Ke Kumu Hawaii, Volume I, Number 7, 4 February 1835 — Page 51
1835.) KUMU HAWAII. 51
HELU 13.
KA EPISTOLE A PAULO I KO ROMA.
MOKUNA 4.—PAUKU 1—13.
Feb. 24—Mar. 8.
1. Maila, heaha la ka kakou mea e olelo ai, ua loaa ia Aberahama ko kakou makua ma ke kino?
2 A, ina, ua hoaponoio mai o Aberahama ma na hana, he mea kana e kaena ai, aole nae imua o ke Akua.
3 Heaha ka mea a ka palapala hemolele i olelo mai ai? Ua manaoio Aberahama i ke Akua, a ua hoiliia hoi ia i pono nona.
4 A o ka mea e hana ana, aole i manaoia kona uku no ka lokomaikaiia, no ka aie no.
5 Aka o ka mea hana ole, a i manaoio aku i ka mea nana e hoapono mai i ka mea pono ole, ua hooliloia mai kona manaoio i pono nona.
6 Pela no hoi o Davida i olelo mai ai i ka pomaikai ana o ke kanaka, maluna ona ko ke Akua hooili ana iho ai i ka pono me ka hana ole;
7 Pomaikai ka poe i kalaia ko lakou hala, a i uhiia ko lakou hewa:
8 Pomaikai ke kanaka ke hoopili ole ka Haku i ka hewa ia ia.
9 Maluna o ka poe i okipoepoeia wale no anei keia pomaikai? A maluna anei o ka poe oikipoepoe ole ia kekahi? No ka mea ke olelo nei makou, ua hooliloia ka manaoio i pono no Aberahama.
10 I hea la ia i hooliloia'i? I kona noho okipoepoe anei? a i kona noho okipoepoe ole ia anei? Aole i kona noho okipoepoeia, aka i kona noho okipoepoe ole ia.
11 A ua loaa ia ia ke okipoepoe i hoailona na kona manaoio ana i kona wa i okipoepoe ole ia'i i lilo ai oia i makua no ka poe a pau e manaoio ana me ka okipoepoe ole ia, i hooliloia ai ka pono ia lakou,
12 a i makua no ka poe i okipoepoe kekahi, aole i okipoepoeia wale no, aka e hele ana hoi ma na kapuai o ko kakou makua o Aberahama i kona noho okipoepoe ole ia.
13 No ka mea o ka olelo mai ia Aberahama a i kana mamo, e lilo ia i hooilina no ke ao nei, aole ia ma ke kanawai, aka ma ka manaoio.
KA HOOMOAKAKA ANA.
iv. Me he ninau la ia a kekahi. Alaila, ina pela io no, e hiki ia kakou ke olelo, i ke aha la ua loaa i ko kakou aha la kona pomaikai mamuli o ke okipoepoe ana?
2 He pomaikai no ko Aberahama, a me na Iudaio, [Rom. iii. 2] Aka, ina i hoaponoia mai o Aberahama ma kana hana ana, e hiki ia ia ke kaena i kana hana ana, no kona pono iho. Aole hoi ona mea e kaena ai imua o ke Akua.
3 Ua olelo mai ke Akua i ke aha la no Aberahama? Eia, ua manaoio o Aberahama i ke Akua a ua kapaia ia he pono nona. He kanaka hewa ia mamua, a hai mai ke Akua ia ia i ka pono, a manaoio aku o Aberahama i kana olelo, alaila hookipa iho la ke Akua ia ia, hoolauna ia ia, a hoomalu hoi ia ia me he mea hewa ole la, a ua hookaawaleia kona hewa.
4 O ka mea hana mamuli o he kanawai me he mea hoolimalima la, aole i kapaia kona uku, he mea haawi wale ia no ka lokomaikai, aole no ke aloha ua uku la, no ka aie no; aole me he mea haawi la, aka nae he mea kuai la.
5 A o ka mea hana ole, o ka mea aole i pau ia ia ke kanawai i ka malama pono ia, aka ua hilinai aku mamuli o ke Akua i ka mea nana e hoapono lokomaikai mai i ke kanaka hewa. O he mea e hoapono lokomaikaiia i ia e ke Akua.
6 Ua like me ia ka pomaikai a Davida i hoike mai ai, ka pomaikai wale o ke kanaka i hoapono lokomaikai ia mai e ka Haku, aole no ka hana ana i na mea a pau a ke kanawai i kauoha mai ai.
