Ko Hawaii Pae Aina, Volume IX, Number 45, 6 November 1886 — KA HOPENA O KE APUKA. [ARTICLE]

KA HOPENA O KE APUKA.

Berelina, Oct. 23.—Ua hopu ia mai nei o Baron Otho Von Schleinnitz, ke keiki hanauna a kekahi Kuhina i make o Geremania ma ia inoa, a he lala no ko ka Emepera Wiliama alo alii. Ua hopu ia ma ke ano he agena oia i hui me kekahi poai e aihue dala mai na poe waiwai a i hanau alii ia, a me ke kalewa hele ana e kuai i na inoa hoohanohano a me na kea hoohanohano. O Schleinitz, he kapena oia iloko o ka puali koa kiai kino o ka Emepera. Ma kona pili waiwai ua pii ka pomaikai iaia. Ma ka ike ia ana o keia karaima ona e na makai, ua hoomahukaia oia e komo i Farani, no ko na makai aloha i ka makuakane hanauna ona e ola la ia wa. I ka wa i make ai ka makuakane hanauna, ua imi ia aku nei oia a loaa i Enelani, a malaila i hopu ia ai oia no ke kakau apuka ana i kekahi bila kikoo piepiele no ka 2,400 dala Geremania ka nui. Ua laweia mai oia malalo o ke kuikahi i ae ia no na poe hana karaima. I ka lohe ana o Lang, kekahi mea i komo pu iloko o keia hana apuka, ua kaawe iho la oia mahope o ka lohe ana ua hopuia o Schleinitz. O na make o ke kulanakauhale nei no ka malama o Okatoba i hala, he 1 Pukiki, 2 Beritania, 3 America, 12 pake 25 Hawaii a he 1 o na lahui e ae.