Ko Hawaii Pae Aina, Volume V, Number 28, 15 Iulai 1882 — HE MANAO ANO NUI NO KEKAHI KILO AUPUNI HAWAII. [ARTICLE]

HE MANAO ANO NUI NO KEKAHI KILO AUPUNI HAWAII.

I KA LUNA HOPONOPONO Iloko o keia manawa, ke ike nei kakou i ka hoomahuahua loa ia ana o ka Bila Haawina iloko o ka Ahaolelo no na koa, a me na mea e hoohiehie wale ai i ka nohoʻna Moi, me ka hoohalahala ole o na makaainana, no lakou ka hookaa ana o keia mau lilo. Aole pela ka manao o ka poe mua, na lakou i kokua i naʻlii ma ka hooponopono Aupuni i ka wa kahiko ma Hawaii nei. Ua heluhelu au iloko o ka Buke Moolelo Hawaii, nona ka inoa "Honolulu" i kakauia e ka wahine a Kauka G. P Judd, i ka makahiki 1861. "O ka mea nui e pono ai keia lahui, aole he mau puali koa kumau, aole hoi he aie nui mai na aina o mai, e hookaa aku ai i na lilo aupuni. Aole hoi o ka hoakea ana i ka manao na makaainana, aole hoi i mau kanawai hou aku, aole hoi o ka hoemi ana i na auhau, aka, i hanauna makuahine Hawaii haumia ole, i hoolakoia me ka Palapala Hemolele ma ka lakou olelo ponoi, a e malama ana i ka pule ohana, me ka makemake ole i na mea mai no aina e mai e hookano wale ai lakou, aka he poe wahine miki i ka hana me ko lakou mau lima ponoi i ua mea a pau e pono ai ka ohana."

"Pakolu ka pomaikai o ke kane, a ahine paha, i hiki ke hahai ia kana mau alakai ana, a i makaukau e kikoo aku i kona lima i kanaka Hawaii a kokua iaia ma kana hooikaika ana e pii ma ke alanui e loaa ai ka hoonaauao kristiano." Ke manao nei au na hooiaio ia keia mau olelo iloko o na makahiki he iwa-kalua-kumamakahi mai kona kakau ia ana a hiki i keia la. AUWAIOLIMU.