Ke Kumu Hawaii, Volume I, Number 12, 15 April 1835 — NO KO DAVIDA PEPEHI ANA IA GOLIA. [ARTICLE+ILLUSTRATION]

NO KO DAVIDA PEPEHI ANA IA GOLIA.

O Golia ka inoa o keia kanaka nui. O Davida hoi keia kanaka uuku. He kanaka koa no o Golia no ka poe o ko Pilisetia. Ua hele mai la ko Pilisetia e kaua mai i ka Iseraela. Ku ae la lakou maluna o kekahi puu, a ku ae la hoi ka Iseraela ma kekahi puu a he awaawa mawaena. A puka mai la o Golia a aa mai la i ka Iseraela a nonoi mai la i hoa kaua nona. He kanaka ikaika loa no o Golia a he kanaka haaheo no hoi. Ua weliweli loa no ka Isaraela a pau ia ia, a holo lakou. mai kona maka aku. Aka aole i makau o Davida. Ua hilinai aku o Davida ia lehova. A ua kokua mai o Iehova ia ia e kaua aku ia Golia. Ua lawe o Davida i na ala elima a me kana maa. Ua hookokoke aku la ia ia Golia. Maa aku la ia i kekahi ala a pa aku la ia i ka lae o Golia. Komo iho la ka ala iloko o kona poo. A haule iho la o Golia ma ka honua ilalo ke alo. Alaila holo aku la o Davida a unuhi ae la i ka pahikaua nui a Golia mai loko mai o kona wahi, a oki aku la i kona poo. Lawe o Davida i ke poo o Golia a haawi aku ia Saula, ke alii o ka Iseraela. Ua paulele aku o Davida ia Iehova, a nana no ia i hoolanakila maluna o Golia. E hilinai aku hoi kakou i ke Akua a e hoolanakila mai ia ia kakou maluna o ka hewa, ko kakou enemi nui.