Ko Hawaii Pae Aina, Volume IV, Number 34, 20 ʻAukake 1881 — KA MEA ALOHA UA HALA. [ARTICLE]

KA MEA ALOHA UA HALA.

E Ko Hawaii Pae Aina; Alohe oe: - He puolo a ke aloha ka'u e hooili aku nei ia oe, a na kou ahonui a me kou kino lahilahi ia e lawe aku, i ike mai na kini makamaka mai ka hikina a ka la i Kumukahi a ka moku kaohi kukuna la i Lehua. Eia ua puolo nei: Ma ka Poakolu, la 1 o Iune, hora 5 o ke kakahiaka, ua make o Hosea Kahele ma Nawiliwili, Kauai, ma kona hale noho Sweet Home. Ua haalele iho oia ia'u i kana wahine a me ka mana mau keiki e u a e paiauma aku ma keia aoao nona. Ua hanauia oia ma Wailamoa ma Kipahulu, Maui, i ka la 5 o Maraki, M H 1832, na Kupee a me Keaweamahi, a ua make oia i keia M H 1881, o ka nui o kona mau makahiki o ke ola ana ma keia ao he 49 makahiki, 2 malama, he 26 la a me 17 hora. Ua mareia maua i ka M H 1850, i ka malama o Novemaba, na Balauina maua i mare, ma Hana, Maui. Ua noho maua me ka oluolu a me ka maikai iloko o na makahiki he 25. Ua loaa ia maua he 14 keiki, he 9 keiki e ola nei, a he 5 i make. Ua noho kumukula oia ma ka aina hanau he 9 makahiki, ua haalele i ka aina hanau, ua hele mai a noho ma Waikiki, Oahu, no hookahi makahiki, a ua hele mai a noho malihini ma Kauai nei. Ma ka lokomaikai o Rev J Waiamau, ua haawiia mai ka hana i maa mau iaia mai ka aina hanau mai, a ma ia hana oia i noho ai a hiki i ka loaa ana o ka palapala hookohu makai iaia no ka apana o Lihue nei. Ma ia hana oia i lawelawe ai me ka hoopono, e hooko ana i ka makemake o na haku me ka hoomanawanui. He malama ohana oia, he aloha a he makamaka maikai, he heahea, he hookipa i na kamaaina me na malihini, he hoaloha maikai no na mea a pau e kipa ana ma ko maua hale, he ike makamaka a he lokomaikai, he kanaka i minamina nui ia, a he kanaka makaukau ma na hana a pau e pono ai ka noho ohana ana, he mahiai, he lawaia, he imi i na mea e pono ai ka noho ana me ka maua mau keiki. He kanaka malama i ka pono, he haipule, he Luna Ekalesia no ka Ekalesia o Lihue nei. He Kumukula Sabati oia no ke Kula Sabati o Lihue, a oia no hoi ke Kahukula Sabati o ka Apana o Nawilwili malalo o W. H. Rice ke Kahukula Sabati nui o Lihue. No ka nui o ko'u aloha iaia a me ka minamina no kana mau hana maikai, no laila, ua haku iho au a me ka maua mau keiki i kanaenae aloha nona, oia hoi keia He kanikau he aloha keia nou e Hosea Kahele Kuu kane aloha ua hala aku nei Hala ke kane anuanu kuu poli e Maeele i ke kono a ke aloha Nei nakolo i ka pili o ka houpo Houhou ana i ka ili me he maka koholua la Ka walania i ka eha a ke aloha Loku ana i ka pua o ka lihilihi Ka puolo a ka waimaka e noho nei I ka hele o ke kane ka hoapili e I ka pili no kaua a hala no oe Ua hala kuu lehua ala kookoolau Lau ka manao hana e ia loko Auwe ka mea aloha he kane ua hala Aloha ka leo i ka hea ana mai E mama e! maanei mai kaua! O ko'u manawa hope paha keia I ka hora elima o ke ao Ilaila hele kauoha ole ka uhane o kuu kane O nei o nakolo ka pihe i ke kakahiaka Ka uwe helu ae no a na keiki Aloha ino no ka makua e Ka makua leo ole mai ia makou e Aloha wale aloha noe oe Kuu kane mai ka makani anu o ka