Ko Hawaii Pae Aina, Volume IV, Number 35, 27 August 1881 — KUU LEI MAE OLE UA HALA. [ARTICLE]

KUU LEI MAE OLE UA HALA.

E ko Hawaii Pae Aina; Aloha oe: - Me ka walohia ka maka o ka'u peni e noi aku nei i kahi kaawale o kou kino lahilahi i wahi no'e e hoike aku ai i na kini o ko'u aloha, o Miss Mary Paele Keoni, ua hala. Ua hoopukaia mai oia i ke ao nei e ike a e kilohi i na papalina unounou a ohaha o ka honua mai ka puhaka maemae mai o kona mau luaui; o Kaonohi ka makuahine a o Keoni Keliiaa ka luaui makuakane, ma ka la 17 o Iune, 1864, ma ka pohu lai o Maliko, a he hiwahiwa hoi oia na kona mau makua. Aka, i na la opio wale o ka laua kamaiki, ua kii mai la na lima menemene ole o ka make a lawe aku la, ua loihi kona wa iho ana i ka mai no eha malama, aka, aole nae i waiho wale ia aku me ka nana maka aku, ua kii ia no ke kauka haole ma Wailuku, ua nana no a hoole mai no aole e ola. No ka nui o ko maua aloha iaia no kona haalele ana mai ia maua i na makua a me na hanau mua ona, a me na pokii a me na kini makamaka a paiauma aku ana ma keia aoao o ka lua pae o ka make, no laila, ua haku iho makou i wahi kanikau nona, oia keia: He kanikau aloha keia nou e Mary Paele Keoni Aloha ino no kuu kaikamahine Kuu kaikamahine mai ka lai o Maliko Kuu kaikamahine mai ka malu hale o Haleola Kuu kaikamahine mai ka ai uahi ole a ka haole Kuu kaikamahine mai ka hale keiki nui ke noho - a Auwe kuu keiki kuu lei mae ole ua hala a Kuu kaikamahine mai ka la wela o Haiku Kuu kaikamahine mai ka hale piha i na haole Kuu kaikamahine mai ka ihu o ka lio Kuu kaikamahine mai ka ai hooikaika kino a ka haole Auwe kuu lei kuu kaikamahine - a Kuu hoapili o ka ua me ka la o ke anu me ke koekoe Koekoe ka po ua hala oe e ke keiki Kuu kaikamahine mai ka ua liilii la e Lilikoi Aloha ia wahi a kuu kaikamahine e hele ai Kuu kaikamahine mai ka ua ulalena o Piiholo Kuu kaikamahine mai ka nahele la e Puukii Ua kiia mai oe e ka make ua lilo Ke imi nei au ia oe aole he loaa Aloha ko leo i ka pane ana mai E papa e- huli mai kaua Auwe kuu kaikamahine hoi Kuu minamina pau ole ia oe a Auwe kuu lei haule ole - a KEONI KELIIAA. He kanikau aloha keia nou e Paele Keoni Aloha ino no kuu kaikamahine Kuu kaikamahine mai ka piha kanaka e Paia Ke nunua ae la i ke kaa ahi Aloha ia wahi a kaua e hele ai Kani ma ke oeoe o ka holo ia Kau aku makou me kuu kaikamahine O ka oni palanehe ole a ka huila o lalo O ka hakinua a ka uahi i ke kula Hiki aku kakou i ke one o Kahului Ike aku i ka huikau a na kanaka Kuu kaikamahine aloha He waimaka ka'u e puolo nei Auwe kuu minamina pau ole ia oe - a Kuu kaikamahine mai ka malu hekuawa o Wailuku Mai ka huikau lua a na kaa lio ke holo I ka oni a na huila malalo na lai no Kilohi aku kaua o ka nani o na halekuai Ike aku kaua i na wai panio a ka haole Io ia nei kaua i ko makemake Aloha ko leo i ka pane ana mai E mama e - e hoi kaua Auwe aloha ino kuu kaikamahine Kuu kaikamahine hoapili o ka moana Na ke Kilauea kakou i lawe aku O ka ale a Alenuihaha e holu ana O ka halulu a o na pea ko luna Aloha ko leo i ka pane ana mai Maanei kakou ma ka mehana Hala ae Molokini kaa mahope Au aku o ke kai loa o Kawaihae Aloha Waipio i na pali huli lua Aloha Hilo paliku i na hale wiliko Aloha Hilo one i ka ua Kanilehua O ia ua loku mai iluna o ka lehua Auwe kuu kaikamahine a Aloha Wailoa i ka nuku a ka manu Aloha ia wai a kakou e auau ai Aloha Paikaka i Waiolama Aloha ia one a kakou e hele ai Aloha Mokuola e au ana i ke kai O ia kai a kakou e auau ai Aloha kanakea i ka wai au O ia wai huihui a kakou i ike ai Aloha Panaewa i ka moku lehua O ia ulu lehua a kakou i hele ai Akahi la a ke aloha i hiki mai ai Ke maeele nei i ke kino Ke hui nei i ka manawa Auwe kuu mea aloha a Kuu kaikamahine mai ka wai huihui o Wailuku Kuu kaikamahine mai ka papa kahulihuli i Kaluakanaka Aloha ia wahi a kakou e hele ai Aloha Punahoa i ka piha kanaka O ia wahi a kakou e luana ai Kuu kaikamahine mai ka ua noe o Laa Aloha ia wahi a kakou i noho ai

