Ke Kumu Hawaii, Volume I, Number 5, 7 January 1835 — Page 40
40 KUMU HAWAII. (IANUARI,
KAHI MELE.
IERUSELEMA HOU, 8—6.
Ie-ru-se-le-ma wahi no'u,
Au-pu-ni o kuu alii,
I-i-ni au i kuu naau,
I-lai-la no e pii.
2 Na papohaku maikai ou,
Na puka momi laa,
Na alanui gula no,
He nani ke nana.
3 Ko kihapai, ko muliwai
E noonoo kuu naau,
Aohe mea i ikea ai
Pela ma keia ao.
4 Ina he nani loa pela
Ko luna wahi mau,
Pehea la wau ke hoopapau
E pili i keia ao?
5 Lalau mai oe, e Iesu e,
E hapai ae ia'u,
I kahi noho mau loa ai
I kou aupuni mau.
6 Iesu ka Haku o ke ao,
Ua hoi iluna ae,
Ka hahai aku nei hoi au
Ia ia e ike ai.
7 Na hoahanau aloha o'u
Ka'u poe e waiho ai,
Ma kahi lani ola mau
Kakou e halawai.
8 A hala ae la keia ao,
Ka la me na hoku,
Hoomaka wale ia no
Ke ola o kakou. A. B.
Kailua, Dek. 19, 1834.
Aloha oe, e Mika Tineka. Ua makemake nui ia kau pepa hou o ke Kumu Hawaii ma Kailua nei. Ua loaa iho nei ia makou ka pepa 1, a ua pau ia i aieia e na haumana o onei. O ka hoomoakaka ana i ka Roma kekahi mea makemake o na haumana kula Sabati. He mahuahua ia poe maanei, he elima paha haneri o lakou a keu. A ina ia lakou ka waiwai pono e uku mai ai, ina ua makemake ka nui o lakou ia pepa. Aka, aole o lakou dala. E hana ana kekahi poe i ke kalo, a o kekahi poe i na pue uala, a o kekahi i na uhi, a e hanai holoholona ana kekahi poe i loaa'i ka mea e uku mai ai i ka pepa.
Eia paha kekahi mea koe i pono ai na haumana o Hawaii nei. E paiia ka olelo hoomoakaka i ka "Ai o ka la,'' i hookahi malama mamua o ka manawa e ao ai. Ina aole pela e hanaia'i, aole loa e pono iki ke kula Sabati ia hoomoakaka ana. E paipai paha oe ia Binamu ma ia wahi. Ua hala ka malama okoa o keia pepa mua, mamua o kona hiki ana mai. I keia holo ana mai o Kaikioewa, aole i hooiliia mai kekahi mea iki no Oahu mai.
Ke makemake nei makou i hookahi haneri a me ke kanalima o ke Kumu Hawaii e hoomaka ai; a mahope paha e hoomahuahua aku, a like me ka poe e makemake mai ana.
Ua kokoke i hala ka manawa mai nui o Hawaii nei. He nui na mea i mai, aole nae he mai make ka nui. Ua make no hoi kekahi poe, a ua ola kekahi. I neia manawa iho nei ka Hoike i na kula o Kona nei. E aho iki no ia i ka wa mamua. He nui loa hoi na haumana i haalele i ka palapala. O ka hewa o na kumu kekahi mea e haalele ai lakou, a o ka molowa maoli hoi kekahi. Aole ikaika nui o na kumu e ao, no ka mea, aole lakou i kokua pono ia e na konohiki a me na haumana. O ke kula kamalii ma Kailua nei i aoia e maua o ka'u wahine, oia wale no ke kula mau. Ua 150 paha o lakou e ao nei i ka palapala, a ke kokua mai nei hoi na hoahanau o makou ia maua i ke ao ana.
Owau no kau me ke aloha;
A. BIHOPA.
Ua alakai aku kekahi kanaka i kona makamaka maluna o ka hale kiekie a hoike aku ia ia i kana waiwai, i aku la.
"Aia ko'u aina kela.''
Kuhikuhi aku la nui kahi loihi aku, ma kekahi aoao, ninau iho la;
"Eia, ike anei oe i kela kihapai maikai?"
"Ae.''
"Oia no'u ia.''
Kuhikuhi hou aku la ma ia aoao aku, i aku la,
"Ike anei oe i kela hale nui?''
"Ae.''
"No'u ia."
Pane aku la kona makamaka penei,
"Ea, ike anei oe i kela kauhale uuku mao?''
"Ae."
"E noho ana kekahi wahinekanemake iloko o laila he oi aku kona waiwai i kou."
"Pehea?"
"E hiki no ia ia ke olelo aku penei:"
'O Kristo no'u ia."
Kulou iho la ua kanaka waiwai nei i iho la,
"Oiaio no la. O ko maua mea waiwai no ia. S. W.
HE POWA MALU MA WAIKIKI.
I ka hele ana ae o kekahi mau kamalii i ka paani, ike lakou i ke kupapa maloko o ka muliwai o Apuakehau Kiina mai la ia e kanaka, hapaiia ae la iloko o ka hale, ike lakou he wahine o Nawai kona inoa. Ua pepehi malu ia, a hooleiia aku iloko o ka wai.
Imi iho lo na kanaka i ke kane o Kailiuli, aole i loaa, ua mahuka. Manao iho la na kanaka a pau, oia iho la no kona mea nana i pepehi.
Ke imi nei ia ia a loaa.
O Monede, Dekemaba 28, mawaena o ka po, ka manawa i pepehiia ai.
Ua paiia ke KUMU HAWAII ma ka mea paipalapala a ma Misionari, Honolulu; elua hebedoma hookahi pepa, o Wenede ka la e pai iho ai.
Eia ke kuai ana, hookahi makahiki hookahi kala, a na mea i lawe i ka pepa a pau.