Ko Hawaii Pae Aina, Volume IX, Number 45, 6 November 1886 — HOOMAAU A RUSIA I NA IUDAIO [ARTICLE]

HOOMAAU A RUSIA I NA IUDAIO

Wasinetona, Oct. 4.—Ua waiho mai ke Kanikela America Young e noho ana ma Sana Peteroboro imua o ke Keena o ko na aina e ma Wasinetona, i kana hoike no na pono o na Iudaio ma Rusia, oiai he mea kupono ia no ke kaana ana o na Iudaio e noho ana ma America Huipuia. Ke olelo mai nei ka hoike, o ka nui o na Iudaio make ao holookoa, aia ma kahi o ka 7,000,000 a mailoko mai o keia heluna, aia ke noho la ma Rusia he 350,000. Ua hoikeike mai oia i ka nui o na ino, na hoomaewaewa a me na hoomaau i hana ia aku i na Iudaio o ia aina. Ua kipaku a hoilihune aku ke aupuni o Rusia

ia 1600 Iudaio e noho ana ma na kulanakauhale o Rustow a me Pagamog. Mahope mai nei, aia maloko o keia mau kulanakauhale e noho ana he 2,000 Iudaio. Mamuli o na noonoo kilo aupuni, ua hoohuiia aku lakou ma ka apana kanawai koa, kahi e noho mana ana na rula hooponopono kue Iudaio, aka ua kuahauaia o na Iudaio e ola kuonoono ana ma ka waiwai, e noho lakou me ka hoopilikia ole ia aku. Ma keia kuahaua, ua ae ia he 400 Iudaio e kuai maoli ana i ka pono e noho ai lakou ma na home, oiai hoi kekahi poe e ae, he poe ilihune a hiki ole ke loaa keia pono, ua kipaku ia aku e hele auwana. O na Iudaio o na aina e ae e komo mai ana iloko o Rusia, ua papa loa ia, aia wale no ka ae ia a hele mai lakou me ka hoohiki e noho ma ka lawelawe oihana kalepa ana ma ke ano laula. O ka poe wale no i kaa ae mawaho o keia rula papa, oia na Rabi a me na poe akamai ma ke kakau o na lahui e i hoounaia mai ma na inoa o na aupuni, a me na kula kiekie, kai ae ia e noho ma Rusia e ke kuahaua o 1843. Ua mahele ia ka emepire i elua mau apana nui, oia hoi hookahi apana i ae ia ai na Iudaio e noho, a ma kekahi, ua papa loa ia. A o na kanawai e pili ana i keia lahui, ua huikau, a i kekahi manawa ina ua manao na luna aupuui e kipaku ia lakou ua hiki no.