Ke Kiai, Volume I, Number 5, 18 September 1902 — Page 6

6  KE KIAI, SEPATEMABA 18, 1902

NUHOU KUWAHO

                Peking, Sept. 10—Ua ao aku o Paulo Lessar, ke Kuhina Rusia maanei i ke Alii Koa Kiai Rusia e noho nei ma Manchuria, e kipaku aku i na poe Pelekane a pau olaila oiai keia wa e hoomalu ia nei o Manchuria malao o ke Kanawai Koa. (Ke uwalu aku nei ka Bea Rusia i ka Liona Pelekane.)

                Rio Janeiro, Sept. 10—Ua ili ka Mokukaua Iowa ma kahi e kokoke ana i ka Lae o Nossa Senhora do Desterro. I ka hoomaamaa kiki pu ua mokukaua nei, a i ka huli hoi ana aku i ili ai. Ua hoouna aku kekahi o na Kuhina o Berazila i kekahi mokukaua e hele e kokua.

                Chicago, Sept. 10—Mahope o na makahiki loihi o ka noii ame ka imi ana ua kukala akea ae o Prof. Hough, aia no he mau mea hanu ola ke noho nei maluna o Mars, Venusa, ame kekahi mau hoku e ae.

                Roma, Sept. 14—Ua kaena ae o Marconi, ka mea nana ka telegarapa me ka uwea ole ua hiki iaia ke hoouna i na olelo ma kahi o 1500 mile ke kaawale, a he manawa pokole wale no koe a hui o Amerika me Europa ma ka telegarapa uwea ole.

                Kingstown, St. Vincent, Sept. 4—Ua uhiia iho ka mokupuni me ke ao i piha i ku uwila, a ua hoonaueue ae ke olai a ua kahe hoi na muliwai pele. Kau ka weli. Mai ka hora 9 o ke ahiahi ka hoomaka ana a hiki i ka hora 5 o ka wanaao akahi no a mahie iki ae.

                Nu Ioka, Aug. 30—Ua hoi mai o Vern O. Churchill ma ka mokuahi Majestic. Ua pili oia me Paul Boynton e holo oia a puni ke ao nei iloko o iwakalua mahina, a he 5 keneta wale no ma kona pakeke, na Adimarala Dewey i makana mai iaia. O kekahi hapa o ka pili e uku oia i kona mau lilo ponoi a pau a e hoihoi pu mai i $2000 ma ke dala ma ke daimana paha. He elua wale no la i koe a pau ka pili a ku mai la oia a eo iaia. He kaha kii kana hana i lehia a pela i loaa ai iaia ke dala no kona mau lilo, a ua oleloia oia o ke “kaha kii uwila” no ka holo i ke kaha kii.

                Kingstown, St. Vincent, Sept. 6—O na nanaina ma ka aoao makani o keia mokupuni, me e ka weliweli o ke kumu, mamuli no ia o ke pahu ana o Saufriere ma ka la 3 o Sept. O ka muliwai o Rabacca, he maliwai ahi ia i keia wa, nona ke akea he hapaha mile. Mailalo ae o ua muliwai ahi nei, ke pii la ka uahi ka mahu, na pohapoha pele ame ka lepo. Ma kekahi lono, ua emi iho ka mauna i keia wa mamua o kona kulana i ka la 3 o Sept., a ke nana aku aole o kana mai ke awaawa.

                Seattle, Sept. 8—Ekolu mau luapele o Alaseka e a- nei i keia wa, a he nani ke nana aku.

                Paris, Sept. 9—Ua hoikeia ae he lono telegarapa mai ke Kiaaina ae o Martinique ke hoomakaukau nei o na kanaka e haalele i ka aoao Akau o ka mokupuni.

                Ladana, Sept. 7—Ua loaa he lona mai Napela mai e olelo ana ke pii ikaika loa nei ke ahi mai loko ae o ka luapele o Mauna Visuviusa i ke kakahiaka Poaono nei.

