Ke Kumu Hawaii, Volume I, Number 11, 1 April 1835 — Page 83

1835.) KUMU HAWAII. 83

beta ia Iesu Kristo, ma ka hale o kona mau makua. O keia Elisabeta aloha, o keia kaikamahine aloha."
                "Aole, e ka makuwahine aloha, aka e olelo ae oe, ua Iesu Kristo i lawe mai i ka olua kaikamahine, e hoike aku ia olua i na mea a Kristo i hana mai iloko o kona uhane, a o kona manao hoi iloko o olua kekahi."
                Alaila ninau aku la au ia ia. "He aha kau mea oluolu, e oluolu nei i ka hookokoke ana aku i ka make?"
                "E! o ka'u ike ana aku ia Kristo, oia wale no. Aia nana iho la au ia'u iho, ua nui na mea hewa, a me na mea nawaliwali, a me na mea pono ole: o lakou no ke hoopouli mai i ka maka o Kristo, oia ka'u e makemake e ike ma ko'u naau; aka i kuu nana'ku i ke Ola, oia ka mea aloha wale, aole akahi mea pouli iki ma kona maka; aole no ka mea hookahi e uhiia maluna o kona pono a pau."
                "Ke manao nei au ma kona hele ana mai ma ke kino, a oia ka mea hooluolu ia,u i ko ke kino eha ana, no ka mea, oia no kekahi i eha ai, aole na'u wale. Ke noonoo iho la au i kona hoowalewaleia mai, a manao mau e hiki no ia ia e kokua mai ai i ka hoowalewale ana. Alaila manao aku la au i kona kea, a ua aoia mai au e lawe i ko'u iho. Ke manao nei au i kona make, a makemake loa au e make i ka hewa, i lanakila ole mai ka hewa maluna o'u. I kekahi manawa e manao ana au i kona alahou ana, a ike au ua haawi mai ia ia'u kekahi mea iloko olaila, no ka mea ua ike au i kuu paulele ana i na mea oluna. Eia kou mea e oluolu loa ai i ka manao ana aku ia ia i kona noho ana ma ka lima akau o ka Makua e hoike ana i ka'u, a e hoolilo ana i ka'u pule nawaliwali mea pono no'u iho, a no na hoahanau aloha o'u paha kekahi.
                "No kona ahonui, oia no ko'u manao i ka maikai o ko'u Ola; nolaila makemake au e hooikaika i ka malama aku ia ia, ma na mea e hiki ia'u, e hoolilo ia'u iho nona, a e hana aku wau i ka'u mau mea pono, ma kahi ana i manao ai e hoonoho mai ai ia'u.
                "Ina aole ana i paipai mai ia'u, ina no ua maole, hina pinepine au. Ke ike nei au, he mea ole wau, ke pili ole mai oia ia'u. Oia no ka mea a pau, oia hoi ko loko o na mea a pau?
                "Ma kahi e hiki ai ia'u e waiho aku i kuu kaumaha maluna ona, malaila ka loaa ana mai ia'u ka ikaika e hana aku i kona makemake. E haawi mai oia ia'u i ka lokomaikai e hilinai maluna ona, a hiki aku i ka hopena. Aole no au makau i ka make, no ka mea, ke manao nei au, ua lawe aku oia i ka eha o ka make. Ea! o ke hauoli ana o kela wahi aku! E ke kumu, e hai mai oe ia'u, ina paha he hewa ka'u. Ke manao nei au he mea hoopunipuni ole keia no'u. Ma ka lako nui wale o Kristo ko'u manaolana, he makau wau i ka nana aku i na mea'e ae; aia ninau iho la au i kuu naau i kekahi mea makau wau e ae aku ia ia, no ka mea, he apiki kona, ua hoopunipuni nui oia ia'u; aka i ko'u ninau ana'ku ia Kristo nana no e hai mai ia'u i ka olelo hooikaika a hoolulu ia'u, aole no kahi kaawale no ke kanalua i kona mana, a me kona makemake e hoola'i. Eia no wau ina kona mau lima, o ko'u makemake malaila au e noho ai. O ko'u manao aole ana e waiho wale ia'u; aka nana no e hooko pono aku i ka'u. Ua aloha oia ia'u, a haawi wale mai oia ia ia iho no'u, ke manao nei, au he mea luli ole na lokomaikai, a me ke koho ana mai a ke Akua. Iloko o keia manaolana a'u e ola nei, a o ko'u makemake hoi iloko o keia manaolana e make ai au."
                I kona olelo ana i keia mau mea nana ae la au a manao iho la, "Oiaio no la o ka hale wale no keia o ke Akua o ka ipuka hoi keia no ka lani."
                Maluna iho o kona mau maka maimai, ua ikea ka ae oluolu ana, ka manao lanakila, ka haahaa hookamani ole, a me ka manaolana oiaio, na mea i hoomaopopo ai i ke ano o kona naau oloko.
                He wahi olelo uuku aloha koe a makou, pule iho la au, a hoi mai nei i ko'u wahi.
 

E nana i ka aoao 76.
HE OLELO AO NO NA KUMU.

                A pau na olelo i ka heluheluia e na haumana a hiki ma keia wahi, alaila e pono ia lakou ke huli ma ka olelo mua a e heluhelu hou mai no. A i ka lakou heluhelu hou ana i keia mau olelo, e makaala oukou i na hewa a'u i hoike pinepine aku ai ia oukou. Mai ae iki aku oukou i na haumana e heluhelu me ka hoi hope a me ke koloa ana o ka leo ma na hua, a e hooponopono mau no oukou me ka hoonalowale ole i kela mea pono ole keia mea pono ole a'u i ao aku ai ia oukou.
                A pau na olelo i ka heluhelu hou ia a hiki ma keia wahi, alaila e pono no i na haumana ke heluhelu mai keia wahi aku a hiki i ka pau ana o keia palapala.
                A i ka heluhelu ana, penei no oukou e hana'i.
                E heluhelu kekahi haumana i ka olelo malalo iho o ke kii me ka manao no i ke ano a me ka nana aku hoi i ua kii la. A i kana heluhelu ana e pono no i ke kumu ke kuhikuhi ia ia i ka pili ana o ka olelo i ke kii. Pela no e hana'i me kela haumana keia haumana. A pau ia, alaila e mele kikokikoi aku ke kumu ia lakou a pau e like no me na ninau i paiia malalo iho o ke kaha.
 

HE MOKU KIA KAHI.

                He wahi moku uuku no keia. Pono no nae ia ma keia mau kai ewalu mai Hawaii a Niihau. O ka waa wale no ka mea holo ma keia mau kowa i ka wa mamua. Nui no na waa i puhiia e ka makani a lilo. Nui hoi ka poe kanaka i poho ilalo a nalo wale iloko o ke kai.
 

                He moku nui anei keia? he moku uuku paha? Pono no nae ia mahea? Heaha ka mea holo ma keia mau kowa i ka wa mamua? Pehea iho la na waa he nui loa ia manawa? Pehea hoi na kanaka maluna iho?
 

HE KANAKA MOLOWA.

                E hele oe i ka nonanona, e ke kanaka molowa; e noonoo i kona mau aoao, a e hoonaauao. Aole ona mea nana e alakai, aole luna, aole alii. Hoomakaukau no nae ia i kana ai i e kau, a i ka wa e oo ai, hoiliilii no. Pehea ka loihi o kona hiamoe ana, e ka molowa, ahea oe ala ae, mai kou hiamoe ana.