Ko Hawaii Pae Aina, Volume XII, Number 8, 23 Pepeluali 1889 — SAMUELA KAAIKAULA [ARTICLE]

SAMUELA KAAIKAULA

Ua make oia ma Kohanaiki, Kona Akau, Hawaii, i ka Poaono, Feberuari 16, 1889. Ua haalele mai i ka poai o ka oihana, na makamaka a me na hoa'loha he nui iloko o ke kanakolu a oi o kona mau makahiki. Ua hoohala ia kona mau la i kaa hope ae o ke ola ana iloko o ka nawaliwali a ka ma'i hano i hoomailo loihi ma kona kino. Ua nele oia i na hooluolu kapono ia a me ke ola maikai ma o na lawelawe lapaau ana he mau makahiki i kaa hope ae. A no ka malama a oi i hala koke aku la no, ua loaa ke anu ikaika iaia nana i hoonawaliwali aku i kona kino; me keia mau popilikia papalua, ua au hookahi aku oia no Kona,

no ka hoolana ana me kahi manaolana hope loa, me ke aho mauliawa a me ke kino palupalu, he elua pule a oi i hala koke ae. A ma Kohanaiki, ke one hanau hoi o kona mau luaui, kuu ilina la oia i kona mau haawe inea a me ka luhi, a moe aku ia i ka hoomaha mau loa o ka maluhia. Ia makou e ukali ana no na hoomanao walohia nona, ua kikoo hope ae makou i kona mau la o ka laulima pu ana iloko o ka oihana pai palapala. Ma kona hokua, ua auamo oia i ke kulana laha hooponopono no keia nupepa me ka mikiala a me ka mahalo nui ia. Ua loaa iaia na hoomaikai ana he nui, a no ka pomaikai o kona hoa lahui. Ua lawe ae oia i ke kulana o ka hoomalamalama aku ma ka noho haku ana no ka nupepa "Ka Hoku o ke Kai." Ano, ua nalo aku kekahi limahana i aloha a i mahalo nui ia o ka poai o ka oihana pai palapala.

Iwaena o na launa ana, he hoa oia i helu ia iwaena o ka papa o na keonimana oiaio. He lala karistiano oia na ka Ekalesia makua o Kawaiahao, he Kakauolelo no ka Ahahui Opiopio Imi Pono Karistiano o ka Paeaina, a oia kana hana koikoi hope loa i lawelawe ai a hiki i kona make ana aku la. Oia kana mau hana maikai i hookamaaina mai ia Hawaii a Kauai @@@@@@@@ @@ @@@@@@@@ o na hoa'loha.

Ke lawe nei makou i ke kulana o ka hoike aku me ka paumako a me ke aloha luuluu, o Samuela Kaaikaula i aloha nui ia, ua nalo oia mai keia ao, a e hoea hou mai ma kela ao. E halawai pu lakou me ia ma kela kapa o ka muliwai. He kanaka oia i hanau ia mai na ka wahine, a pela i pokole ai na la ma ka honua. He pua Hawaii oiaio oia i hanau ia mai na Mrs. Debora a me Mr. Kaaikaula, maluna o kekahi mokupuni ako'ako'a he mau haneri mile ka mamao mai na palena aku o ka Paeaina Hawaii, aia nae iloko o Samuela ka manao maikai o ka ikaika a me ka iini paa e hana no ka pomaikai o kona lahui oiwi - ua hooikaika iloko o na keakea he nui a hoomaha wale aku la. A waiho mahope nei kana mau hana a pau i kiahoomanao poina ole. - "E hoomaikai ia ke Akua Kiekie!"