Ke Kumu Hawaii, Volume I, Number 3, 10 December 1834 — Page 22

22 KUMU HAWAII. (DEK.

alii o ia aina e imi i na mea i lilo, aohe loaa. Alaila hoi hou ia i ka moku, lawe i ka pahi a me ka pu, a hele hou mauka me na kanaka ona eha. Ua puniia ke alii i na koa ona i makaukau i ke kaua. Hele wiwo ole aku ke alii moku i ua alii kaua la, a lawe pio ia ia ma ka moku, malaila i malama ai ia ia ia po a ao. Haawi hou oia ia ia i na makana hou i lealea ai ua alii kamaaina nei, a kuu aku la ia ia e hoi hou i kona wahi. Ia la no, a hele hou aku la na paahana e hana i ka hale, lele mai la na kamaaina maluna o ia poe paahana, a pepehi iho la i na mea o lakou ne umikumamalua. O na mea i koe, holo lakou, a pakele me ka eha ma ka waapa. Aka, o ka poe i make, ua pau lakou i ke kaluaia a me ka aiia e na kamaaina. A hoi hou aku la ua moku la, aole i loaa ka loli a lakou i imi ai ma ia wahi.
                Me ia no ka hana ana o na aina he nui wale. Ua launa ole i na malihini hele ma ko lakou wahi.
                A ina hele ka moku ilaila me ka makaukau ole no ke kaua, lilo hoi ka moku, a pau na kanaka i ka make.
                Maikai wale no ia poe aina a pau, ma ka Pakifika hikina, ua ulu wale na niu, a me na ulu, a me na mea ai e ae, aole make mahiai na kanaka, i loaa'i ka ai. Aka, o kanaka, he poe naaupo, lokoino wale lakou. Aole paha e pono ke noho na misionari me lakou o make.
                Aka, aole pela na aina a pau. Ua lokomaikai na kanaka o kekahi mau aina, a ua makemake i ka haole. Malaila no e hele na Misionari e noho e ao ia lakou i ka olelo a ke Akua.
                O ka hiki ana mai o ke aupuni o ke Akua ma na aina o Hawaii ka me e pomaikai ai na kanaka e noho ana. Aohe hewa ia kakou e noho nei e like me ia ma ke aupuni kahiko o keia pae aina. Pela no hoi e pono ai na aina e ae a pau. E na mea imi i kapono, E hooikaika oukou i naauao koke, a i pono ia oukou ke hele aku i na aina e, e hai aku i ka olelo a ke Akua ia lakou, i loaa hoi ia lakou ke ola iloko o ke Aupuni o ke Akua i ka lani. A.B.
 

Kaneohe, Nov. 24, 1834.
Aloha oe, e Mika Binamu,
                Eia ko'u manao ia oe. Ua olelo mai o Hoapili ia'u; "E kukulu i ka halepule ma kaneohe.'' Ua ae au me ka olioli, a me ka ikaika nui o kuu manao, i ka wa i lanakila ai kuu kino; aole i hiki mai ka nawaliwali ia'u. I aku au ia Hoapili; "E olelo aku oe i ko kaikamahine; i ae mai, ea, paa keia hana ia'u." Olelo aku la Hoapili ia Liliha, "Mai hoounauna oe ia Amasa." Ae mai Liliha, a me kokua mai i kona manao.
                I ko'u hoomakaukau ana i na kanaka o Kaneohe nei, olelo aku la au ia lakou, "Auhea oukou, e na makaainana, Eia ko'u manao, a me Hoapili, e kukulu kakou i ka luakini hoano no Iehova."
                O ka poe iloko o Iesu ua olioli lakou; o ka poe aole ma o Kristo la, kanalua lakou. A i kuu olelo ana aku ia lakou, "Aole a kakou hana e ae, ka kakou hana hookahi ko keia;" olioli mai la lakou, me ka hoomakaukau i ka hana.
                Ua hana no hoi makou me ka oiaio, ua keakea mai nei keia mea nui ia'u, -o ka mai. Nui loa iho la kuu nawaliwali. E ake au e paa ka luakini, oluolu kuu manao i ka paa ana; alaila hele mai kuu kumu, o Mika Pareka, e malama mai ia'u, i mai, "Mai hele oe i ka hana; ua nui loa kou nawaliwali paha." Ae aku au ia ia, ua nui loa kuu mai.
                A hiki mai kou manao ia'u, "Ea, i nui ke aho, ina aole kekahi mau paa malaila, e kuai oe i kekahi mau paa a na haole, i mau papa no ka awai, a no na puka o ka hale o ke Akua"
                Eia ko'u manao ia oe; ua papa ka awai, a me ka puka aniani, ua papa na puka i ke pani moena, ua uhola ka moena oloko; ua maikai ka hale; ua makaukau.
                Ko maua manao, ea, E iho mai oe, e haawi aku i ka hale no Iehova, keia Sabati. NA AMASA.
 

