Ke Kumu Hawaii, Volume I, Number 13, 29 April 1835 — Page 100

100 KUMU HAWAII. (APERILA

maka ma kona mau maka, a o kona mau lima ma kona mau lima, a hoopalaha ia ia iho maluna o ke keiki a mehana ae la ka io o ke keiki. A hoi iho ia a holoholo ae maloko o ka hale, a pii ae la a hoopalaha ia ia iho maluna ona a kiha mai la ke keiki; ehiku kona kiha ana, a kaakaa ae la kona mau maka
                Hea iho oia ia Gehazi, i ae la, E kii i ka wahine Sunema nei. Kii iho la oia ia ia; a komo ia io na la, i ae la o Elisai ia ia, E hapai oe i kau keikikane. Komo ae ia, a haule ma kona mau wawae, hoomana i ke Akua, a hapai ae la i kana keiki a puka iho la.''
                Auhea oukou e na Makuwahine. E noonoo oukou, i ke aloha a me ka lokomaikai, a me ka ikaika o kela wahine Sunema he mea ia e hoohalike ai oukou e pono ai. Nani kona aloha i kana keiki, a me kona imi ana i ka mea e malu ai ia. Nani hoi kona malama ana i kana kane, a me kona hooponopono ana i ka hale, me ka ikaika. Nani kona lokomaikai hoi i ke kaula nana i hoike i ka olelo a ke Akua. He mea e mahaloia kona ikaika, kona noonoo ana, a me kona aloha, a me kona paulele ana i ke Akua, me ka manao, ua maluhia lakou iloko o kona mau lima.
                E hoomanao hoi oukou i ka lokomaikai o ka Haku ia ia. Aole ia i haalele i ka poe i imi aku ia ia, aole ia e hoonele ia lakou. Pomaikai ae la i ka Haku kela wahine Sunema, a me kana kane, a me kana keiki.
                E ka makuwahine Hawaii nei, ke ninau aku nei au ia oe, ia mau ninau ekolu a Elisai i ninau ai i ka wahine Sunema.

                1 Ua maluhia anei oe?
                2 Ua maluhia anei kau kane?
                3 Ua maluhia anei ke keiki?
                1 Ua maluhia anei oe? E ka makuwahine Hawaii nei, Ua maluhia anei oe?
                Ua komo anei oe i loko o ke aupuni o ka Haku?
                Ua noho maopopo anei oe iloko o kona malu?
                Ua launa pono aku anei kou naau i ke Akua?
                Ua hoawi maoli aku anei oe i kou uhane ia ia? Ua kalaia anei kou hewa ma o Iesu la?
                A ua hoomaluhia mai oe e ka Uhane Hemolele?
                Ina aole pela kou malu ana, oia kau mea nui e imi ikaika aku ai nou iho.
                E imi me ka pule, me ka mihi, me ka noonoo, me ka heluhelu i ka palapala, a ka hoolohe i ka leo o ka pono, a me ka hana maikai me ka ikaika, a me ka hilinai ia Iesu, i ko kakou kokua nui, e ola'i, a malaila e malu ai.

2 Ua maluhia anei kau kane?

                E ka wahine Hawaii nei, Ua maluhia anei kau kane? Ua maluhia anei kona kino, i kau hana pono ana? Ua maluhia anei kona hale au i hooponopono ai? Ua maluhia anei kona waiwai au e malama ai? Ua maluhia anei kona uhane au i pule aku ai i ke Akua?
                E nana pono oe, aole anei i kolohe iki ia 'ku kau kane? Aole, anei i nukuia'ku, aole anei i hoinoia'ku. Aole anei i kaumaha kona naau i kou hoonaaupo ana? Aole anei i popilikia iki kona kino i kau ana hewa ana? Aole anei i haunaele kona hale, a hemahema i kou malama ole ana?
                E aloha oe i kau kane ponoi, i nui mai kou ikaika i ka hoomalu i kona noho ana. E hoolohe ia ia me ka oluolu ma ka pono. E imi ikaika i ka mea e pomaikai io ai kau kane. E hoolakolako i ka hale a e hooponopono, me ke akamai, a me ka lokomaikai a me ka ikaika, a kokua ia ia me ke ahonui. Ua hana ke Akua i ka wahine i kokua pono no kana kane, i kokoolua i pomaikai ai ia. Aka ua lilo kekahi mau wahine i hoowalewale e poino ai na kane. - Aole e pono oe ke hana pela, no ka mea e ninau paha uanei ka Haku ia oe, Ua maluhia anei kau kanei? Heaha la uanei kau e hai aku ai ia ia ke hoopomaikai ole oe i kau kane?
                O kau hana pono ana i kau kane, oia kekahi mea e naauao ai na keiki, a e makaukau ai lakou i ka hana pono me ka ikaika mamuli o ka makuwahine. Oia no kekahi mea e pomaikai ai kou kino iho, a me kou uhane. Malaila e mahaloia ai oe e kau kane, a malaila e pomaikai pu ai olua. Na ke Akua no e hoomaikai mai ia oe ke malama oe i kana kauoha.
                1 Pet. iii. 1 - 6; Epeso v. 22-24; Kol. iii. 18; 1 Tim. ii. 9 - 12; v. 14; Tito ii. 1 - 5.

