Ko Hawaii Pae Aina, Volume VIII, Number 4, 24 Ianuali 1885 — WAPAA KAHULI MA KA MOANA [ARTICLE]

WAPAA KAHULI MA KA MOANA

Wailueu, Jan. 16, 1855 Aloha oe:—I ka Poalua la 13 i hala iho nei, holo mai o Kaluaaha mai Molokai mai ma ka waapa i Wailuku nei i ku ai ia, oia a me kona mau hoa ekolu a kakahiaka Poakolu hora 7 a 8 paha hoopuka ae la i ka waapa mai Kahului ae e hoi ana i Molokai, mawaho aku paha o Kaihuwaa ma kahi i kapaia o Kapoipoi, ua poi ia iho la ka waapa e ka nalu a o ka make iho la no ia, naha ka waapa a no na kanaka au iho la ilalo ike aku la o N. P. Nuuhiwa e au ana i ke kai, holo aku la ia a kena ia Mahiai e au me ke kaula e hoopakele i kela poe pilikia, au aku o Mahiai me kana wahine a loaa lakou la ekolu ua piholo iho la ka ha o ke kanaka, huki ia mai la ka poe ola i uka o ka aina, o ke kanaka i make, ua nalowale loa, o ka waapa ua nahaha kekahi aoao. O ka lua keia o kona kahuli ana, ma Pailolo lakou me Kalua ma, a ma Wailuku nei hoi, he mau kaulahao wale no ke kaawale mai kauhale aku. E noonoo e ka makamaka i ko ke hope. Iloko o ko Iehova lima na mea a pau, malie ua hoopakele ia oe i loaa he wa e mihi ai e waiho i kau mau hana a pau i mua Ona. W. P. Kahale.