okoa ka manao ma ka uhane. Ioane iii. 6. Rom. viii. 2. 4. 5. 6. 9.
                25 He hauoli ko Paulo, a hoomaikai aku la ia i ke Akua, no ka mea, e hiki ia Iesu ke kokua mai i ke kanaka poino, ana i hoakaka ai, keia kanaka kela kanaka i pio i kona naau hewa, a ma ka mokuna viii e hoakaka ai ia i ka lanakila ana o ke kanaka hou. Aka na mea ana i olelo ai ma keia mokuna vii, ua hooiaio hou mai peneia; No ia hoi, owau nei la ke kanaka hookahi, ma ko'u manao, ua malama wau i ke kanawai o ke Akua, aka ma ko'u kino, mamuli o ke kuko, ua malama wau i ke kanawai o ka hewa. O ka ike ana, a me ka noonoo ana i ke kanaka i ke kanawai, ua ae aku he pono, aka o ke kuko ana a me ka hana ana o ke kanaka aia no ia ma ka hewa. Nolaila ua pono ke kanawai, aka aole ia he mea e maikai hou ai ke kanaka, aole ia he mea e ola'i ka uhane ke kokua ole mai ka Mesia.

HE MAU NINAU.

                15 Me he mea aha la ka naau o ke kanaka?
                No ke aha la ia i hana ai i ka mea ana i manao ai he hewa?
                16 Ina hana wau i ka mea a'u i hoowahawaha ai, pehea la ke kanawai i ko'u manao?
                17 Na ke aha i hana i ka mea pono ole?
                18 Mahea la i noho ole ai ka mea maikai?
                Heaha ke kino? Hiki no anei i kekahi naau o ke kanaka hewa ke manao iki, a makemake iki i ka pono?
                He makaukau anei ia i ka hana pono?
                19 Ua hana anei ia kanaka i ka pono ana i manao ai e hana? O ka hewa ana i manao ai e waiho, ua hana anei ia?
                20 I hana ke kanaka i ka hewa ana i manao ai o waiho, na ke aha la ia i hana?
                21 A kupu ka manao e hana pono, maloko o ke kanaka hanau hou ole, heaha ka mea e pili ana ia ia?
                22, 23. A oluolu kekahi manao i ke kanawai o ke Akua, pehea la kekahi kanawai okoa?
                Heaha la ia kanawai okoa, e pio ai ke kanaka?
                24 Owai ka mea poino? Poino i ke aha? I ka wa hea?
                Heaha ke kino e make ai ka uhane?
                25 E hiki anei ke paulele? Ma owai la? Aole anei ma ke kanawai wale no e maikai hou ai, a e ola ai hoi? O ka ike ana a me ka noonoo ana o ke kanaka, mamuli o ke aha ia?
                O ke kuko a me ka hana ana o ke kanaka hewa, mamuli o ke aha ia?
                Ma ka mokuna hea e maopopo ai ka lanakila o ke kanaka hou mamuli o Kristo?

NO KA WA E HOOPONOPONOIA'I NA MEA A PAU.

                I ko kakou nana ana'ku i na mea olalo nei, ike kakou i na mea kekee he nui loa.
                Noho kekahi poe hana hewa me ka waiwai, a mea ka hanohano, a me ka mahaloia mai. Noho kekahi poe haipule hoi me ka mai, a me ka ilihune, a me ka hoowahawahaia, a me ka hoomaauia mai e ka poe hana ino. Hemo ka aina o kekahi mea malama ma ka pono, a lilo ia i ka mea malama ma ka lealea. Nele ka mea haipule i ka ai ole, i ka hale ole, a hooluhi make hewaia