Ko Hawaii Pae Aina, Volume II, Number 31, 2 August 1879 — NA ANOAI O KA MALU ULU O LELE. [ARTICLE]

NA ANOAI O KA MALU ULU O LELE.

E KO HAWAII PAE AINA: ALOHA OE:E ae mai ia'u e waiho aku i keia mau wahi anoai o ka Malu Ulu o Lele nei. Na oihana mikiala - Ke hoomau nei kekahi mau Keiki Hawaii i ke puhi lanahu, a ke noke mai nei lakou i ka poke i na kumu manako a me ka wi, a na lakou e hoopiha nei i ko keia kulanakauhale a me Honolulu i ka lanahu. O ke kanu i na mea ai kekahi hana a lakou, aia malaila na pu, ipu-haole, uala, ipu-ala a me kekahi mau mea ai e ae. No ka i-a - Aole i anahulu aku ka na lowale ana aku o ka opelu, a paa ana ka lehelehe o ke Kawakawa a me ke Aku i ka makau, a ke hoopomaikai mau ia nei ko keia kulanakauhale, aole hoi e noke mau i kahi io bipi. Na Hui Kinipopo - Elua no keia mau Hui Kiniopo, na na haole kekahi a na na keiki Hawaii kahi. E haawi ana lakou he ahaaina nui ma keia mau la iho, a ua lohe au e kauoha aku ana lakou i ka Royal Band a me na ahahui kinipopo e holo mai ianei e hookuku ai, a o na lilo a pau na keia mau ahahui ka pe ana. No ka Pioneer Mill - Ke hana hu ia nei kaupaku, a ke hoomaemae hou ia nei na kapuahi a me na hao, a he mau mahina paha a hoomaka oia e wili hou. Kou oiaio, S K Kaihumua. Lahaina, Maui, Iulai 26, 1879