Ke Kiai, Volume I, Number 5, 18 Kepakemapa 1902 — KA NO’A HUNA—E IKEA ANA PAHA? [ARTICLE]

KA NO’A HUNA—E IKEA ANA PAHA?

Ua hele ae ka makai o ka hale C. H. Brown, no na Komisina Amerika, me na palapala kii hoike e huli hele i ka poe i kauoha ia e hiki aku imua o ke Komisina ke hoi mai ]akou. Eia na inoa o ka poe i kii ia Henry E. Cooper; Fred Wundenberg, F. W. McChesney, C. Bolte, Andrew Brown, Henry Waterhouse, William O. Smith, Theo. F. Lansing, L. A. Thurston, John Emmeluth, Wm. R. Castle, J. A. McCandless, S. B. Dole, S. M. Damon, J. O. Carter, Samuel Parker, Chas B Wilson, John E. Bush, Robert L. WIlcox, David Kawananakoa, Jonah Kalanianaole, Charles L. Hopkins, J. L. Kaulukou, Lot K. C. Lane, J. K. Prendergast, John A. Cummins, John F. Colburn, Abraham Fernandez. E ikea ana anei i ka noʻa huna? Pela iho. Ua hoopii hou ia o B. H. Wright no ka nalowale ana o $5,000, a oi aku. He hihia okoa keia mawaho ae o ka hihia mua. Ma kakahiaka Poakolu nei i holo aku ai ke Claudine a maluna ona i kau aku ai na Komisina Amerika. Ua hoomaka i ka Poakahi nei na kula a pau o Kapunahou. O na haumana o ke kula nui e halawai mau ana lakou ma ka Pauahi Hall, o na haumana o ke kulakumu mua, ma ke keena halawai o ko lakou hale kula hou; o na haumana keiki liilii, ma ke keena buke, na Miss Hall e malama ia lakou ma ka hora 8:35 a.m. E hoomauia ana keia kulana no ka makahiki holookoa, ke ole e hoololiia.

O ka Moiwahine Liliuokalani, na Keiki Alii Kawananakoa ame Kalanianaole, na malihini hanohano, mawaho ae o na Komisina i hiki ae i ka luau a ka Elele R. W. Wilikoki. Mahope o ka noho ana me ka hauoli ma Kalihi Camp no kekahi mau mahina elua ma ke ano mahuka ua hopuia o Sam Paulo, ka lua o na keiki Hawaii o na keiki eha i kepaia iluna o ka mokukaua Mohieana, no ka haalele i ka moku. I ka wa kinohi o ka noho ana o keia poe ma ka moku, ua makemake lakou i na hana, aka mamuli o ka ikaika loa o na rula hoomalu, ua mahuka elua, a koe elua iluna o ka moku. He sela ke kulana o keia wahi keiki, no ka papa ekolu.