Ke Kumu Hawaii, Volume I, Number 4, 24 December 1834 — Page 32

32 KUMU HAWAII. (DEK.

KAHI MELE.

He hapa o ke Kanikau no ka make ana o Keeaumoku o ke Alii o Maui.

                Ue, ue, ua make kuu Alii,
                Ua make kuu haku a kuu hoa,
                Kuu hoa i ka wa o ka wi,
                Kuu hoa i paa ka aina,
                Kuu hoa i kuu ilihune,
                Kuu hoa i ka ua a ka makani,
                Kuu hoa i ka wela o ka la,
                Kuu hoa i ke anu o ka mauna,
                Kuu hoa i ka ino,
                Kuu hoa i ka malie,
                Kuu hoa i mau kai ewalu;
                Ue, ue, ua hala kuu hoa,
                Aole e hoi hou mai.
Lama Hawaii.
 

Lahaina, Detemaba 6, l834.
                Ke hai aku nei au i kekahi hakaka a ko Borabora kanaka ma keia wahi.
                Ku mai la kekahi moku o kohola, o Generale lakesona ka inoa. O Kemika (Capt. R. Smith) ke alii o ka moku. I ka la 16 o Novemaba e kuai i ka ai a me na mea hoi e ae. Haalele iho la ia ia na kanaka Borabora elua me ka manao, e noho loa maanei.
                Olelo aku la ua mau kanaka la i ke ala o ka moku, "E hookaa mai oe i kau aie ana ia maua, no ka mea, aole loa maua e holo hou aku me oe." Olelo mai la ke alii o ka moku ia laua. "Alia, a hiki aku kakou ma Amerika, no ka mea, pela kakou i hoolimalima ai. A ina e haalele olua ia'u, alaila aole loa au e uku aku ia olua."
                Nolaila huhu loa ua mau Borabora la a ohumu pu aku la me na Borabora e, e hoohalua a e lalau ia ia. Hoohalua no iho la lakou, aole i lalau ia ia, no ko lakau makau paha, aka hapai ae la lakou i kona waapa a lawe aku la iuka. Holo wikiwiki kekahi kanaka, a hai aku la ia Hoapili i ka lakou hana ana.
                Kauoha mai la o Hoapili i kona poe kanaka, e hele koke a e hooki ia lakou, a e hoihoi i ka waapa.
                I kekahi la mahope mai hoopii aku la o Kemika ia Hoapili, a nonoi i kona kokua ana mai. Olelo mai la o Hoapili, "Ua hewa lakou, he poe powa, ua ku e lakou i ko'u mau kanawai. Nolaila, ke hookolokolo aku nei au ia lakou, penei, O ua mau Borabora la elua, i haalele i kou moku, na'u e hoopaa ia laua i ka hao, iloko o ka papu, i na la a pau au e noho maanei. A holo kou moku, na laua e hooponopono i ke alanui, ma Launiupoko a hiki ma Olowalu. O na Borabora e kekahi, ka poe i hana hewa pu me laua, ke kauoha aku nei au ia lakou, e haalele loa i keia wahi, i kela manawa a me keia manawa, a na moku, e ku mai maanei.''
                O ko'u manao, aohe uuku ka hewa ma keia hana ana. Ina e aihue na kanaka i ka waapa, mamuli paha olohani lakou a e lilo kekahi moku ia lakou.
                Eia kekahi manao. He hoailona keia, he mea e hoike ai i ka mana o na alii. Ina e haalele ia mau Borabora i ka Hoapili olelo a hoopai ole oia ia lakou, malaila paha e akaka ai ka hemahema o ke kanawai; aka, ina e hoopai pono ia lakou e like me ka Hoapili olelo, alaila maopopo ka hiki ole o na kanaka ke hoowahawaha i na'lii. Aole nae au i ike pono i ka hope o keia mea.
A.C.
 

                TAHITI. Ua kapu ka rama ma Tahiti ka aina a Pomare i hoomalu ai. Na ko laila alii wahine i papa i kela enemi nana i hoohaunaele, a i hoopoino i kona mau aina.

                RAIATEA. Make ka Misionari hou ma Raiatea. O Loxton kona inoa; 21 kona mau makahiki. O ka manao o kana wahine e hoi i Beritania. Holo pu mai laua me ke aloha, a me ka manao e ao i kanaka ma Raiatea, aole i hiki. Na ke Akua ia hana, e noho malie kakou.
 

                NAVIGETA. Ua hana ko laila mau kanaka i na hale pule he nui no Iehova. Elima o ia mau hale ua hamo pono ia me ka puna. Makemake lakou e ike i ka olelo a ke Akua. Ua makaukau na misionari elima e holo malaila mai Beritania mai. Ua holo ka misionari o Huahine, i kela mau aina, e ike a e hooikaika ia lakou.
 

                Pai hewa. Ma ka palapala a Amasa, ua pai hewa ia na hua eha. Ua lilo na papa i "paa," a ua lilo na paa i "papa." E hiki i na haumana akamai ke hoopohopono i ka heluhelu ana ia mau hua hewa eha.
                Pela ma ka palapala Nuuhiva, ua pai hewa ia ka hua "hakoahaia'' eia ka pono; O koe te hakaohaia. A ma kela aoao, o ka hua "hooke,'' e pono ke heluhelu hoike.

                Honolulu, Dek. 2. Ku mai ka moku o Kohola, o Huntress ka inoa, o Post ke alii; no Nu Bedefoda mai, 27 mau malama ka holo ana l,400 barela aila i loaa.
                Dek. 2. Cambria, Crocker, Nu Bedefode, 30, 1,850.
                Dek. 4. Kingston, Sherman, Nanetuketa, 25, 480.
                Dek. 4. John Coggeshall, Macy, Nu Pota, 29, 1,400.
                Dek. 4. General Jackson, Smith, Berisetola, 29, l,400.
                Dek. 4. Corinthian, Grinnell, Berisetola, 24, 670.
                Dek. 5. James Maury, Bigelow, Salema.
 

                Ua paiia ke KUMU HAWAII ma ka mea paipalapala a na misionari, Honolulu; elua hebedoma hookahi pepa, o Wenede ka la e pai iho ai.
                Eia ke kuai ana, hookahi makahiki hookahi kala, a na mea i lawe i ka pepa a pau.
 

Oahu: Mission Press. - R. TINKER, Editor, E.H. ROGERS, Printer.