Ke Kumu Hawaii, Volume I, Number 11, 1 April 1835 — Page 85

l835.) KUMU HAWAII. 85

i ka make e like me ka make ana o ko Iesu kino, alaila maopopo no hoi ia kakou ko ola pu ana me ia.
                9 He maopopo ae hoi ia kakou ko Iesu hoalaia mai, a me kona ola mau ana. Ua hala kona make, aole ia ia e make hou, aole e hoi ia i ka make; pela hoi e pono ai ke kanaka manaoio i haalele maoli i ka hewa, ua hala kona noho pio ana i ka hewa, aole pono ke hoi ia malaila.
 

HE MAU NINAU.

l7 Lanakila ka make maluna owai?
Nawai i hoole a i keakea iho ia make?
Owai ka poe ana i hoolanakila ai?
Lanakila lakou ihea?
18 Hoomaka o Adamu i hewa no ka poe hea?
Heaha ka mea a Iesu i hoomakaukau ai?
No ka poe hea?
19 Heaha ka hoolohe ole o ka mea hookahi?
Owai ka poe i lilo ma ia hope mai i poe hewa?
Mamuli owai i hele hewa ai lakou?
E hiki ia wai ke hooponoia ma ko Iesu hoolohe?
Heha ko Iesu hoolohe?
Heaha ka hope o ka poe i ae mamuli o Adamu a hele malaila ma ka mihi ole?
O ka poe i ae mamuli o Kristo a hele malaila me ka mihi io, heaha ko lakou hope?
20 A haawiia ke kanawai, pehea iho la ka hewa?
Ka hewa owai? Pehea la i nui ai, a i maopopo ai ko kanaka hewa?
Mahea la i nui loa ai ka lokomaikai o ke Akua?
21 Lanakila ke aha maluna o kanaka?
Ma ke aha la i lanakila ai?
Lanakila ke aloha o Iesu ma ke aha la?
vi. 1 Heaha ke kumu o keia mokuna?
2 He mea pono anei ke hana ma ka hewa i akaka ka lokomaikai o ke Akua?
Owai ka poe hiki pono eke noho hou ma ka hewa?
3 O ka poe i bapetisoia, ua hooliloia lakou ia wai?
Owai ka poe pu me Iesu ma kona make?
He pono ke haalele lakou i ke aha?
4 Owai ka poe i kana pu ia me Iesu?
Mahea la i kanuia'i lakou? ua nalo ke aha?
He pono no lakou ke hele mahea?
E like me ke aha la?
5 Pehea la e hui ai kakou me Iesu ma ka make pu?
Alaila e hui hou ma ia mahea?
6 Heaha ko kakou kanaka kahiko, a me ke kino lawehala?
O ke kau na o ia mea me Iesu ma ke kea, heaha ia?
Ua pepehiia a make ko kakou kuko hewa i aha la?
7 O ke kanaka i make, ua pau ke aha la?
Pehea ka mea i haalele io i ka hewa?
8 A i make ko kakou makemake ma ka hewa, e like me ka make o ko Iesu kino, e ola kakou me wai?
9 Ua hoalaia owai e make hou ole?
E hoi hou ole kakou i ke aha?
 

HELU 17.
MOKUNA 6. - PAUKU 10-23.
Aperila 20 - Mei 3.

