Ke Kumu Hawaii, Volume I, Number 2, 26 November 1834 — Page 10

KUMU HAWAII. (Nov.

ia; aka ua loaa iho nei ia ia ka makemake. Nolaila ua oluolu ko'u naau i ka manao ana aku ia ia. Ua hele paha ia i ka lani. Aia no ia e huipu ana me ka poe anela maikai, e mele aku ana i na mea kupanaha o ke aloha hoola. Ke manao nei au e hiki no ia'u ke olelo aku nona peneia, 'Pomaikai ka poe make, ka i make iloko o ka Haku.'
                "Ua hoike mai no ia ia'u i kona makemake e ai i ka ahaaina a ka Haku, a e hoomanao i kona eha, a me kona make hala ole ma ke kea. Na'u no i olelo aku ia ia, i ko'u mea i lohe ai ma ka loaa ana ia Kristo iloko o kona naau. No ka nui loa o kona nawaliwali, aole ia i olelo hou mai ilaila. Ua oluolu loa mamua aku o kona make ana. Ke manao nei au, ua hele no ia mai keia ao hewa aku, e noho pu me ke Akua.
                "E ke kumu e, mai uluhua oe ia'u, ka wahine hune, naaupo, i ka'u kakau ana aku ia oe. No kou lilo ana i mea ao aku i ka poe hewa ma na aoao o ke Akua, ke manao nei au e aloha mai oe ia'u, a e palapala mai, e ao mai ia'u. Eia ka makemaka nui o ko'u naau, i like ko'u manao ana me ia iloko o Kristo; aia e alahou au ma kona ano, alaila au e maha io ai.
                "Ua hoike mai ko'u kaikaina ia'u i kona, makemake ia oe, e pule oe i ke kanu ana ia ia. O ke kumu a makou i ko makou wahi, aole ia e hiki mai, ua hele ia. E waiho ana no ke kupapau ma ka hale o mea la. O ke kakahiaka o ka la Tusede kona make ana; a e kanu ia i ka la Feraide, i ole ia, i ka la Satude, i ke kolu o ka hora. Ina no ia oe mai kekahi. E palapala mai oe ia'u, e ike au i kou ae ana mai. O ka mea nana i lawe aku keia, nana no e lawe mai kau.

                "NA ELISABETA W—E.''

