Ke Kumu Hawaii, Volume I, Number 11, 1 April 1835 — Page 81

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 1. HONOLULU, OAHU, APERILA 1, 1835. Pepa 11.

KA HULI ANA O KE KAIKAMAHINE A KA MEA HANAI BIPI.

                "O ka hoomanao ana i ka poe pono he mea pomaikai no ia." - Solomona x. 7.
 

MOKUNA 4.

                Ua mahuahua loa ka mai o ke kaikamahine a ka mea hanai bipi. O ka iwi ka mai i pau koke ai ka ikaika o kona kino, i kekahi la loaa iho ia'u kana palapala uuku peneia;—
 
"E KE KUMU, -
                "He hauoli loa au, ke pono ia oe, e hele mai e ike mai ia'u ka me nawaliwali, pono ole. Ua kokoke pau ke kahekahe ana o ke one o kuu wahi ipu wati, aka ke manao nei au, ua ike au ia Kristo he mea maikai no ko'u uhane. Ua hoopomaikaiia mai au mamua i kau olelo ana, a eia hoi ka manawa e makemake loa au ia olelo. Ke aloha aku nei ko'u mau makua ia oe.
"NA ELISABETA W - E."
 

                Ua ae koke iho la au e hele ia ahiahi, a i kuu hiki ana aku ma ka hale o ka mea hanai bipi, hele mai kana wahine e wehe ae i ka puka. E helelei ana ka waimaka ma kona maka, a luliluli ae la kona poo, no ka pono ole. Ua piha hoi kona naau. Aole ia e hiki i ka olela mai. Paa aku la au i kona lima, a i iho la.
                "E ka makamaka maikai, ua pono no, na ka Haku mai keia, ia ia no ka ike a me ke ahonui."
                "E ku kumu e! o kuu kaikamahine! o Elisabeta, ua nawaliwali loa ia. Pehea a'u e pono ai ke ole ia? O kuu manao i manao ai owau no ko maua mea e hele e, a iloko o ka lua kupapau, aka" _
                "Aka, ua maopopo no i ka Haku, ka mea pono ia oe, mamua o kou make ana, e ike aku ai oe i kau kaikamahine e holo e ana i kona wahi maikai i ka lani. Aole anei he maikai oia?"
                "Auwe! e ke kumu, ua kahiko loa au, ua nawaliwali hoi, a he kaikamahine aloha loa keia. O ko'u kookoo keia, a me ko'u mea e hilinai ai i keia kahiko loa ana a'u."
                E noho ana no o Elisabeta ma kahi aoao o ke kapuahi iluna o ka noho, ua paipaiia i na uluna.
                I mai la ia "E ke kumu, he lokomaikai io keia, o kou hele koke mai i ka'u kii ana'ku ia oe. Ua ike mai oe ia'u e hele liilii ana i kela la i keia la, aole no i loihi i o ko'u noho ana maanei. O kuu kino, a me kuu naau ua nawaliwali: aka o ke Akua no ka ikaika o kuu naau nawaliwali. A o ko'u manao, oia no kuu waiwai, a i ka wa pau ole."
                Aole no ka leo ikaika i olelo ia keia olelo a'u e kakau nei, no kona kunu, a me kona paupau aho ana.
                Ua noho iho au mawaena mai o ke kaikamahine, laua o ka makuwahine kau pono aku la ka makuwahine i kona mau maka maluna o ke kaikamahine i ka maua olelo ana, a i aku au ia Elisabeta,
                "E ke manao nei au ua maopopo ia oe ka noho pu ana o ke Akua me oe, a e waiho ana'ku oe i kau mau mea, a pau maluna ona, ka mea "Oia pu me oe mamua, nana no oe i malama i na wahi a pau au i hele ai,'' a nana hoi oe e lawe a i ka wahi maikai kahi o ka hauoli io, kahi e alii mau ana na uhane maikai.''
                "E ke kumu, ke manao nei au pela. Mamua aku nei, ua pouli iki mai kuu naau; aka ke manao nei au no kuu nawaliwali nui no ia, a no ka eha nui o kuu kino, no ka hoino mai paha o ka enemi kekahi. O ko'u makemake no e hoike mai ia'u he aloha ole Kristo no'u, a he hoopunipuni wale iho ka'u ia'u iho."
                "Ua ae aku anei oe i kana mea i o mai maloko ou? E hiki anei ia oe e kanalua iwaena mai o na mea lokomaikai he nui loa?"
                "Aole, o ka nui o o'u noho ana e noho nei, ua hiki no ia'u ka manao mahope o kona aloha. Aole a'u makemake e mahuahuaia'i ko'u lawehala ana i ka hoole ana aku i kana hana maikai ana mai i kuu uhane. O ko'u makemake no e hoikea'ku ia no kona maikai, a me kona nani."
                "Pehea kou manao e noho nei ia oe iho i kela noho ana au mamua ana i hea mai ai ia oe i kona lokomaikai?"
                "E, ke kaikamahine hookano au, ua manao ole, ua makemaka au i ke ao nei a me na mea o keia ao. Ua noho aku la au mahope o na mea malama i ko keia ao. Aole i loaa ia'u ka pomaikai o ka noho ana'ku mahope o ka poe i malama i ka pule. O na uhane o ka poe i noho mai, aole i manaoia e na mea hale, ma ko'u wahi i noho ai. I hookahi no o ko'u hele ana i ka hale pule i ka Sabati hookahi. No ka ike wale aku no, a no ka ikea mai, aole no ka pule; aole no ka hoolohe aku i ka olelo a ke Akua. Ua manao iho la au, he pono no ko'u, e ola ana no. Ua wahawaha au, a ua akaaka au i ka poe malama i ka pono. Ua poeleele loa au. Aole au ike iki i ka aoao o ke ola; aole au i pule iki i ke Akua; aole au manao iki i ka hewa nui e kau ana maluna o ka poe pule ole. O ko'u makemake no e manaoia mai e na mea hale, he wahine makaukau wau no na hana; ina paha i hoomaikaiia mai'au, kiekie loa iho la kuu wahi naau. No keia ao maalea, ua malama iki no au iwaho ma ke kino, ma ko'u noho ana: aka aole au i ike iki i ke Akua, me Kristo. Ua waiho wale au i kuu uhane a ina paha au i make ai ilaila, ua loaa io ia'u ko'u wahi, iloko o ke ahi pio ole."
                "O ka olelo au e manao nei i hoomaikaiia mai ia e ke Akua i kou huli ana. Ehia makahiki mamua aku nei au i lohe ai ia olelo."
                "I elima paha makahiki.''
                "Pehea la?"
                "O kekahi kumu, e hele ana ia ma kahi loihi o ka honua, i kumu na kekahi poe, ua kokoke ia e holo, aole e hiki ka moku no ka makani nui mamua mai, a ua olelo ia e pule ana oia ma ka hale pule o mea la. Nui ka poe i olelo mai ia'u, aole e hele, o hoohuli mai oia i kuu poo, no ka mea, he manao e wale no kona, wahi a lakou. Aka no ka makemake e ike wale aku, a i ikea mai iloko o ko'u wahi lole hou, ka mea ia i haaheo ai ko'u naau, manao iho la au e noi aku i kuu mea hale e hele au. E! oia iho la no la, aohe mea e iloko o ko'u naau. Oia manao lapuwale no, a me ka nana wale aku: aka na ke Akua no ka manao e hoonaniia'i ia iloko olaila.