Honolulu, Dek. 3, 1834.
                Aloha oe, e kuu kaikuaana, e Hoapili. Oluolu wau ia oe i kau hana ana i ka hale pule maikai ma Lahaina, a i kou manao ia Amasa e hana ia i hale pule ma Kaneohe, a me kou manao i kau kaikamahine e hoounauna ole ia ia a paa e ia hana maikai. A kukulu o Amasa ma i ka hale, aole i paa, haawi e mai ke Akua, e noho maopopo ke kumu, o Mika Pareka malaila, me ka ae maopopoia mai e Kauikeaouli, a me olua. A mahope iho paa ae la ka hale, 80 kapuai ka loa 30 ka laula, e hiki i na kanaka 850 ke noho pu maloko. Oluolu au i ke ahonui o Amasa ma. A paa ka hale, palapala mai la o Amasa, a me Mika Pareka ia'u e hele ilaila, i ka haawi ana i ka luakini ia Iehova i ka la 30 o Novemaba. Olioli au i ka lakou olelo ana mai ia'u e komo kakou i ka hale o ke Akua. A i ka 29 o ka la o Novemaba iho aku au i ka pali; a ua hookipa lakou ia'u me ka olioli. A pau ka aina awakea, halawai makou iloko o ka hale pule. Hookahi paha lau o kanaka maloko. Pule makou. Olelo aku la au ia lakou, "E koho oukou i keia la i ka oukou mea e malama aku ai." Iosua xxiv. l5. No ka mea,
                1 Eia ka manawa pono e hoomaopopo ai i ko oukou Akua, ano, i keia la, i pono ka hana a kakou, i pomaikai hoi.
                2 A he mea hewa ke noho mamuli o na kii, a me ka paulele i na akua wahahee.
                3 A he mea hewa ke paulele ma ka waiwai o keia ao, a me ka lealea o ke kino.
                4 A he mea pono ke koho ia Iehova i Akua no kakou, a e malama aku ia ia me ka manao maikai, a me ka oiaio, no ka mea, oia wale no ke Akua maoli. O Iehova ke Akua nana kakou i hana, a i malama hoi. Oia wale no ko kakou mea e ola'i.
                Pela ka olelo ia la hoomalolo, a i ka po, hele mai kekahi poe me ka olelo, ua koho makou ia Iehova i Akua no makou.
                A kakahiaka nui ae la, i ka la sabati, i ka wanaao, puhiia ka pu, a halawaipule kekahi poe iloko o ua hale la. Na Emesona i heluhelu i ka olelo a ke Akua a olelo hoi ia lakou. A puka mai ka la, pau ae la ia halawai.
                A i ka umi o ka hora halawai hou na kanaka o Palikoolau, a me kekahi poe o Koolauloa, a he umi a keu no Honolulu, aneane piha loa ka hale, 750 paha kanaka; ua halawai e haawi i ka hale ia Iehova. Hoolea makou ma ka Himeni haneri,
                "E hookani olioli ia Iehova e na aina a pau," a me kekahi himeni, "Nani loa kou kauhale, E Iehova kuu Alii."
                Hai aku la wau i ka olelo a ke Akua ma ka Halelu Ixxiv. 3, 4.
"E Iehova Sabaota, ko'u Alii, a me ko'u Akua,
Pomaikai io ka poe e noho maloko o kou hale,
E hoolea mau ana lakou ia oe."
                I aku au penei:-
                He mea pono ke hele pinepine i ka hale o ke Akua a e noho malaila me ka hoolea ia ia, no ka mea, he nui ka pomaikai o ka poe i hana pela.
                Eia ka pomaikai o ka poe e noho ma ka hale o ke Akua me ka hoole aia ia.