Ko Hawaii Pae Aina, Volume IV, Number 32, 6 ʻAukake 1881 — HE ALOHA WALOHIA UA MOE, UA PUPUU HOOKAHI I KE ANU. [ARTICLE]

HE ALOHA WALOHIA UA MOE, UA PUPUU HOOKAHI I KE ANU.

He uwe kanikau keia no Moonohu O oe ka ia a kili welawela Hoapili o na manu kii kula Nou ka uhane i ke anuenue I aweawe ula i ka maka o ke ao I nonoula i ka maka o ka opua O oe ka uhane i ka ponohu ula i ke kai Aloha kuu lei onohi ula i ka lewa Auwe kuu aloha pau ole i kuu kaikaina O oe ka ka uhane i ka hawai luna E kilohi ana i ka nani o ka hawai lalo E hele ana i ka loa i ka laula o ka aina E makaikai ana i na kihi eha o ka honua Auwe kuu aloha pau ole i kuu kaikaina Aia ka uhane i ke kula o Kukaniloko E nana ana i ka wai o Kuaikua E anapuni ana i ka uka o Oahunui Ilaila kahiko ka uhane o kuu kaikaina I ka liko pua o ka lehua iluna o ka laau Huli hoi mai kaua o ka loa oia kula E nana iho ana i kahi wai o Waikakalaua Hiki mai kaua i ke kula o Waipio Kuu luhi ka maloeloe ilaila O oe ka uhane i ka luna o Lelepana Hele mai kaua oia kula ena i ka la Hoomaha aku kaua o ke kahawai o Ewa Aloha ino ia wahi au i noho ai Auwe kau aloha pau ole i kuu kaikaina Kuu kaikaina pi i koolua i ke anu Hoa haihai olelo o ke aumoe Kuu hoapili i ke kula o Kalipahee I piliia no e kana ka ua me ka makani Aloha ka malu laau o Pualehua I pili aloha e kaua ia wahi paoa aala Hala wehiwehi ka uhane i ka pua oliva Kahiko ana i ka lai o Waimalu Kuu kaikaina i ka malu hale o Kaukaiwa Hoomanawanui aku o ke kau o ka pilikia Noho aku kakou o na la hoomalu Lawe ka mai hebera ia oe la lilo Auwe kuu aloha pau ole i kuu kaikaina MRS. HII. He kanikau uwe keia no Moonohu Ke uwe haalipo mai nei o Manuela No kuu wahine makani ke aloha Kuu hoa kakele o ke ala Hoapili i ka ua me ka makani O nei kula loa e waiho mai nei Waiho mai oe ia'u me ka bebe a kaua Auwe aloha ino no knu wahine Aohe oe he wahine na'u He makaa oe no'u no kahi makua ole He makamaka hoi no'u i poli o Makana He makana kau i waiho mai ai E lohi nei i ka po me ko ao—e E ao mai oe ia'u e ke hoa—e Auwe kuu wahine e. Kau wahine mai ka ia eli aku i ka lepo Mai ka makani anu la he hoolua Elua kaua i ka hale mehameha kanaka ole Hoolaukanaka i ka leo o ka manu pikake Eia ka oe e wehe mai ana i ka pili a kaua O kaua pu no iloko o ka pilikia Ua pilikia au i ke anu e noho nei

Ua hele oe ka makamaka oia hale Ke kuleana la hoi i noho ia aku ai Auwe kuu wahine kuu aloha pau ole ia oe MANUELA. He kanikau aloha nou e Moonohu Ke uwe helu mai nei o Pilipi He aloha ino no kuu wahine Kuu hoahele hoa noho Hoa pupuu i ke anu me ke koekoe Hoa haihai olelo o ka po ke moe - a Auwe kuu wahine e aloha ino oe. Kuu wahine mai ka ia ai pu no me ka lepo Mai ke ahe lau makani Moae e pa nei Aloha wale ko leo i ka i mai e —eu hoi kaua I ike mai na makua me na pokii He ikiiki loko o'u he maule i ko aloha I ka hele hookahi o kuu wahine I ka hale puanuanu a ke aloha ole Auwe aloha ino. E aloha wale ae ana no au i ka pili a kaua Aohe i puu aohe i kee aohe i pa leo a hele wale no oe Kuu wahine mai ke kula wela la o ka Ehaeha Ua eha au i ka eha lima ole a ke aloha Aloha ko leo i ka i mai o pilikia ana paha wau Ua pilikia oe i ka nuhou a ke aupuni Oia hoi ke samola poki me ka hae lenalena Auwe aloha ino no kuu wahine E aloha wale ae ana no au i ka holu a ka lau inia I ke aka lawe malie i ka wai o Kulani He lani oe he milimili na kuu kino He pane poo hoi na kuu iini pau ole Auwe kuu wahine aloha ino oe a PILIPI. He uwe kanikau aloha keia no Moonohu He wahine no Ewa no ka i-a Hamau leo He kupa he kamaaina no Kalauao Ilaila no a nui a hele a kula Haalele i ka nui i ka lehulehu I ke kaikuaana ka makua me na pokii E paiauma paumako me ka waimaka Me he makamaka la ke aloha ke hiki mai Ua like me ka hua nioi ka wewela Kohu mapunapuna wai ka pipii Ua pii ka ena a ke aloha i ke kino Ua komo walania i ka iwihilo Ua mokumokuahua ua eha ka manao Ua kaumaha luuluu hana e ia loko Eia ka hana i ka houpo kahi i lohi ai E nape ana i ka nae a ke aloha I ka lilo o ka mea minamina he keiki He uwe kanikau keia no Moonohu He wahine no Ewa no ka i a Kuhilima E kuhi ana maua na maua la oe Eia ka oe he aka kino wailua Hooheno wale mai no kou aloha ianei E hoohihi wale mai ana no i ka poli o ka makua E kuhi ana paha oe o ka pono ia ilaila O ko wehe ana mai i ka pili me maua He inoa kanikau hooheno no Moonohu Makalaaua i ke kaha o Kualakai kuu lei nohu Ka pupua maikai i ke one o Kaolina Ulu wehiwehi ka Oo noho la o Kaupea I ka nounoua mai e ke ehukai a luhi moe Enaena i ka la ke pili o Kaiona I ona ka wiliwili ka mao lei o Peekaua E aloha auanei. J H LULUHIPOLANI. Kalauao, Ewa, lulai 18, 1881.