Ke Kumu Hawaii, Volume I, Number 2, 26 November 1834 — Page 11

1834.) KUMU HAWAII. 11

naau mai ke aloha i na mea ino o keia ao mai, a i ke aloha i ke Akua. O ka makemake a ko'u naau, e ike oe e like me ko'u ike nei i ka hana ana a kou naau e noho nei.
                "Pane aku la ke kaikaina, Aole a'u makemake e lilo oe i kumu hai mai i ka olelo a ke Akua ia'u: Aole no i oi aku ko'u hewa i ko na mea e ae, a he pono no ka'u. Olelo aku la o Elisabeta ia ia, E ke kaikaina, ina aole oe e hoolohe mai ia'u, eia no ka'u mea e hiki ia'u ke hana aku ai nou. E pule aku no au i ke Akua nou me ko'u naau a pau.
                "E ke kumu, ke manao nei au, ua hooloheia kana pule, no ka mea, i ka loohia ana o ke kaikaina i ka mai, hele aku no o Elisabeta ma ka hale ana i ia ia. Ua olelo nui aku la ia ia ia no kona uhane, a manao iho la no kela me ka mihi a me ka ue nui i kona lawehala ana mamua a aloha mai no i kona kaikuaana, i kona lokomaikai aku, nolaila manao oluolu oia ia ia, a i ko maua hele ana aku e ike ia ia, ua moe aku no ia ma kahi moe, ua mai. Hai mai la oia ia maua i kona hewa e noho ana mamua; aka i mai la ia, O ko'u manao, no ke alohaia mai, ua lilo ke Ola o kuu kaikuaana i Ola no'u, no ka hilinai maluna o Kristo, ko'u manaolana, a me ko'u Ola.
                "E ke kumu e, ua hala aku la ia, a ke manao nei hoi au ua hoolohe ke Akua i ka pule, a me ka olelo a kona kaikuaana a ua hoohuli hoi ia i kona naau ma ka pono. E aloha mai ke Akua i kona mau makua kekahi.''
                Ua akaka ia'u ke ano o ua palapala la i keia olelo ana a maua, a makemake iho la au e ae aku i kana mea i nonoi mai ia'u, a ike aku hoi i ka mea nana i palapala mai. Ua ae aku la au i ua kanaka maikai la ka mea hanai bipi, e hele aku no au i ka la Feraide, i ka hora i oleloia mai. A pau ka maua olelo ana i ua mau mea kaumaha la ona, a me kona manao iho, hele aku no ia.
                He wahi elemakule maikai no, a ua akaka kona kahiko ana ma ke kino ona, ua paka ka ili o ka maka, ua keokeo ka lauoho, ua oohu ke kua, a ua hele kolo no hoi. I kona hele malie aku hilinai ao ia maluna o ke kooko, o kona hoahele paha ia no na makahiki he nui loa; kupu mai la ka manao aloha, poina ole, maloko o'u.
                I ka manawa i oleloia, hiki aku la au i ka hale pule, a liuliu iho la, kina mai au e hele aku i ka pa o ka hale pule, e halawai me ka poe kanu kupapau. A ilaila no ka poe i alohaia. O na makua kahiko no a o ke keiki kane mua me kona kaikuwahine a me na hoahanau e ae. Ike aku la au i ka maka o ka mea nana i palapala mai ia'u, a aloha au, ua oluolu ia, ua haahaa, a ua oiaio ka manao i ka nana 'ku. Ua kauia mai la ma ka maka ona ka hoailona o ka manao ikaika, me ka hookamani ole, ka oiaio nui, a me ka hauoli ana ma ka pono.
                He mea pono no'u e hai aku i kekahi mea i hanaia ma ka pule ana a makou, i ke kanu kupapau. Oia no kekahi mea hoike iloko o na mea he nui wale, no ka maluhia ana mai o ka olelo pule pono io a kakou.
                He kanaka no kela kauhale ka i hele aku i ka pule, e nana wale aku, a ike wale iho, i kona mea e makemake ai. Aohe ona manao ma ka pono, he kanaka hewa no. A hele aku no ia ma ka lua kupapau, ma ka heluhelu ana i ka olelo ilaila, paa mai la ia olelo iloko o kona naau. Ike aku la ia i kona hewa a me kona make. He manao haalele ole ia ia ia hope mai. Ua ulu no nae, a akaka loa kona huli ana i kanaka no ka Haku. Mai ia hope mai kuhikuhi aku la ia i kela pule kupapau ana i ka manawa i loaa'i ia ia ka manao. No ka lokomaikaiia mai oia, no ka olelo i hoomaopopo ia ia i ka ike ana i ka oiaio maoli. Nolaila ua hoomanaoia mai ia la la. Mai poina hoi ia la i ka poe e makemake ana e hoolohe aku i na mooolelo uuku oiaio a ka poe hune.
                Aole anei i akaka ka pono o ia hana ana a ka Haku? ka i lawe pu mai la ilaila ka mea manao ole, me ka mea malama, ma ia la hookahi no. Ea! ua nui na mea i nalowale ia lakou ka poe i manao ole, i ke alakai ana o ke Akua ia lakou iloko o kana hana ana, me he mea la i paa ai lakou iloko o kona manao hoola, mai kinohi mai.

