Ke Kumu Hawaii, Volume I, Number 10, 18 March 1835 — Page 80
80 KUMU HAWAII. (MARAKI,
KAHI MELE.
O ke kokua no ka poe pilikia.
E Iehova ke Akua
O ke ao hoano mau,
Mai ko luakini iluna,
E kokua ia makou;
E hoolohe i ka pule
A ka poe ohua ou ;
Hoakea i na haipule;
Ku mai, e ola'i lakou.
Ke kii nei ko makou hewa
I ka make no makou;
A hihia, - pilikia –
Ehaeha ka naau –
Oi aku kou aloha;
Mano ko Iesu maikai;
Aia hoi ma kona koko,
Makou nei e malu ai.
E uhi mai kela aloha
I na hala o makou;
Aia no maluna ona
Ka aie o keia ao
Nona ke aloha io;
Nou ko makou mau naau;
Ia ia e ola'i na pio,
I pomaikai mau makou. H. E.
Koloa, 26, Ian. 1835.
Aloha oukou e kuu hoahanau; Ua hiki mai nei maua i Koloa, i ka la 31 o Dekemaba. Ua holo mai maua a me ka maua mau keiki, a me ka nui o ko maua ukana maluna o ke kaulua o Aberahama. E kolu hora i ka holo ana mai, mai Waimea mai, a pae iuka makou ma Koloa nei. He la malie no ia; aohe pulu makou a me ka ukana.
A hiki mai maua, aohe paku oloko o ka hale; aole hoi i kau na puka komo a pau, a me na puka makani. A luhiluhi au ia mau la, i ka hooponopno i ka hale. Elua no maua maanei, a loohia i ka mai hikoko ka maua keiki uuku, o Kali. Ua ikaika kona mai a anahulu, a ma ia hope ua akaku mai: a i keia wa ua oluolu ua keiki la.
A owau a me na kamalii a maua, ua makole makou, aohe nae mahuahua nui ia mai.
Ua maha hoi na kamalii; owau wale no ka makole o makou i keia manawa.
Ua mau no hoi kuu mai kahiko, aole nae i like kona ikaika, me ia manawa a kakou i noho pu ai ma Honolulu, i ka makahiki hala aku nei. Aka, aohe ikaika au e hai aku i ka olelomaikai.
I ka Sabati alua o keia malama, ua mahuahua ka poe i halawai ai, a hai aku au me ka leo kiekie iki, a pau ka pule luhiluhi loa au; a ma ia hope mai, ua oi iki aku kuu mai.
O Koloa nei, he aina maikai; he momona; ua omaomao i kela kau keia kau; a ua kupu nui kela mea keia mea i kanu ai. He wahi nani no hoi. Nani na kula; aohe nui ka nahelehele; paapu i ka weuweu uliuli. Nani na kuahiwi, me na laau i ulu ai malaila. Momona no hoi ka wai ; a akaka mau ; ua nui no hoi. Eia no maua kokoke ma Maulili ma ka aoao komohana.
Ua launa mai na 'lii, a me na kanaka o keia ohana; a ua oluolu. Makemake no hoi lakou i ka ke Akua olelo; (ua kokoke pau kuu mau Samuela i ke kuai aku.)
Aka aole lakou i hana nui i ke ao palapala i na malama eono hala aku nei ; no ka pilikia i ka hana a ke Alii; (ka hana hale pule ma Waimea kekahi.) I ka hebedoma hala aku nei, hoomaka lakou e hana i halepule no makou iho. A ua makaukau ka nui o na laau. Aka ua waiho lakou ia hana e malama i ke Alii.
Ua halawai makou, e hoomana i ke Akua, i kela ahiahi, keia ahiahi, ma ka lima o ka hora. Aka hemahema makou, i ka nele i ka Uhane o ke Akua. Aole akaka kona noho pu ana me makou. Nolaila kakaikahi ka poe i halawai e hoomana i ke Akua; aole hoi maopopo ko lakou pomaikai i ka lohe ana i kana olelo. Pono e nonoi ikaika aku oukou i ke Akua e kokua mai ia maua, e kona Uhane mana. I ae mai oia ma keia wahi, alaila hiki loa kana hana nui ia maua.
O ko oukou hoahanau ma o Kristo, P. J. GULIKA.
NO KA POWA MALU MA WAIKIKI.
Ua loaa mai nei i na'lii, o Kailiuli ka mea i pepehi i kana wahine ma Waikiki. Nana iho no i hoi mai i ka la 2 o Maraki, a laweia'ku ia e kanaka ma ka pa, malaila oia e kali nei i ka pili ana o ke kanawai.
Honolulu, Feb. - Holo mai ka moku o kohola o Stonington ka inoa, o Lawton ke alii, no Nu Ladana mai, 16 1-2 mau malama ka holo ana, 450 barela aila i loaa.
Maraki 11. Commodore Rogers, Taber, Nu Bedefoda, 22 mau malama. 1,600 barela.
Maraki 14. Martha, Riddell, Hudesona, 17 1-2 mau malama, 500 barela.
Ua paiia KE KUMU HAWAII ma ka mea paipalapala a na Misionari, HONOLULU, elua hebedoma hookahi pepa, o Wenede ka la e pai iho ai.
Eia ke kuai ana, HOOKAHI MAKAHIKI $1.00, a na mea e lawe i ka Pepa a pau.
Oahu, Mission Press. - R. TINKER, Editor.
E. H. ROGERS, Printer.