Ke Kumu Hawaii, Volume I, Number 6, 21 January 1835 — Page 44

44 KUMU HAWAII. (IANUARI.

HELU 11. ROMA.
MOKUNA 3.—PAUKU 10-23.
Feberuari, 5-19.

                10 E like me ka mea i palapalaia, aole loa he mea pono, aole hookahi.
                11 Aole no he mea i ike, aole hoi he mea i imi i ke Akua.
                12 Ua pau lakou i ka hele hewa, ua lilo lakou i poe pono ole, aole loa he mea e hana ana i ka maikai, aole loa hookahi.
                13 O ko lakou kaniai he lua kupapau hamama, ua hoopunipuni lakou me ko lakou
mau alelo; aia malalo o ko lakou mau lehelehe ka mea make a na moonihoawa.
                14 Ua piha ko lakou waha i ka hailiili a me ka mea awahia.
                15 Ua mana ka lakou mau wawae i ka hookahe i ke koko.
                16 Aia ma ko lakou mau alanui ka luku ana a me ka popilikia.
                17 Aole hoi lakou i ike i ke alanui e malu ai.
                18 Aole he weliweli i ke Akua imua o ko lakou mau maka.
                19 Ua ike no kakou, o na mea a ke kanawai i olelo mai ai ua olelo no ia i ka poe malalo o ke kanawai, i paa na waha a pau, a i lilo hoi ko ke ao nei a pau i hewa imua o ke Akua.
                20 Nolaila ma ka hana ana ma ke kanawai, aole kanaka e hooponoia imua ona, ma ke kanawai ka ike ana i ka hewa.
                21 Ano hoi, ua hoakakaia mai ko ke Akua hoapono ana aole ma ke kanawai, ua hoikeia mai ia e ke kanawai a me na kaula.
                22 Oia hoi ka hoapono ana o ke Akua, ma ka manaoio aku ia Iesu Kristo, no na mea a pau, a maluna hoi o ka poe a pau e manaoio ana, aole mea okoa.
                23 No ka mea ua lawehala na mea a pau, ua nele hoi i ka nani o ke Akua.
 

KA HOOMOKAKA ANA.