aina he Kiu Mai ka ia a ka makani i lawe mai Oia ia hoolaukanaka i ka ihu o ka waa Kuu kane mai ka wai huihui o Punahoa Mai ke kai nehe i ka iliili o Mokulau Aloha ia wai a kaua e noho ai Kuu kane mai kanahele laau loloa o Ahulili Mai ka moena haunu ole o ke kuahiwi ke noho ia Aloha ia wahi a kaua e pili ai me na kaikuaana Kuu kane mai ka hale lewa i ke kai Au mai maua o na ale o Pailolo Aloha Lanai me Molokai Aloha ka Lae o Kalalau au i ke kai O ke ku kilkaila o Leahi i ka malie Ike ia ke taona noho i ka ulu wehiwehi Noho aku kau o ka olu o ka lau o ka Inia o Waikiki Kahi a ka makua i noho ai Me na kaikuaana o kaua Kaua ka manao pilikia ka noho ana Kuhi ka lihi i ou mau muli pokii Au mai kaua o ke kaia o ka Ieie Me na ale holu i ka moana Ana ole ka hana a ke aloha e noho nei Kuu kane mai keia aina malihini o Kauai Hooikaika ke kino pono ka noho ana Kuu kane mai ka ia a ka makau Mai ka ia kuhea mai i ka pali He pali aloha ia na ko onei kini Kuu kane mai ka makani anu he kehau E wehe mai ana i ka poli me he ipo la Me he ipo la no ko aloha na'u e hiipoi nei Auwe kuu mea aloha he kane Kuu kane mai na la hana o ke aupuni Aloha ia wahi au e noho ai E luana ai me ou hoaloha E imi aku ai pono no ka noho ana

Aloha ke kane ka hoa kuka Aloha na mea a pau au i imi ai Aloha ka malu hale e nobo i ka olu Aloha ka noho pu ana ae me na keiki Aloha ka hoa pupuu o ke anu Aole kau e pau ai kou aloha ia'u Kuu kane o na hana a ka Haku Aloha ia wahi e hele ia ai Hele aku la oe me na puali anela E hoonaniia kona inoa. MRS. KAHINU KAHELE. He kanikau he aloha keia Nou no e Hosea Kahele Kuu makuakane aloha ua hala I ke ala hoi ole mai Noho iho nei makou Me ka u me ka minamina Kuu makuakane mai ka ihu o ka waa Mai ka pono hooikaika a ke kino Mai ka makani anu he Kiu E pae mai ana ka leo ia'u e hoe Alo aku kaua o ka pohu Ka hoene a ke kai leo nui o Mapu Mapu mai ana kou aloha io'u nei A hiki mai kou aloha e uwe no au Kuu makua mai ka lae o Kukii Mai ka nalu nehe i ka iliili o Papaloa Mai ke one piha kanaka o Kalapaki Mai ke kai hanupanupa o Mokuoe Mai ka ia uhai a holo i ke one Mai ka ia peahi lima o Pakaalana Mai ke one hooluhi kino o Nawiliwili I pili ia e kaua ke anu me ke koekoe Koekoe ka po ua hala oe Auwe kuu minamina pau ole ia oe - e. HOSEA K. KAHELE. Kanikau aloha nou e Hosea Kahele Nou ka uhane i naue hele iho nei Noho iho nei makou me ka u me ka minamina. Me ke aloha pau ole ia oe e ka makua Aia aku noi paha oe me ka punohuula I Kahikiku i Kahikimoe I Nuumealani i Kealohilani I ka pea kapu o kukulu o Kahiki Nanea aku la oe me Lilinoe i ka uka Haalele mai nei oe ia'u i ko lei Kuu makuakane mai ka piha kanaka o Nawiliwili Mai ka la kahiko a maikai o ka oihana o ke aupuni Walea aku oe me ka nui o na hoaloha. Ilaila e luana ai kuu makuakane Auwe kuu mea aloha he makua Kuu makuakane o na hana pono a ke Akua A kakou e uhai a holo ai i ke kula o Lihue O oe hoi o ka makua, o makou hoi o a keiki Mea ole ia loa i kahi au e ka makua i makemake ai Kuu makuakane mai ka ua aweawe ae ma na pali Mai ka makani hoohuli wai la he Alaoli Mai ka makani kehau aala la he Paupua He pua lei