                10 No ka mea, o kona make ana, hookahi wale no kona make ana no ka hewa, a o kona ola ana ke ola nei no ia no ke Akua.
                11 Pela no hoi oukou e manao ai ia oukou iho ua make no ka hewa, e ola ana no hoi no ke Akua, ma o Kristo Iesu ia ko kakou Haku.
                12 Mai noho a lanakila mai ka hewa iloko o ko oukou kino make, i hoolohe oukou ia ia, ma kona kuko.
                13 Aole hoi oukou e haawi i ko oukou mau lala i ka hewa i mau mea e lawehala, aka, e haawi aku ia oukou iho i ke Akua, a me ko oukou mau lala i mau mea e hana pono ai, me he poe ola la mai waena mai o ka poe make.
                14 Oia, aole e lanakila ka hewa maluna o oukou, no ka mea, aole oukou malalo o ke kanawai aka malalo no oukou o ka lokomaikai.
                15 Heaha la hoi? E hana hewa anei kakou no ka mea aole kakou malalo o ke kanawai aka malalo no o ka lokomaikai?
                16 Aole loa. Aole anei oukou i ike, ina e haawi aku oukou ia oukou i kekahi i mau kauwa, e malama ai, he poe kauwa oukou na ka mea a oukou i malama ai, o ka hewa paha e make ai, a o ka pono paha e hoaponoia'i?
                17 E hoomaikaiia'ku ke Akua, no ka mea, he poe auwa oukou mamua na ka hewa, aka ua lilo ae nei i poe hoolohe ma ka naau i ka olelo ao, i aoia 'ku ai oukou.
                18 A ua hookaawaleia'e oukou mai ka hewa ae, a ua lilo ae nei i poe hoolohe i ka pono.
                19 (Ke olelo nei au me na hua olelo a kanaka, no ka nawaliwali ana i ko oukou kino.) Nolaila me ko oukou haawi ana i ko oukou mau lala i mau kauwa na ka paumaele a me ka hewa e lawehala ai, pela hoi ano, e haawi aku i ko oukou mau lala i mau kauwa na ka pono e hemolele ai.
                20 No ka mea i ko oukou kauwa ana na ka hewa, ua kaawale oukou i ka pono.
                21 Heaha hoi ka hua i loaa ia oukou ia manawa o na mea a oukou e hilahila nei? no ka mea, o ka hope o ia mau mea, he make ia.
                22 Ano hoi, ua hookaawaleia'e oukou mai ka hewa ae a lilo hoi i mau kauwa na ke Akua, ua loaa ia oukou ka oukou hua i ka pono, a o ka hope, he ola mau loa.
                23 No ka mea, o kauku no ka hewa he make ia; aka o ka haawina o ke Akua, o ke ola mau loa ia, ma o Iesu Kristo la o ko kakou Haku.
 

KA HOOMOAKAKA ANA.

                vi. 10. Hookahi wale no ko Iesu make ana. Make no ia no ka hewa i emi ai, a i pau ai ia. A ke ola nei no ia no ke Akua e hoonaniia'i kona inoa, a i malu pono hoi kona aupuni.
                11 E lilo oukou i ko oukou manao iho i poe malama ole i ka hewa, ua make, ua pau ko oukou hana hewa ana, ua make ko oukou noho ana mamuli o ka hewa, e ola ana hoi mamuli o ke Akua e hoonaniia'i kona inoa, a i hookoia kena makemake.
                12 Aole pono ke hooalii hou ka hewa maluna o oukou, aole hoi pono ke hoolohe hou mamuli o na huhu hewa o ke kino make ke kino e hoi koke ai i ka lepo.
                13 Mai noho a hoolilo i na lala o ko oukou au kino i kauwa na ka hewa i hana hou ma ka hewa, e hoolilo ia oukou iho i mau kauwa na ke Akua e hana mau ma ka pono.
                14. Oia, ke haawi nei no oukou ia oukou iho i ke Akua, alaila, aole hoi e alii mai ka hewa maluna o oukou, no ka mea, e noho ana oukou maluna o Kristo me ka okomaikaiia mai a me ke kokuaia mai e ia, e lanakila ai oukou, aole ma ke kanawai wale no me ke kokua ole ia mai, ma kahi e pio ai na kanaka nawaliwali.
                15 Heaha hoi ko laila, he pono anei ke hana kakou ma ka hewa no ka noho ana malalo o ka lokomaikai, no ke kokuaia mai ma ka pono, a no ka make ole i ke kanawai? Nolaila anei e hana hewa hou ai?
                16 Aole loa ia he pono. O ka oukou mea e hoolohe ai a e malama ai, o kana mau kauwa maoli no oukou, ina na ka hewa ko oukou hookauwa ana, he make ka hope o ka malama ana malaila, ina na ke pono, ka hookauwa ana, o ka hoaponoia a me ke ola ka hope.
                17, 18 O ko Paulo manao e hoomaikai aku i ke Akua no ka mea ua lilo na kauwa a ka hewa, i poe malama i ka pono me ka oiaio o ka naau, e hoolohe ana i ka olelo pololei a ke Akua i haiia'ku ia lakou; ua kaawale aku ka haku hooluhi, o ka hewa, a lilo lakou i mau kauwa na ka pono.
                19 (Me he mau, olelo la i maopopo i kanaka i olelo ai o Paulo i akaka ia lakou ka manao o ke Akua, no ka mea, o ke kino ka mea i ikaika ole ai lakou i ka hoomaopopo.) Ua hoolilo lakou i ko lakou mau lala mamuli o ka hewa e make ai, he pono ke hoolilo pela mamuli o ka pono e maikai ia ai.
                20 I ka hoolohe ana i ka hewa, malaila ka manao, aole o lakou pono, aole pili i ka pono, ua kaawale no ia.