3 Ua maluhia anei ke keiki?

                E ka makuwahine Hawaii nei, ua maluhia anei ke keiki? Ua maluhia anei ke keiki au i hanau ai? Ua maluhia anei ke keiki au i hanai ai? Ua malama pono ia anei ia e oe? Ua pomaikai anei ia ia oe? Ua hanai pono anei oe ia ia? Ua hoaahu pono anei oe ia ia? Ua alakai pono anei oe ia ia? Ua imi ikaika anei oe me ke aloha, a me ka noonoo, a me ka manaka ole i na mea e malu ai ke kino o ke keiki, a e pomaikai ai hoi kona uhane. Ina i ole pomaikai kau keiki, heaha la ka mea i ole ai? Aole anei he naau aloha kou? Aole ou maka e kiai ai? Aole ou lima ikaika e lawelawe ai? Aole hiki ia oe ke pule i ka Haku e kokua mai? Aole anei i kokua pono kau kane mamuli o keia hana nui o ka hoomalu a me ke alakai pono i ke keiki? Ina aole akamai ke kane, e ao aku oe ia ia ma kau hana pono ana, a me kou hoonaauao ana, a me kou ahonui ana. Ina aole oe i ike i kou mea e pono ai aole hoi makaukau i ka hana, e ninau i na kumu, a e hoolohe ia lakou, a e nana hoi i ka lakou hana ana, malaila paha e pono iki ai. Aka o ke aloha o ka naau o ka makuwahine i kana keiki, a me ka makau i ke Akua, oia ke kumu pono e naauao ai oe i ka malama pono i kau keiki.
                Ina ua manao oe ua haawi mai ka Haku ia oe i keiki nau, a ua kauoha maopopo mai ia, oe e hanai oe ia ia nona, a manao oe he waiwai makamae keia, a o ka uhane o ke keiki ka mea nui loa, a weliweli oe i ka hana hewa ana, alaila ikaika oe i ke imi i ka pono, a me ka hoopomaikai i kau keiki. A e paipai no oe i kau kane e imi pu, a e noi aku i na hoahanau e hoike mai i ka mea e hiki ai; a e huli no oe i ka olelo a ke Akua i maopopo ai kona makemake, i kana olelo ana, "E alakai i ke keiki ma ke ala pono e hele ai ia.'' Eia kekahi mea e pono ai, e hele pololei oe i mua o kau keiki, me ka malama ikaika i ke kanawai o ka Haku, pela e lilo ai oe i alakai pono no kau keiki. E hana pono oe i kau kane. E hana pono oe i kau keiki, e hana pono oe i na hoahanau a me na hoalauna; e hana pono oe i ka malihini. E hana pono oe i ka Haku i maopopo kou manaoio, a me kou makau i ke Akua, a me kou makemake i ke ola o ka uhane, alaila lilo oe i kumu maikai na kaa keiki, e pomaikai ai ia. H.B.

NO KA WAIWAI A KA POE I MAKE,

                I ka wa mamua, ina make kekahi alii alaila kiolaia kana waiwai. A pela no ka makaainana. * Kanu pu ia kana waiwai me kona kino. Ke hana nei kekahi poe pela i keia manawa. He mea pono ole ia. Aole makemake hou ke kupapau i ka waiwai. Aole hiki ke malama. He me hewa ka hoomaunauna. Nolaila, e malama kakou i ka waiwai a ka mea i make. Ina he pono kona, e malama kakou i kona pono,-ina he kauoha maikai kona, mai hoopoina kakou. Ina, he lole, e komo no -ina he waiwai e, e malama no me ke aloha. Mai kanu kakou i ka waiwai a ka mea i make.
Lama Hawaii.