Kuu kaikamahine o ka uka o Kaluaopele Oia wahi anuanu huihui a kakou i noho ai Kuu kaikamahine mai ka niu moe o Kalapana Aloha ia wahi a kakou i luakaha ai Kuu kaikamahine mai na pali huli lua e Kapoho uka Aloha ia wahi a kakou i noho malihini ai Kuu kaikamahine mai ka malu hale e Waiakea Aloha ia home a kakou i noho aku ai Kani ke oeoe holo o Kilauea E kahea mai ana i na ohua O Kilauea ka moku o Maui ka ihu Ike i ke one hanau o kuu kaikamahine Auwe kuu mea aloha ua hala - a MRS. KAONOHI. He kanikau la he aloha Nou no la e Paele Keoni Kuu kaikamahine mai ka ihu o ka lio Mai ke one wali la e Kahului Na ka iho o ka lio kaua i lawe aku Ike ia ai Wailuku he kaona nui He nui oe he hiwahiwa na ka makua He lei mae ole i na kau a kau Akahi kau a ke aloha i hiki mai Auwe kuu kaikuahine - e Kuu kaikuahine i ke kula loa o Waikapu Pupue aku kaua o ke anu o Maalaea Hoopumehana i ka poli o ka makua Aloha ia wahi a kakou i luana ai E nana aku ai i ka holo mai a Kilauea Oia moku nana kakou i lawe aku Hookahi no ale ka ilikai ana iho Pulupe oe me na makua o kaua Kau aku ka manao e ike Ia Hawaii moku o Keawe Hiki kakou i Kawaihae Wehe e ke alaula o ke ao Auwe kuu kaikuahine - e Kuu kaikuahine i ka lai o Hilo Oia aina malihini a kakou i noho ai He nui makou na kaikuaana Hookahi hoi oe kaikuahine Noho i ka hale kuleana ole Aloha ia wahi a kakou e nanea ai E auau i ka wai o Wailoa E walea ai i ka lai o ke kaona Me ka ua kaulana o ua aina la

