Ko Hawaii Pae Aina, Volume I, Number 35, 31 August 1878 — E PALEKA KAHUNAPULE. [ARTICLE]

E PALEKA KAHUNAPULE.

Nani no hoi ka wikiwiki o kou mau wawae. Ma ka hoea ana ae o ka nupepa "Kuokoa" o ka Poaono iho nei, Aug. 24, ua kuahaua mai la kekahi leo mai ka Luna Hoopuka mai, oia no o Paleka kahunapule o Kawaiahao, a e ulaino mai ana ia'u, a ua ike aku la ka lehulehu mai o a o. A no kuu manao, anoai o kauoia na makamaka e manaoio aku i kana, nolaila, ke ku nei au ma ke kahua kupono, a e pale aku i kana mau hana wahahee, i ku ole hoi i kona ano karitiano oiaio, Akahi–Ua haalele aku au i ka lawelawe ana i na hana o ke Keena Kuokoa, ma ke kumu kupono. He aha la ka mea pono ia'u e hana ai, iloko o na hoolalau a me na hoepa wale a ke kanaka hemolele, oiai au e iini ana e hooko aku i kana hana, mahope iho o kuu hoi ana mai mai ke kaahele ana ia Hawaii, malalo o ka hana nui makaenaena a ua kahunapule Paleka nei? E lilo anei au i mea kakali wale aku no kana mau hoohoka? E kakali aku anei au no na hebedoma a mau malama paha, a mahope aku o ia wa, e ae mai ai oia ia'u e lawelawe aku i kana hana? Aole loa pela, aka, ma kahi e kaheaia mai ai au no ka hana, e haliu koke aku no au ilaila, a e hana, pela e pono ai ke kanaka ma keia noho ana, ua ike no ua kahunapule Paleka la ia mea. Alua—Aole loa wau i ike he wahi koina kekahi o kela nupepa Kuokoa a me Paleka kahunapule maluna o'u. Ina he oiaio ka ua Paleka kahunapule nei, heaha hoi kona waiho ole mai i mau bila kikoo, a ina e hooleia aka, alaila, ua ike no oia i kahi e hele hou aku ai, i hooko ia ai kana mau koina, a oia ka oi loa aku o kona pono, a e mahalo mai ai ka lehulehu iaia. Aka, mamuli o kana i hoolaha ino ae nei, ua hala loa aku la oia mawaho o kona kahua e ku nei, a he laipila a hoino inoa maopopo keia a ke kahuakua, ka hana kohu ole i ke kahunapule ke hooko; a ma kona ano he makua alakai i na kanaka ma ua pono pili uhane, ua kohu anei oia e lilo i mea hoino me ka paio mai? Aole. Nolaila, ke wiwo ole nei au i ka olelo ae, aole loa oia i kupono iki e ku hou mai ma kela awai kiekie a eehia o Kawaiahao, a e ao mai i na kanaka mai ua mea pili i ka pono, o ao mai auanei oia ia hai, aole hoi e kaulawaha mua i kona alelo. O ke kanaka i ikeia he oihana laa kana e lawelawe mau ana no na makahiki loihi, a i manaoia hoi he maemae a me ka hala ole, he kupono anei iaia ke hoolaha akea pilikino no kekahi hoakanaka? He hoike anei ia no kona ano karistiano oiaio ma ia mea? Aole loa. Pehea la hoi ke kahunapule o ka awai kiekie? Ke manao nei au, ua hiki loa i ka lehulehu ke ike a hooia mai, na hoemi loa ia kona ano karistiano, ua hapa kona noonoo a me kona aloha no ka oihana laahia ana i koho mua ai i kinohi, a nolaila i hu ae ai na mea awahia mailoko ae ona. He nui tna mea e hiki ke kamailio aku iaia, aka, ua lawa au maanei, a ke waiho aku nei au na ka lehulehu e kaupaona i ka aoao a lakou e apono ai. Owau no. S H HAAHEO. I ka Poakolu iho nei i ku mai ai ka mokuahi Amerika ao kula kamalii "Jamestown" mai Kapalakiko mai.