au he mea nui nau e ka makua Eia ka e haalele mai ana oe ia makou E noho makua ole i keia ao Ua hemahema au ua nele i ka makua ole Ei aku nei oe me ka Makua Mana Loa E hosana pu hoi me na puali anela Auwe kuu mea aloha he makua MISS RAHARA KAHELE. Kanikau he aloha nou e papa Kahele Kuu makuakane aloha nui ua hala Ua haalele iho nei oe ia makou na keiki E noho makua ole aku mahope nei Kuu makuakane mai ka ia kahea i ka pali Mai ka ia uhai aholo i ke one Oia wahi aloha ia a kakou e hele ai O ka'u ia e imi nei aole he loaa Ua hala oe me ka mea mana loa Auwe kuu mea aloha he makua. JOSE KAHELE. Kanikau aloha keia nou e papa Kahele Kuu makuakane mai ke kula loa o Lihue O ia kula hulili anapu wela i ka la Ka la a ko aloha i hiki mai ai A hiki mai ko aloha e papa e uwe no au Aloha ka makua hoomanawanui ia makou na keiki E imi makou na keiki aole e loaa ka makua e like me oe Kuu makuakane mai ka hana pono a ke Akua Kahi hoi au i makemake nui ai Auwe kuu mea aloha he makua ua hala. KANAE KAHELE. Kanikau aloha keia nou e papa Kahele Kuu makuakane mai ke ao opua o Haupu Mai ka ua nihi ae makai o Kalanipuu Kuu makua mai ka wai o Kemamo O ia wai makaikai a ka malihini Ke hanini nei ka waimaka hoopulu i ka lihilihi Loku ana i ka pea ku o ke kanaka Kuu makua mai ka wai mio o Kawelowai Me ka wai lelehuna o Waiehu Kuu makua mai ka makani he Waikuaaala Me ke kikewe makani lu puaahau o Maluaka Kuu makua mai ka wai halau o Wailua Mai ke kalukalu o Kapaa Aloha ia wahi au e hele ai Kuu makua mai ka lulu o Waimahanalua Me ka nalu haimuku o Makaiwa Eiwa makou na keiki elua olua na makua Kuu makua mai ka uka aala o Kahihikolo He ala ka maile me ka hala o Halaulani He lani nui ko aloha ia makou e noho nei Kuu makua i na hala o Pooku Kuu makua o na hana pono a ka Haku Kahi hoi a kakou e paulele ai O makou hoi o na keiki o oe hoi o ka makua Auwe kuu mea aloha he makua MRS MILEKA K ASIONA. Kanikau aloha nou e papa Kahele Kuu makuakane aloha ua hala iho nei Hala iho nei ka makua hemahema makou na keiki Aloha ke one o Kulapaki kahi a kaua e luana ai E walea ai kaua a huli hoi i ka home o

Nohoikaolu Auwe kuu mea aloha he makua JOSUA KAHELE. Kanikau aloha keia nou e Hosea Kahele Kuu makuakane ua haalele mai ia makou Aia aku nei paha oe me Poliahu Me ka wahine noho anu o ka mauna Kuu makuakane mai ke kula o Ahukini E ike aku ai kaua ia Kamae Kuu makuakane mai ke one o Hanamaulu A ulu mai ko aloha e uwe no au Kuu makuakane mai ka lulu o Hauola O ia wahi a ka malihini e makaikai ai Kuu makuakane mai ka piina o Malae Aloha ia wahi a maua e pili ai me kuu papa I ka pili no me ka makua a hala no e Kuu makua mai ka luna o Makaukiu Kiu maeele ko aloha ke hiki mai Kuu makua mai ka makani olu he Inuwai O ia makani hoohuli wai o ka aina Hoomaha aku kaua o ka lai o Kauakahi A laila pane mai kuu makua ia'u Eia au ke hele nei i ka hana o ke aupuni Puni kuu makua lilo me Hiki i ka nahele Kuu makuakane kahiko a maikai Hele aku i ka pono a ke Akua Oia wahi a kakou i hilinai nui ai Auwe kuu mea aloha he makua MRS RAHELA KAHOOLEALII S R H KEALAHELEMAUNA Kakauolelo. Nawiliwili, Kauai, Augate 10, 1881.