Ko Hawaii Pae Aina, Volume V, Number 28, 15 July 1882 — KA HOPENA O KA AIE KAA OLE. [ARTICLE]

KA HOPENA O KA AIE KAA OLE.

Ke noho uoi o Aigupika iloko o ko kulana kipikipi. O ke kumu o ke Aliikui mua o Aigupika, mamuli o kona uhauha a me ka hana naaupo, ua kauoia ka lahui o Aigupika iloko o ka pilikia mamuli o ka aie dala nui ana ia Enelani a me Farani, i loaa ai ke dala e hoohana ai i kana mau kumuhana puhikole. Mamuli o ke kupilikii o ke kulana o ke aupuni i keia wa no kela mau hana uhauha a ke aliikui mua, nolaila ua kono ia na lima hooko o ke aupuni o keia wa e kau koikoi aku i na auhau malu-na o ka lahui me ka manao e hookaa i ka aie. Ua hoao iho nei ke aliikui o keia wa, oia o Tewick e lapaau i keia mau pilikia. Ua ae aku oia i na komisina mai Farani a me Enelani mai e hooponopono i na oihana waiwai o ke aupuni. Aka, no ka lili loa o kela lahui no ka noho hoomalu mai o na haole maluna o lakou, nolaila ua makemake nui ka lahui e kipaku aku i na haole mai ka aina aku. Eia no ka puali koa holookoa malalo o ka mana o Arabi Bey, ko kuhina kaua, a ke hoomakukau nei oia no ke kaua Ke noho alii nei ka pioloke ! Ua ala mai na kamaaina i keia wa e pepehi aku i na haole, a ua pau aku kekahi poe Europa iluna o na manuwa o ko lakou mau aupuni iho e ku kokoke ana ma Aigupika me ka pupuahulu a me ka pakele mahunehune o na ola, A ma kekahi lohe, ua hiki aku i ka 304 na haole i pepehi mawaena ia e na kamaaina. Pehe la kahi Hawaii uuku i keia wa, e ae ana anei kakou e alualu aku mahope o na kapuai aie kaa ole, haunaele, kipikipi a me ke kuapapanui o Aigupika!