Auwe kuu kaikuahine - e Kuu kaikuahine i ka uka Olaa Aloha ia wahi a kaua e luana ai Hoolohe aku kaua o ka leo o ke Kahuli I ke kani hone mai iluna o ka laau Kau aku ka manao e ike i ka lua o pele Oia wahi makaikai ia e ka malihini Aloha ia wahi a kakou e hele ai E ike i ke ahi kaulana a ka wahine E noho aku ai kakou i ke kae o ka pali E nana ana i na hana kupanaha a ka pele Haalele kakou no ka home nani o ka wahine Huli hou aku no ka paia ala o Puna E walea ana i ke onaona I ka mapu aala o ka hinano Aloha ia wahi a kakou i hele ai E ike i ka niu holu o Kalapana Oia niu makaikai ia e ka malihini Kuu kaikuahine i ka lai o Kaimu Aloha ia -vvahi a kakou e luana ai Kuu kaikuahine i ka pohu lai o Kapoho Aloha ia wahi a kakou i luakaha ai Noho i ka hale makamaka ole Hookahi no makamaka O ka leo a o ka makua Auwe kuu kaikuahine - a P K KIKOOPAOA, JR. He kanikau la he aloha Nou no la e Paele Keoni Kuu kaikamahine mai ke kula loa o Pauwela Aloha ia wahi a kakou e hele ai Aloha ka pua o ka Laniuma Oia lei hoomanua i ka ai Kuu kaikuahine mai ka wai haaheo a ka Mihona Auwe kuu kaikamahine Kuu minamina pau ole - a Kuu kaikuahine mai ka piina ikiiki la e Kailiili Ilihia iho nei loko i ko aloha Aloha ka leo o ke Oeoe hone i ke aumoe Oia oeoe kaniku mai i ke awakea Akea kakou ua hala oe Auwe kuu kaikuahine Kuu minamina pau ole - a Kuu kaikuahine mai ka huikau lua e na lio Lilo aku oe i ka mea ike ole ia Noho makou me ka u me ka minamina ia oe E huna ae ana i ko aloha aohe nalo Auwe ku kaikuahine Kuu lei mae ole - a NAHINU PIOHIA. He uhane la he aloha Nou la a e Paele Keoni Kuu kaikaina mai ka ua ukiukiu o Makawao Kuu kaikaina mai ka ua ulalena i Piiholo Kuu kaikaina mai ke kula mehameha o Mekiko Kuu kaikaina mai ka nahele paoa i ke ala o Lilikoi Kuu kaikaina mai ka piina loa o Kauhikoa Aloha ia wahi a kaua e hele ai Kuu kaikaina mai ka piha kanaka o Haiku Kuu kaikaina mai ka ai uahi ole a ka haole Kuu kaikaina mai ka la wela o Pauwela Kuu kaikaina ma ka ai houlaula papalina o ka aina Auwe kuu kaikaina kuu minamina pauole Kuu kaikaina mai na pali hulilua o Maliko Kuu kaikaina mai ka malu kukui o We hekaolu Kuu kaikaina mai ke kula wela i ka la o Kawelohale Kuu kaikaina mai ka piina ikiiki o Kahea Kuu kaikaina mai ke kula loa o Kuau Kuu kaikaina mai ka ihu o ka lio Kuu kaikaina mai ke one loa o Kahului Kuu kaikaina mai ke kai hanupa mai i ke one Kuu kaikaina mai ka malu hekuawa o Wailuku

Auwe kuu kaikaina kuu minamina pau ole - a. MRS. MIKAHALA. Kanikau he aloha keia Nou no la e Paele Keoni Ke uwe helu mai nei o Elena he kaikuaana Kuu kaikaina mai ka piina ikiiki o Waikina Kiina mai nei oe e ka Makua Mana Loa Auwe kuu kaikaina kuu aloha pau ole - a Kuu kaikaina mai ka hale imi naauao Aloha ia wahi a kaua e walea ai Kuu kaikaina mai ka ai pala mai iluna o ka laau Aloha ia ai a kaua e hele ai i ke anu Nou ka ka uhane i niau iho nei Auwe kuu kaikaina kuu aloha pau ole - a. MISS ELENA. Aloha kuu lani haku he kaikuahine Aloha ko maka i ka nalo ana E u no au a e kanikau loihi aku no Kuu kaikuahine aloha e na anu au Kai make aloha oe e Paele Keoni D N OPUNUI JR. Haiku, Aug 18, 1881