Ke Kumu Hawaii, Volume I, Number 3, 10 Kekemapa 1834 — KAHI MELE. HE MELE NO KA HOOKUMU ANA I KA HONUA. [ARTICLE+ILLUSTRATION]

KAHI MELE.

HE MELE NO KA HOOKUMU ANA I KA HONUA.

Ha, ke Akua i ka lewa! Hohola ka mana, hohola. Lele hoolahalahai ka Uhane; He Uhane, he aka no ka mea maikai, He akalani no ka Uhane Hemolele. Apo mai ka mana i ka nakele, i paa, I paa ka nakaka, o lewa wale no. I paa i ka mana i ka manao. Hookino ai ka honua, Ua ea pu, ea ka moku; Olohelohe ka aina, Alaneo ka honua, He lepo wale no. He lepo ke kanaka, Na ke Akua i hana; Nana no i hana i na mea a pau. Hoolulu mai la i na mea uliuli, Kahiko ka honua i ka mea maikai; Hoonani mai i ka pua o ka laau, I nani ka honua, Na ke Akua ia. Na ke Akua i hana ka lani nui nei, I hana i ka lani i mamao liuliu, I hoopaa i ka lani i wahi nona, Noho hookahi lehova, oia wale no, O ka Uhane ka lua. O ka mana kona mea i lehulehu ai Lehu, a kini, a nalowale, A piha ka lani, piha no ka honua, Piha i ka pono, i ka mana, i ka maikai, I ka nani, i ka hemolele'i ke ahonui He mea nui wale no nana. Na ke Akua lokomaikai, I nui wale ai hoi ha ka lani He nui ka lani me ka honua, He nui ka mauna me ke kai. He mea hana wale no na ke Akua, Na kona mana wale no. O ko ka la wahi no i kau ai; O ka moku nae ke huli ana, huli ka moku, Palamimo, palanehe ole, pala ole Aole kakou e ike i kana oihana akamai O ke Akua ke kookoo nui e paa ai kahonua. Lama Hawaii.