Ko Hawaii Pae Aina, Volume IV, Number 34, 20 ʻAukake 1881 — IUBILE LAHAINALUNA. [ARTICLE]

IUBILE LAHAINALUNA.

E malamaia ana ka Iubile o ke Kulanui o Lahainaluna ma ke Kulanakauhale Alii o Honolulu, Oahu, ko Hawaii Pae Aina, ke hiki aku i ka la 5 Sepatemaba, MH 1881 nei, no ka mea, oia ka piha ana o ke 50 o na makahiki mai kona kukuluia ana i Kia Ao i ke Ao, a i Kia Ahi i ka po, i malamalama nou e Hawaii o Keawe a hiki i Kauai o Mano, a welo loa aku i Niihau, a alohi aku la kona nani i ko Maikonisia a me ko Nuuhiva. Holo aku la ka pouli o ka naaupo a me ka hewa, a halii iho la na eheu o ka maluhia maluna ou, "a Kapu ke Kula aohe lele Pueo," Auhea ke aupuni malalo o ka lani i meha ka noho ana a i kupolua i ka lai a ke Kaao e like me Hawaii, me na mea kaua ole a me kahi heluna uuku loa. Na ka naauao a me ka pono i ulana a malu, a nani oe e Hawaii. No laila, e na hoa Lahainaluna, mai ke komo akahi ana a hiki i keia wa, e ala, e hoomakaukau a e naue like mai me ka manao lokahi a e malama i kou Iubile, a e noonoo i na mea e pono ai kakou a me ko kakou lahui oiwi. E hele makaukau mai penei: 1 - E hele mai me Elima Dala pakahi no ka Ahaaina Iubile. 2 - E hele mai me Umi Dala pakahi he mea hooulu kumupaa. 3 - E hele mai me ka aahu keokeo o loko, mai luna a lalo, a he kuka paina puapuamoa paha o luuna. 4 - O ka poe i haawiia na hana o ia la, e hele makaukau mai. 5 - E hele e mai mamua o ka la 5 o Sepatemaba i pau na manao a me na kumuhana mamua o ka Iubile, no ka mea pau ka Ahaaina o ka hookuu no ia o ka Aha M Kuaea, Peresidena. B W Kawainui, Kakauolelo