Ke Kumu Hawaii, Volume I, Number 9, 4 March 1835 — Page 72
72 KUMU HAWAII. (MARAKI.
KAHI MELE.
He leo aloha e hoohuli ana i ka poe hele hewa.
E huli, e kanaka auwana nei,
Nohea la ka ikaika e hele i ka po?
Mahea la ke kino e pomaikai ai,
Ke lilo ka uhane, a make mau no?
E huli, e huli, o make oukou,
Haalele oukou i na aoao kekee;
Na Iesu ke ola i hoomakaukau:
Pehea la na uhane e make mau ai?
Hea mai ka Makua ke kauoha mai,
"E huli, e mihi, e hoopololei,
Owau no ke Akua, he lokomaikai,
No ke aha oukou la e make mau ai?''
Kahea mai la Iesu, "E kii mai oukou,
Na luhi, na eha, na pio, na mai,
Ua lawa ke ola no oukou a pau;
No ke aha oukou la e make mau ai?"
I mai la ka Uhane Maikai ia oukou,
"Ua nele, ua hewa; e hele mai no,
He nui kuu mana e maikai hou ai:
No ke aha oukou la e make mau ai?"
Ano hoi e huli, o poino e,
Kakali ko luna, e huli ano,
E holo ia Iesu, he Mohai maikai-
Paulele i ke Akua, e ola mau no. H.R.
Ez. xxxiii. 11.
Hilo, Ian. 7, l835.
Inehinei ka hoike ma keia wahi. O na kula i aoia ma ka hale kula hookahi wale no ka i hoike. Aia ma ka hale kula kahi i hoike ai.
Hele mai la o Piopio ma, me na hoahanau, a me na haumana o ia mau kula ekolu i aoia malaila, a me kekahi poe e hoi. Aole nui ka poe i hele mai. Mele aku makou i ka Himeni 5, a pule aku la.
Hoike mua makou i ke kula kamalii. Noho aku la lakou maluna o na noho ma ke kala o ka hale. O ka papa i hoike mua he 21 lakou. Hele mai lakou a ku lalani mai la iwaena konu o ka hale. Heluhelu pakahi lakou a pau i na mea i kakauia ma kekahi pepa nui. Ma na hua wale no ka heluhelu ana a kekahi mau mea. Ma na leo, hua elua; me he, ha, lo, lu, nu, mo, ka heluhelu ana a ka nui o lakou. A ma na hua olelo leo elua hoi, me hale, kipi, ka heluhelu ana a kekahi mau mea. A pau ka lakou heluhelu ana, hoi aku ma ko lakou wahi, ma ke kala, hele mai la kekahi papa eono. Heluhelu mai la lakou ma na huaolelo leo ekolu, me 'kohala,' a ma na huaolelo leo eha hoi kekahi, me 'punahele.' Ma na leo, a me na huaolelo wale no, me ko-ha-la, kohala; pu-na-he-le, punahele, ka lakou heluhelu ana. Aole lakou i kapa aku i na hua me neia, k-o-ko-h-a-ha-l-a-la, kohala. A pau lakou i ka hoi hou ma ke kala, hele mai la kekahi papa 7. Heluhelu mai la lakou me ka maopopo ma ka Buke Hua Mua, aoao 25, 26, 27. Eono wale no hebedoma ka hele ana mai o kekahi mau mea o keia papa i ke kula. Nana pono lakou i na hua, a heluhelu mai me ka pololei no. Ua hooikaika nui paha ua mau mea la ma ko lakou hale iho. A pau lakou, hele mai la kekahi papa he 11. Haawi aku la makou ia lakou e heluhelu ma ka Samuela 1.12. A pau ka lakou heluhelu ana, hoike mai la kekahi poe, he 15, ma ka Helu Kamalii. A hoike mai kekahi poe hou, 7, ma ia palapala, mahalo ae la makou i ka hana ana a ka poe kamalii, a hooikaika aku la ia lakou e noho mau i ke kula, alaila hoomaha iho la i umi mau minute paha.