                Nu Ioka, Sept. 9—Mamuli o kekahi lono pepa, e olelo ana no ka nalowale ana o ka mokupuni o Bermeja ma ke kaikuono o Mekiko. Ua olelo hou ia, o na mauna pele o Mekiko, Yucatana ame Guatemala, ke a hou nei.

                Roma, Sept. 9—Ua poha ae ka luapele o ka mokupuni o Stromboli, a ke lele la ke ahi a me na pohaku. A ua uhi paapu ia ka mokupuni e ka uahi. He mau hoailona ko Mauna Visuviusa o ka pii ikaika ae o ke ahi.

                Wasinetona D. C., Sept. 10—Mai ia Ernest G. Walker mai i ka P. C. Advertiser e olelo ana: “Ua hooholo ka Peresidena e hookohu aku ia John T. De Bolt o Honolulu i Lunakanawai no ka Aha Kaapuni. He mau la i hala ae nei, ua kauoha aku oia i ke Keena Hookolokolo e hoomakaukau i ka hookohu, a hoouna aku i Oyster Bay no ke kakauinoa mai o ka Peresidena.

                Ke hoohanaia nei ma ka Muliwai Elebe he kaulahao i hoomoeia ilalo o ka muiiwai nona ka loihi he 290 mile no ka huki ana i na waapa 180 kapuai ka loa mai kekahi aoao a i kekahi. Aia iluna o ka waapa ua hanaia he mahu i hiki aku ka ikaika huki i ka 200 lio. O ke kaulahao, ua pii mai ia mamua o ka ihu, a maluna mai o na pokakaa, a hiki i ka pahu hoopaa kaulahao, ma keia pahu i pokaaia’i ke kaulahao ekolu wili, alaila ua moe loa aku la ke kaulahao a hiki i ka hope o ka waapa, a moe loa aku ilalo o ka hohonu. E kauo ana keia mau waapa he 5 kao i ka wa hookahi, ma ka 1500 tona ukana o ke kao.

H. W. FOSTER & CO.
Poe Hana GULA
Na Waiwai Hoomanao Makamae
Me na Opuu DAIMANA

Maiau ka Hana ana i na Uwati Poino
Pahu Leta 834, 158 Alanui Hotele, Honolulu, T. H.

HUI HAWAII
Hana Wai Momona Maikai Loa

Ma ke kihi o Alanui Ema me Waina
E INU I KA WAI MOMONA loli ole o kona Ono Maikai.
Hookani i ka Telepona Blue 1871 a i ole no hoi, e kipa ae no ma ka Helu 1425, Alanui Ema, o kahi ia o ka HAWAIIAN SODA WORKS

Waiu! Waiu! Waiu!
WAIU MAKIKA me ka WAIU BATA

He loaa ka Waiu ma ke kuai nui a me ke kuai liilii ma na wahi Uwi Waiu o keia Mokupuni.
E makaala i ka inoa
HONOLULU DAIRYMEN CO., Ltd.
Telepona White 241. Keena, Sheridan St

E hoao oe i ka makou
Mau Mea maikai, aohe
Makeke e ae e loaa ai
ia oe
Na I’o Pipi Palupalu, Puaa, Hipa, Waiu-Paa, Waiu-Paka
A me kekahi mau mea hoonoono e ae o ka Papaaina
E KIPA MAI
METROPOLITAN MEAT CO.
Telepona Main 45 Alanui Moi

HALE AINA “BEAVER”
H.J. Nolte, ka Ona
Alunui Papu, ma Ewa mai o kahi o Waila Ma

HELU EKAHI NA MEA AI, me ke KI, KOPE, WAI MOMONA, WAI AWAPUHI me ka WAIU.
MAI KA HORA 7 A. M. A KA HORA 10 P. M.
He makaala loa ia ka makemake o ka poe Boroka