Ko Hawaii Pae Aina, Volume IV, Number 7, 12 Pepeluali 1881 — KA MAI PUUPUU LUKU MA HONOLULU. [ARTICLE]
KA MAI PUUPUU LUKU MA HONOLULU.
Ua hoea hou ae nei ka mai luku weli weli o ka 1853 mawaena o keia kulanakauhale, a ua emoole ke kolo ana o kona mau aa ana ma o a maanei o ka apana o Kona nei. Eia me makou ka papa inoa o na mai, mai ka la 4 mai o Dekemaba, 1880, a hiki i ka la inehinei, no lakou ka huina i hiki aku i ka 53. He 7 o keia heluna he poe haole, he 12 pake, a o ke koena aku he poe Hawaii wale no. He hookahi haole i make no ka mai, a he hookahi i kuawe, He hookahi wale no Hawaii i make, o Lilia Keawe hapahaole. Eia ka makou olelo paipai ikaika, ina e hookau iho ana kau wahi mai maluua o kekahi o oukou e ko Honolulu nei, e wikiwiki oukou e hoike koke i ka halewai, a na ke aupuni e lapaau me ka uku ole. Mai hoao kekahi e huna, o lilo auanei i mea e laha loa aku ai.