                Ua mahalo au i ka oiaio, a me ka ikaika o kona manao i hoikeia mai iloko o kela palapala. Aole no i akaka loa ke kakau ana; aka, aole au i wahawaha i ka mea nana ka palapala ilaila, aloha au i keia hoakamailio hou. No ka mea, iloko o ko'u manao, he hoailona keia o ka mea e noho hune ana, me ka ikaika loa o ka malama ana. He manao aloha ko'u i ka loaa ana ia'u keia hoakakau palapala. No ka mea, ua kakaikahi wale e like me ia, ia manawa, ma ko makou wahi.
                Ua manao nui no au i ka palapala ana me neia, he mea la e pono ai kakou. Ua maopopo ia'u ka pono o keia hana no'u iho, a no hai hoi kekahi. O ka palapala ana a me ke kamailio pu ana me ka poe hune malama i ka pono, oia no kekahi hana nana i hoala, a hooikaika hoi i ko'u naau iloko o ka'u hana; a malaila no i loaa'i ia'u ka ike e pono ai ka'u hana iloko o ka'u ao ana'ku.
                A pau ka'u heluhelu ana i ka palapala, ninau aku la au,
                "A i hea la ka mea nana keia i lawe mai?''
                I mai la kekahi, "Aia no mawaho o ka pa."
                Hele aku la au e olelo pu me ia, a ike aku la au he elemakule, he wahi kanaka maikai no, ua hina kona lauoho, a ua loihi ia, alu kona maka, a o ka nana aku ia ia, ua aloha ia. E hilinai ana no ia maluna o ka uhai, a e helelei ana ka waimaka ma kona maka. Hiki aku la au, kulou iho la oia, a olelo mai la.
                "E ke kumu e, na'u no i lawe mai i ka palapala, na kuu kaikamahine no ia oe, aka he hopohopo ko'u o manao mai oe ia maua he mau mea makau ole i ka hoouluhua ia oe.
                I aku la au, "Aole paha. He makemake no ko'u e ae aku ia oe a me kou ohua i keia mea, ina paha i oluolu mai ka oukou kumu ponoi ilaila.''
                E, nana no i olelo mai ia'u inehinei he oluolu loa kona ke loaa ia'u kekahi mea aku, nana e pule i ke kanu ana o kuu kaikamahine, no ka mea, eono mile aku nei kona wahi, a he hana okoa no kana ia la. Olelo aku au i keia i ka'u kaikamahine, a mea mai la kela ia'u, e hele mai au ia oe nei e lawe i ka palapala, ka mea nana e hoomaopopo mai ia oe i keia mea.''
                Kono aku la au ia ia, "E hele mai iloko o ka hale;'' alaila ninau aku la au ia ia;
                "Heaha kau oihana?''
                "E, o ka nui o ko'u mau la, ua noho aku la au ma ke kauhale o mea, eono no mile maanei aku nei. Ua hoolimalima au i wahi aina, a hanai iho la i ka bipi, a o lakou no, a me ka'u piele ana mahope o kekahi i loaa ia'u ka mea e pono ai ko'u ohua.''
                "Pehea la ka nui o kou ohua?"
                "He wahine, ua kahiko loa no, a ua nawaliwali. He mau keikikane elua, a hookahi no kaikamahine. O ka lua o na kaikamahine aloha o'u, ua hala aku nei, mailoko aku o keia ao ino."
                "Ke manao nei au he aho iki ia."
                "Ae, owau no kekahi e manao ana pela, he mea aloha! Aole no oia i hele ma na aoao pono mamua, e like me kona kaikuaana; aka, ke manao nei au, ua ola kona uhane, i ka olelo ana a kona kaikuaana ia ia, mamua aku o kona make ana. E, he mea pomaikai wale ka loaa ana o ke kaikamahine e like me ka'u. Mamua, aole au i manao pono i ko'u uhane, aia olelo mai oia ia'u, a pule mai no'u, a hoike mai hoi ia'u e holo e pakele i ka inaina e kau mai ana.''
                "Ehia ou mau makahiki?"
                "Ua kokoke kanahiku, a o ka'u wahine he oi aku kona. Ua kahiko maua, a ua kokoke pau ka maua hana. O ke kaikamahine a maua, ua haalele ia i kahi maikai ana i noho ai, e hoolimalima ana, a ua hoi mai i ko makou wahi, e malama mai ia maua, a e hana hoi i ka waiu bipi a makou. He kaikamahine hoolohe no, a ua aloha maikai no ia.''
                "O kona mau no ia?''
                "E, aole, i kona wa opiopio, ua lilo wale aku no ia mahope o ko keia ao, o ka lealea, a me ke kapa maikai, a me ka paani pu me na kamalii. E! o makou no a pau, ua naaupo loa ia mamua. Ua manao iho la makou, ina i malama makou i na mea o keia ao, a hana hewa ole aku ia hai, ua loaa ia makou ke ola i ka lani. He mau kaikamahihe launa ole ka maua, a me maua pu no, aole ike i na aoao o ke Akua, a me kana olelo maikai o ke ola; aka, ua hele aku ke kaikuaana o na kaikamahine, e hana hoolimalima, a i na makahiki i hala ae nei, hoolohe no ia i ka pule ma ka hale pule o mea la, na ke kumu e hele ana i kumu na ka poe ma ka panalaau, i hai aku ka olelo. Mai ia manawa mai, ua lilo ia i mea ano hou. Ua heluhelu no ia i ka olelo a ke Akua. Ua noho malie, a ua oluolu. I kona hele mua ana mai, e ike ia maua, ua lawe mai no ia i dala gula. O ka uku no ia o kona hooikaika ana mahope o kekahi. Olelo mai la ia. Ua kahiko no olua, a ua ike no au i ko olua nele. Aole au makemake e hoolilo aku i ke dala e kuai ana i ke kapa maikai, e like me a'u i hana'i mamua, i mea e ulu ai ka hookano, a me ka manao lapuwale. I mai la no hoi ia, o kona makemake e aloha aku la i kona mau makua, no ka mea, na Kristo ia i aloha mai.
                "Pihoihoi iho la maua i kana olelo mai, a makemake loaa maua e noho pu me ia, a kamailio pu, no ka mea, ua oluolu loa ia, a ua lokomaikai. O kona makemake nui e hana maikai mai i na kino, a me na uhane o maua. Aole like iki me ko maua ike ana'ku ia ia mamua. Nolaila maua, na mea naaupo, hoolohe ole, i manao ai, he oiaio no ka pono ana i malama ai. No ka hoolilo koke ana ia ia i mea hou.
                "O kona kaikaina, ua akaaka, a nuku aku no ia ia, ia manawa. I aku la no ia, Ua pupule oe, i kou malama ana i na mea hou nei. Olelo aku la kela, E ke kaikaina, aole! aole au pupule, aka, ke manao nei au ua hoohuliia ko'u