Ke Kumu Hawaii, Volume I, Number 10, 18 March 1835 — Page 75

1835.) KUMU HAWAII. 75

leale ana ma ke kau wahi, a he pohu hoi ma ke kau wahi. Ma kekahi aoao, he moku e holo hookahi ana, a ma kekahi aoao he moana neoneo wale no. He nui na aina liilii hoi ka'u i ike ai he kinikini, aole i hiki ia'u ke helu. Ua kikokiko wale ia ka moana ia lakou ma ka aoao komohana. Ina e nana oukou i ka palapala aina, e ike hoi oukou i ko lakou mau wahi a me ko lakou nui. O Iapana ka aina moku nui loa o ia moana, e kokoke ana ia me Kina.
                Hiki wawe aku la maua i Kina. He aina paapu ia i kanaka. He mau kulanakauhale nui ko lakou, a ua puni i na papohaku kiekie loa, i komo ole ai na malihini o na aina e. He poe kanaka launa ole hoi lakou, he poe hoomana kii. Ua aumoe no i ka hora a maua i haalele ai ia Bosetona, a he mau minute wale no i hala i kuu manao, a hiki aku i Pekina, i ke kulanakauhale alii o Kina. A hiki ilaila, ua awakea ma ia aoao.
 

O na Pake e ohi ana i ke Ti.

                He kulanakauhale nui loa o Pekina; a olioli au i kuu hiki ana ilaila e ike. Lele iho la maua a ku iho ma ka honua mawaena konu o ke kulanakauhale. He nui loa na kanaka ma na alanui e hele ana i kela aoao a i keia aoao. Aole hoi au i hiki ke nana iloko o ko lakou mau hale, no ka mea, aole puka komo, aole hoi puka makani ma ke alo o na hale o lakou.
                I ka ike mua ana mai ia maua holo kiki aku la lakou a pau i ka makau a waiho neoneo wale ia ke alanui ma kuu wahi i ku ai. Aohe liuliu hoi, a hoi hou mai la lakou me na pahikaua a me na ihe, e manao ana e pepehi ia'u. Alaila lele hou ae la maua iluna, a pakele aku la.
                Hoi hou mai la maua maluna o Asia e makai ia mau aina. Ike iho la au ia Hinedu, me Peresia, a me
 

Huakai hele ma Asia.

                Arabia ka aina waoakua. A hala hope ke Kaiula, alaila ike iho la ia Aferika. He aina kanaka eleele, he negero wale no malaila. Huli ae la maua i ke kukulu akau, a lele aku la maluna o ke Kaiwaenahonua, a ike iho la na aina o Europa. Lele ae la maua maluna o Tureke, o Geremania, o Ferani, a o Beritania. He aina moku o Beritania; ua puni i ka moana Atelanita.
                Lele aku hoi maua maluna o Nutelani, o Denemaka a o Norewai, alaila huli ae la e hoi mai maluna o ka moana Atelanita, i ka hoi ana mai i Amerika. Ike aku la au i kekahi aina moku nui ma ka aoao akau o ka Atelanika. Ninau aku la au ia ke ohokui,
                "Heaha ia aina?"
                I mai la kela, "O Ainahau."
                I aku la au, "E haele kaua ilaila, e ike i ka luapele nui o Hekela ma ia aina."
                He kuahiwi o ma Ainahau, a he luapele nui ko laila e luai ana i ke ahi a me ka pohaku hehee ma kona waha, a ua holo ka pohaku wela hehee ilalo ma kona mau aoao e like me ka muliwai a hiki i ke kai. Lele aku la maua e ike. Haalulu mai la ia me ka poha nui ana, e like me ka hekili. A pii ae la kona punohu, a hui aku ia me ke ao maluna. Lele aku la hoi kona ahi iluna a haule iho ma kela aoao a keia aoao.
                Holo maua a kokoke ma ia wahi makau. Lele mai la ke ahi, a wela koke iho la kuu ohokui. Alaila lele iho la ke ohokui mailuna iho o kuu poo. Maluna pono no maua o ua lua ahi la. Haule iho ke ohokui, ma ka waha o ka lua pele, a haule pu iho la hoi au ma hope ona. Manao iho la au ua make. Hooho aku la no au me ka leo nui, a hooala ae la ia'u iho i kuu hiamoe ana. He hooho io no ko'u, oia kuu mea i ala ai. Aka, ua wela no kuu ohokui. Kaili ae la au ia ia mai ke poo iho, hoolei ilalo, a hehi iho la maluna e kinai i ke ahi. Ua wela ia i ke kukui e kau ana ma ka papa me au. Kinai no au i ke ahi, aka, ua pau kona maikai, eia no ia, ua pau kekahi aoao i ke ahi."

Lua Pele

                I mai la o Iakobo, "Kahaha! He moeuhane wale no ka ia?"
                I aku la au, Ae. Ua hai aku no wau ia oukou i keia moeuhane i