E! oiaio e wahawaha ana na ala, e hoomana kakou."

                A pau ka pule ana, olelo iki au me na makua, a me ke kaikamahine. I mai la oia ia'u. E noho ana au kekahi mau hebedoma ma ka hale, kahi i make ai kuu kaikaina, a loaa ia lakou ka wahine hoolimalima, nana e pani i ka hakahaka o ko'u kaikaina. A he hauoli ko'u naau ke halawai pu me oe ilaila, a i ole ia, ma ka hale no o ko'u mau makua i kuu hoi hou ana ilaila. Aole no loihi a hoi aku au, he mau pule elua paha. Ke makemake nei au e olelo aku ia oe i ka make ana o kuu kaikaina, oia kau i kanu iho nei.
                Ua maikai kana olelo ana mai, a me kona maka. I aku la au ia ia, aole liuliu a halawai ai hou kaua. Alaila hoi mai nei au ma ko'u wahi. I ko'u hoi mai ana, manao iho la au i na mea i hanaia'i ma ke kanu ana o ke kupapau, kahi a'u i pule ai. Ua hoomaikai aku la au i ke Akua o ka poe hune, a ua pule aku au i lako lakou iloko o ka manaoio, a i lilo ai hoi ka poe waiwai i poe hune iloko o ka uhane.

[Na Richmond, i unhiia e S. W.]

HELU 4.
KA EPISETOLE A PAULO I KO ROMA.
MOKUNA I.—PAUKU 8—14.
Dek. 1—7.

                8 O ka mua; ke hoomaikai aku nei au i ke Akua, ma o Iesu Kristo la, no oukou a pau, no ka mea ua hookaulanaia ko oukou manaoio, ma ka honua a pau.
                9 O ke Akua, o ka'u mea e malama nei me kuu uhane ma ka olelo maikai no kana Keiki, oia ka mea ike no'u, i ko'u hoomanao mau ana ia oukou,
                10 E noi mau ana ma ka'u pule, ina e hiki i kekahi manawa, i keia wa aku nei paha, e hele pomaikai aku wau me ka ae ana mai o ke Akua, a hiki io oukou la.
                11 No ka mea ke ake nei au e ike aku ia oukou, e haawi aku au i kekahi pono ma ka uhane no oukou i hookupaaia'i oukou;
                12 Eia kekahi, e hooluoluia mai hoi au i waena o oukou, ma ka manao lokahi ana o oukou a me au.
                13 Eia hoi, aole o'u makemake e ike ole oukou, e na hoahanau, i kuu manao pinepine ana e hele io oukou la, (aka ua kaohiia a hiki i keia wa,) i loaa mai hoi ia'u kekahi hua mawaena o oukou, e like me ia mawaena o na lahuikanaka e.
                14 He aie au na ka poe Helene a me na kanaka hemahema, na ka poe i aoia, a me ka poe i ao ole ia.
 

O KA HOOMAOPOPO ANA.

                8 O ka mua, a maopopo kona aloha, alaila hoomaka i kana olelo me ka hoike ana ia lakou i kona hoomaikai ana i ke Akua no ko lakou manaoio i ka olelo maikai, a no ke kaulana ana o ko lakou paulele.
                Ma o Iesu Kristo la, ko lakou manaoio nona ko lakou pono a me ko lakou pomaikai.
                Ma ka honua a pau i hookaulanaia'i ko lakou manaoio. Ma ke aupuni nui o Roma a puni, ua kapaia ia o ka honua a pau.