                10 Hoike hou Paulo i ka mea i hoikeia mamua ma ka Halelu xiv. 1, a me ka Hal. liii. ua poe aia, ka poe i olelo ma ka naau, Aohe Akua. Aole o lakou mea i hana pono.
                11 Aole mea i hoomaopopo i ke Akua
me ka ike lea i ka pono, aole mea i imi maoli aku ia Iehova, Hal. xiv. e. O ka imi maoli i ke Akua, oia ka pule aku ia ia me ka makemake e malama i kana kauoha.
                12 O na mea aia, o na mea naaupo ua pau lakou i ka hele hewa, aole o lakou mea i hele pono, Halelu, xiv. 3.
                Manao no kekahi poe i heluhelu i ka Halelu xiv, ua hoakaka mai la o Davida malaila i ka pono ole o na kanaka a pau loa o ke ao nei.---A manao kekahi ua hoike mai oia ma ia halelu i ka aoao hewa o kekahi poe Iudaio aia, kapoe i manao ole i ka ke Akua, ka poe ku e, me ka makemake e hoopau i ka poe "pono" e like me ka pau ana o ka berena ia lakou i ka aiia. Ua like hoi me ia, i ko Pauolo manao, ka hewa o ka poe ku e ia Iesu, me ka manaoio ole ia ia.
                13 He olelo nane paha, e like me ka puka ana o ka pilau a me ka mea e mai ai na kanaka, mai loko mai o ka luakupapau, pela na olelo wahahee a me ka hua e hoowahawahaia'i a e poino ai hoi, mai loko mai o ke kaniai o ka poe aki, ka poe hoino ia hai. Malimali ino, me ka hoopunipuni ka lakou mau alelo.
                He niho awa hookahi malalo iho o ka lehelehe luna o ka mooaihoawa; a komo ua niho la iloko o ka io o ke kanaka paha, ka holoholona paha, paki ka mea make, mai loko mai o ka niho awa, iloko o ka eha, aia ka mea e make ai ua hoohalekeia; me ia ka olelo huhu a me ka hoopunipuni e make ai ke kanaka. Hal. 104. 4.
                14 O ka olelo wahahee, a me ka olelo kuamuamu, he mea awahia loa ia. Hal. x. 7.
                15 Ua hoike keia hua i ka makaukau a me ka makemake o lakou e pepehi kanaka. Isaia 59. 7.
                16 Ma kahi e hele ai lakou, malaila ka make ana me ka poino ana o ka poe i loaa ia lakou. Isaia, 59. 7.
                17 Aole maopopo ia lakou ke ala e pomaikai ai na kanaka. Aohe malu ma ko lakou wahi e hele ai. Isai 59. 8.
                18 Aole makau lakou i ke Akua, aole manao lakou i kona hemolele, aole manao lakou i kona hoopai ana i ka hewa. Me he poe pupule la. Ua hehena me ka hookano a me ka haaheo, a me ka huhu. Hal. xxxvi. 1.
                19 Ua ike kakou o ka mea a ka palapala hemolele kahiko i olelo mai ai, ua olelo mai ia i ka poe i loaa ia palapala, i ka poe Iudaio, i paa ko lakou mau waha e like me ko na aina e, i ole e hiki i kekahi ke hoapono ia ia iho imua o ke Akua, no ka mea, ua pau lakou i ka hewa.
                20 Nolaila no ka pau ana o na Iudaio, a me na kanaka e i ka hewa, aole hiki i kekahi ke hoaponoia ma kona malama ana i ke kanawa.---Aole malama hemolele loa ka poe Iudaio i ke kanawai i kakauia ma ka palapala hemolele a ke Akua, aole hoi i malama hemolele loa ko na aina e i ke kanawai a ke Akua i kakau ai ma ko lakou naau. Ma ke kanawai i maopopo ai ko lakou hewa.
                21 Ano, i ka wa i maopopo ai ko Iesu make ana no kanaka a pau, ua hoomoakakaia ko ke Akua hoapono ana mai i ke kanaka, aole ma ke kanawai, aole ma ka pono o ke kanaka, no ka mea hewa ia.
                Aole ma ke kauoha hou wale no, aka ma ke kauoha kahiko kekahi i hoikeia mai ia hoapono ana ma ka manaoio.
                22 O ko ke Akua hoapono ana mai i ke kanaka hewa ke paulele ia i kana Keiki. Roma i. 17.---Ua hoikeia mai keia hoapono ana ma ka manaoio, he mea ia no na kanaka a pau; ua makaukau no ka poe paulele a me ka poe paulele ole, a ua haawi io ia mai no hoi i ka poe paulele ia Iesu, na mamo a Iseraela a me ko na aina e.—Ua like ka hoapono ana me ka manaoio; aole okoa ko kekahi a me ko kekahi.
                23 Ua pau na kanaka a pau i ka hewa, ua pau i ka nele i ka nani o ke Akua. Aole i loaa ia lakou ka manaloia ma ka lakou hana ana. Aole lakou i hoaponoia e ke Akua no ko lakou pono iho, e like me ko ke Akua hoapono ana i ka poe anela hemolele.
 

HE MAU NINAU.

10 Heaha ka mea i palapalaia, a Paulo i hoike nei? Mahea? No ka poe hea?
11 Aole mea aha? Heaha ka ike? Heaha ka imi i ke Akua?
12 Pau lakou i ke aha? Lilo i aha? Aole mea hana i ke aha?
13 Heaha ka lua kupapau hamama? Mahea ka like ana o ia mau mea? Heaha ka mea malalo o ka lehelehe o ka poe aia? Mahea ka niho awa o ka moo? O ke aha ka mea e like ai? Kakauia ia mahea?
14 Piha i ke aha? Heaha ka mea awahia loa? Nohea ka lawe ana o keia pauku?
15 Heaha ka mana? Kakauia mahea?
16 Heaha ma ko lakou alanui? Ka make a me ka popilikia o wai?
17 Heaha ka hoomaopopo ole? Maopopo ole ia wai? Mahea ka malu ole? Kakauia mahea?
18 Aole makau lakou i ke aha? Heaha ke ano o ia makau ole?
19 Ia wai la ka olelo o ke kanawai, i olelo
mai ai? O ke aha ke kanawai ma keia pauku? Loaa ia wai? I paa ke aha? I lilo ko ke ao nei i aha?
20 Nolaila, no ke aha? Aole aha? O ke kanawai hea ka i malama hemolele  ole ia?
21 Ua hoakakaia mai ke aha la? Aole ma ke aha? Mahea la i hoikeia'i ia hoapono ana?
22 Ka hoapono mahea? No ka poe hea i hoomakaukauia'i ia hoopono ana? Haawi io mai ia wai?
23 Uaha na mea a pau? Ua nele i ke aha? Heaha ia hemahema?