Kuokoa Home Rula, Volume VI, Number 32, 7 ʻAukake 1908 — Ua Hala! Ua Maha! [ARTICLE]

Ua Hala! Ua Maha!

Ua kuu aku la ka luhi i ka la i Olepau, ua pau ka ike ana i na ehaeha --- Aloha. Ae, ma ke ahiahi Poaha nei, Augate 6, 1908, i haalele mai ai o Mrs. Kenoiaina Gandall i keia ao inea ma ko laua home noho ma Kakaako, a malaila no na ohana he nui i haawi ai i na pulama ana a hiki i ka hala wale ana aku la o ka uhane i ke ala hoi ole mai me ka minamina nui. He loihi na la o ka hoomailo ana o ka nawaliwali ma kona kino, me ka nui o na ehaeha ana i hoomanawanui ai. He mea nui iaia ke kane, na keiki ame ka ohana, a he makuahine piha heahea i na hoaloha. Ae, ua anu ka hale, ua koekoe, ua hala aku la i ka napoo'na la, ua hele mimo aku la, hele nehe i ke ala polikua a Kane i kukulu o Kahiki. Ua hanauia oia ma Mahukona, ma ka makani Apaapaa o Kohala, a ua piha iaia na makahiki i ka aneane kanalima a hala aku la, Oia kahi lala o ka Ahahui Kaahumanu. Ua ko kana mea i olelo ai - "E make au mamua o ka hoi ana o kuu kaikamahine i Kumukula no Kau, Hawaii, i hooponopono mai oia ia'u a nalo au." Na ke Akua mana i hana, Nana no i lawe aku. Ke komo pu aku nei makou i ke u ana me ke aloha no ke kane i nele i ka wahine ole ame na keiki i hooneleia i ka makuahine ame ka lehulehu o ka ohana - Aloha luuluu paumako no Mrs. Kenoi-aina.