A hoi hou na kane me na wahine iloko o ka hale, hoike mai la ke kula wahine. He 42 ka poe i hoikeia. Ua noho kekahi poe no ka mai. Heluhelu lakou a pau. Alaila hoike mai la i ka mea a lakou i paa naau ma ka Ninau Hoike, a hoomaha iho la.
A awakea, hoike mai la ke kula a ka poe kumu ma ke Anahonua, ma ka Helunaau, a me na holoholona i paiia ma ka Lama Hawaii. O ka poe kumu i hoike 34 lakou. Ua noho elua no ka mai. Ua hele kekahi ma ke kauoha a ke alii e ohi i ka poe hoomana ma Puna. Aia kekahi poe me na'lii ma Honolulu, a ma Lahaina hoi kekahi, a ua haalele hoi kekahi poe i ke kula. Aloha ino lakou. D. B. L.
Hilo, Ian. 20, 1835.
A kokoke pau ka makou hana me ka poe kumu o Hilo a me Puna ma na palapala i loaa mai, olelo aku la makou e hoike.
A hala ka olelo ana, alaila hiki mai la ka palapala a Mr. Aneru ma. Ae maila ia i ko makou manao i ke komo ana o kekahi o ko onei poe kumu ma ke Kula nui. Hoike mai la kana palapala, aia i ka Monede mua o Ianuari ka manawa pono no ke komo ana. Aka, aole o lakou moku e holo aku ai.
Hiki pu mai me ka palapala a Mr. Aneru, na Hoike Honua no ka palapala hemolele i paiia ma Lahainaluna. No ka loaa ana mai ia makou keia palapala hou, a ao ke akaka ole o ka manawa e hiki mai ai ka moku, i ae la au i ka poe e manao ana e komo ma ke kula nui, 'Ea, aole e pono ia kakou e noho wale i neia mau hebedoma: E kula kakou i ekolu paha la o ka hebedoma ma ka palapala hou mai. A e inu hou oukou i na mea e pono ai ko oukou noho ana ma ke kula nui.
Ae mai la lakou.
Alaila hoakaka aku la au i ka poe kumu a pau i ko'u manao e ao aku i kekahi poe i keia manawa hoomaha. I aku la au ia lakou penei; "O ka poe manao ana e hiki pono ia lakou e hana ma keia palapala, i neia mau hebedoma, e pono ia lakou e hele mai. A ina paha manao kekahi poe, nui ka lakou hana e, aole hiki ia lakou e ao aku i ka lakou poe haumana, a e hana i ka hana no ke kino, a e hele mai hoi i ke kula, oia no. Aia i ka manao o kela mea keia mea o oukou."
I ka la 12 o Ianuari nei ka hoomaka ana i ka hana ma keia palapala hou. O ka poe hana i keia hana, he 36 o lakou a pau. O ka poe e komo ana i ke kula nui kekahi, o ka poe kumu e noho ana ma kahi kokoke kekahi, o ka poe kanaka ui e manao ana e komo ma ia kula kekahi, a me kekahi poe wahine i hana e mamua ma ka Hoike Honua, ma ka Helunaau, a me ke Anahonua, lakou kekahi.
I ka Monede lua o Ianuari nei hoomaka hou o Laimana wahine i ke kula kamalii. I ka hoomaka ana o ke kula, hele mai la he 80. I neia mau la ilio nei, he l00 a me ke keu aku i hele mai i kela la i keia la. Ina noho mau lakou i ke kula, e loaa auanei paha ia lakou ka ike a me ka naauao. Aka aole maopopo ia makou ka mea mahope. O kekahi poe makua, aole nui ko lakou makemake i ka hele ana o ka lakou poe keiki i ke kula. Eia hoi kekahi, ke makemake nei kekahi poe e hele no ka nui o ka hookupu ana ma keia wahi, a no ka hemo pinepine ana o ka aina kekahi. D.B.L.
Ua paiia KE KUMU HAWAII ma ka mea Paipalapala a na Misionari, HONOLULU; elua hebedoma hookahi pepa, a Wenede ka la e pai iho ai.
Eia ke kuai ana, HOOKAHI MAKAHIKI $1.00, a na mea e lawe i ka Pepa a pau.
Oahu, Mission Press.—R. TINKER, Editor.
E.H. ROGERS, Printer.