7 O ka poe i kala wale ia ko lakou hala i uhiia hoi ko lakou hewa, oia ka poe pomaikai. O ko lakou hoaponoia, a me ko lakou ola, he mea ia i haawi wale ia no lakou. Oia ko lakou pomaikai.
8 Pomaikai ke kanaka i hookaawaleia'ku kona hewa, aole i hoopiliia, a i hoomauia, a i hoopaiia e ke Akua. Ua hoomaluia, a ua hoola mau ia me he mea hewa ole la.
9 E lilo anei keia pomaikai i ka poe Iudaio wale no, ia Aberahama ma? Aole anei e pomaikai pu pela ko na aina e ke manaoio lakou i ke Akua me ke okipoepoe ole ia ma ke kino? Aole anei e kalaia ko lakou hewa? He olelo ia'i, ua kapaia kona manaoio he pono nona.
10 I ka wa hea kona manaoio, i hooponoia'i ia? Mamua aku paha, mahope mai paha, o kona hoailonaia? Mamao aku no i kona noho ana me ke okipoepoe ole ia.
11 12 Alaila ua hoailonaia ia no kona manaoio. A maopopo kona manaoio i ke Akua, alaila haawi mai ke Akua i ke okipoepoe ana i hoailona no kona manaoio ana i ka wa i noho ai ia me ka hoailona ole; pela i lilo ai ia i makua no na kanaka manaoio a pau loa i okipoepoe ole ia, i makua hoi o ka poe a pau i okipoepoeia, a i hele hoi ma na kapuai o ko Aberahama manaoio.
13 O ko ke Akua olelo ana mai ia Aberahama, a i kana mamo hoi, e lilo ia i kanawai, ia Mose, aole no ka malama ana ana i ke kanawai, aka ma ka pono o ka manaoio.
O ko Aberahama ma lilo ana i hooilina o ke ao nei, eia kekahi ano, e paapu ka honua i ka poe manaoio mamuli o Aberahama, e pomaikai na lahuikanaka a pau ia ia. Eia hoi kekahi, o ka Mesia kekahi mamo a Aberahama, a e lilo no na lahuikanaka a pau ia ia. Gal. iii. 16. Eia hoi kekahi. O ka poe manaoio, e like me Aberahama, he nui wale na mea pono, a me ka pomaikai, e haawi wale ia mai ia lakou, Halelu xxv. 13. xxxvii. 9. 11. 22. 29. Solomona ii. 21. Mataio v. 5.
HE MAU NINAU.
1 O ke aha ke ano o keia ninau?
2 Ina ma ka hana ka hoaponoia, heaha ka Aberahama?
3 Olelo mai ka palapala nowai ? U'aha oia?
Ua kapaia kona manaoio heaha?
4 O ka mea hana, heaha ia. Heaha ke ano o kona uku?
5 Owai ka mea hana ole? Manao ia i ke aha? ua kapaia kona manaoio heaha?
6 Pela ka olelo a wai?
7 Heaha ke ano oia poe? Heaha ko lakou pomaikai?
8 Heaha kona pomaikai? Mahea la ia i pomaikai ai?
9 Malama o ka poe i okipoepoeia wale no ia pomaikai? Heaha ka mea i oleloia no Aberahama?
10 I ka manawa hea ko Aberahama manaoio i hoaponoia'i ia?
11, 12 Loaa ia ia ke okipoepoe ana i aha?
No kona manaoio i ka wa hea?
I lilo ia makua no ka poe hea?
A me ka mea i okipoepoeia i hele mahea?
18 Ka olelo e lilo ke ao nei ia wai?
Mahea e lilo ai ia ia Aberahama ma?
Heaha la ke ano o ka lilo ana o ka honua ia Aberahama a me kana mamo?
O ka uku no ka hewa, o ka make ia.—Roma vi. 23
E hoomakaukau oe e halawai pu me kou Akua.—Amosa iv. 12.
E hoohewa mai ana no ke Akua i ka poe hookamakama, a me ka poe moe kolohe
—Heb. xiiii. 4.
Ua akaaka ka poe aia i ka hewa—Solomona xiv. 9.
E haalulu oukou, mai hana hewa.—Halelu iv. 4.
E hoomanao oe i kou mea nana i hana ano, i kou mau la opiopio.—Kekahuna xii. 1