Ke Kumu Hawaii, Volume I, Number 5, 7 Ianuali 1835 — HE OLELO HOOIKAIKA NO KA MAKAHIKI HOU [ARTICLE]

HE OLELO HOOIKAIKA NO KA MAKAHIKI HOU

No ka lokomaikai o ke Akua, ua loaa ia kakou ka makahiki hou. Ua nui no ka poe i make i ka makahiki i hala aku nei; elima paha tausani ma Hawaii nei, a ma na aina a pau ka huiia 26,00,000 paha i make. Ua pau ka lakou hana ma ka honua nei; ua pau ko lakou manawa e hoomakaukau ai, no kela noho ana ku mahope. Ua hooloihi mai ke Akua i ko kakou noho ana ma ka honua nei. Pehea ko kakou pono? I ka hoomaka ana i keia makahiki hou, e imi kakou i ka mea e pono ai. Eia paha ko kakou makahiki e make ai. Nolaila e hoomakaukau mua kakou no ka la mahope. Ua hiki wawe ko kakou makahiki, aole hakalia. "Mai hoopalaleha i ka hana; e hooikaika ka naau me ka malama aku i ka Haku." Aole pono ke hoomaunauna i ko kakou manawa e noho nei. Ua haawi mai ke Akua ia kakou i keia makahiki hou i hana kakou i kona makemake me ka imi i ke ola o ko kakou uhane. Nolaila e makaala kakou, e hooikaika ma ka pono, no ka mea, "E ku ana kakou a pau i mua o ka noho hookolokolo o Kristo, e hoike aku ana kela mea a keia mea o kakou a pau i kana iho i ke Akua." -Alemanaka.