Ko Hawaii Pae Aina, Volume IV, Number 3, 15 Ianuali 1881 — He Ano Hou ma Paia, Hamakuapoko, Maui. [ARTICLE]

He Ano Hou ma Paia, Hamakuapoko, Maui.

Ma Paihiihi, Hamakuapoko, ua ulu ka Ahahui Opiopio malaila, oia no hoi kekahi poe ino loa ma na hana kolohe ona, aka i ka wa i komo ai makou e kukulu i ke Kula Sabati, a ma ke kauoha a ka Peresidena o ka Ahahui Kula Sabati Nui, ua hoala pu makou i Ahahui Opiopio. I keia wa o lakou kekahi poe oi loa ma ka makaala ana e malama i ka maluhia. Ma na la nui, oia ka apana oi o ka ona a me ka hakaka; aka, i ka la 1 nei, ua malu, a he anaina hoomanao kai malamaia malaila mahope o ka Hoike Kula Sabati Hui. Ua lilo na hoa o kela Aha i mau hoa kono aku i kela mea keia mea e komo pu a e hoopau i na hana kolohe.

Iwaena o na Ahahui la—hookahi kanaka mawaho o ua Ahahui la ua kipaku ia oia mai kahi hale aku me kona mau pono a pau, e kekahi poe e ae aole no loko o ka Ahahui. Hoopii aku nei ka mea i kipaku ino ia i ka Lunakanawai, o na hoike o ka mea hoopii oia no kekahi poe o ua ahahui nei. Ua hoike ua hoike, ua kipaku ia no me kona mau pono a pau, a pela no ka olelo a ka mea i hoopii ia. He elua mau kanaka aole no loko o ka ahahui, hele mai nei laua a hoike aole na ka mea i hoopii ia i kipaku i kela kanaka a me kona mau pono a pau, nana no i lawe. Hoopai ia iho la ua mau kanaka nei no ka hoike wahahee, a ua hoopaneeia a ke Kau Kiure ma Wailuku. Hele aku nei kahi mau hoa o ka ahahui a kamailio ia laua, ina olua i komo i ka Ahahui Opiopio ina la aole hewa ka olua olelo. I keia wa ua pau ka paakiki o ka naau o na mau kanaka la ua komo i ka ahahui, a ua oleloia mai o laua ke koena o ka ino i koe, ia laua i hui ai, ua maluhia loa.

Malaila no. O ka hana a kekahi kanaka o ka hoolilo i ka la Sabati i la mahiai uala a i la lawaia; hoohuli ka Ahahui Opiopio iaia, aole he lohe mai; wahi ana, ua oi kona pomaikai malaila. A i ka la Sabati iho nei, oiai oia e walea ana i ka haha oopu ma ka auwai a ka Ona Miliona, oiai ua walea oia ma ia hana i keia la; a iaia e uu mau mai ana i ka oopu mai loko mai o ka lua o ke pani wai o ke paipu wai, ekolu a eha paha ana hookomo ana me ka huki ana iwaho, ua paa koke ae la kona lima i ke koa laau o ua pani wai la a opa pu ia a hai pu ae la kona lima.

I keia la i hiki mai ai ke Alii ka Moi me ka Hooilina Moi, i hele a ohuohu ke kaa ahi me na ohua nona kahi heluna nui i 300 a oi aku i ukali pu ia e ka Bana hoonanea. Ua wehe ka Moi i ka haiolelo ma Paia imua o na makaainana o Makawao i hiki mai. Ua kokuaia ka haiolelo alii e E Helekunihi, a na C. K. Kapule i panai aku ma ka aoao o na makaainana o Makawao; a huli hoi aku la ka Moi no ka Malu Hekuawa, ma ke kaa ahi.

Ina e loaa ia'u he wa kupono, e hai aku no au i na mea e pili ana i ka hale wili o ka Ona Miliona e ku kilakila nei. He 5 hale ke kiekie, a o ka aleo maluna loa, oia kahi nana, aia ilaila ke oeoe e kani ai.

I keia Poaha ae, la 13, e haawi ana na manu noho iu o Maunaolu he Aha Mele Nui ma ka luakini o Pokela, Makawao, ma ka hora 7:30 o ke ahiahi; a o na pomaikai ke loaa mai, no na hemahema oia kula.

Ke haule koikoi nei na kulu paka ua ma Maui nei i keia mau la. Owau no me ka mahalo, I. D. IAEA. Paia, Maui, Ian. 6, 1881.