Ke Kumu Hawaii, Volume I, Number 3, 10 December 1834 — NO KE ALII O PEGU A ME KONA KAU ELEPANI. [ARTICLE]

NO KE ALII O PEGU A ME KONA KAU ELEPANI.

Ma na nina naaupo ma ka hikina o Asia ua manao nui ia ka Eiepani, ua hoomanaia no kekahi. Malama loa ke alii o Pegu i eha Elepani, he Elepani keokeo wale no. Hoonani loa ke alii i ua mau Elepani

la, a hanai aku la ia lakou i ka ai i hoomakaukau nui ia me ka inai a me na mea ono; a waiho aku i ka ai maloko o na kiaha gula wale no; malaila na Elepani e ai ai. Haawi aku no ia i na kauwa e lawelawe no lakou; a e holoi aku ia lakou i ka wai i malaimaia maioko ona bakeke kala. Ua hoonaniia lakou i na gula pepeiao, a me na gula apo, a me na daimana, a me na mea maikai. I ka wa i hele aku ai ke alii, hele aku keia mau Elepani imua ona. Aole lakou i hoohanaia, aole loa. I ka wa i hele aku ai ke alii e ike ia lakou ma ko lakou hale, kukuli lakou imua ona, a oia no kekahi i kukuli imua o lakou. Aole i kukuli ia mau Elepani ia hai, i ke alii wale no, no ka mea, pela lakou i aoia aku ai. Ua kakaikahi na Elepani keokeo, nolaila ua manao nui ia lakou e na 'lii, a o lakou no ka hala e kaua ai. Lohe ke alii o Pegu, he mau elepani keokeo ko ke alii o Siama, a hoouna aku la ia i mau kanaka e kuai. Olelo aku la ia i kona kanaka: "O ka mea a ke alii o Siama e makemake mai ai, oia ka oukou e haawi aku ai me ka hoohalahala ole." Hoole loa ke alii o Siama, aole kuai, aole loa, aole ike kala, aole i ke gula, aole i ka mea e. Alaila, huhu ke alii o Pegu no kona hoole ana, a kaua aku la ia ia, me kona poe koa a pau; a pio ke alii o Siama ia ia, a lawe iho la ia i kona aina a me kana mau Elepani keokeo, na mea ana i makemake mua ai.—Lama Hawaii.