Ko Hawaii Pae Aina, Volume IX, Number 47, 20 November 1886 — HAWAII MA KE AKEA. [ARTICLE]

HAWAII MA KE AKEA.

Ua piha na nupepa o Kapalakiko mahope koke o ke ku ana aku o ka ona miliona, i na olelo e kaulai ana i na

hana i lawelawe pono ole ia e kakou iloko o keia mau makahiki mai nei. Ua puka pu ae hoi kekahi mau mea malu i hanaia ma ke kuono me ka manao e nalo. He mau mea ehaeha no ka poe e aloha ana ia Hawaii nei ka hoolaha akeaia ana o kekahi mau hana ekaeka, e lilo ai i mea e kamailio inoinoia ai ma na aina i noho hoaloha me kakou.

He manaolana ko makou, e lilo ana keia mau hoolaha ino ia ana o kakou, i haawina maikai na ka poe e ku nei ma ka hoeuli o ko kakou aupuni e noonoo iho ai, a hookele aku me ke kuamoo e pelukua ole ai i hope, mamua o ka lilo ana aku o ko kakou inoa maikai a noho ana kuokoa. Ua pinepine ke kukala ana o keia pepa, no na hopena ino e hiki mai ana, ma ka lawelawe pono ole ia ana o ko kakou aupuui i ka wa i hala, me ka maopopo no ia makou e hoea mai ana na hopena awahia. Aohe i liuliu, a ua puka io mai ia hopena. I keia wa, aia he ekolu Hawaii iloko o ka aha kuhina, a he mea pono ia lakou e noonoo me ke akahele no ka aina a me ka lahui. Aole he mea maikai ia lakou e hoopili wale aku ma na hookekenaia mai e hana penei a me keia ae, me ka ike no he poino aku o hope. He oi aku ka hanohano o ke kanaka e waiho ana i ka hana ke kue i ka mea a kona lunaikehala i apono ai, mumua o ka noho wale iho no i ka oihana ma ke dala ka helu.