Ka Hoku o ka Pakipika, Volume II, Number 7, 27 November 1862 — He Kanikau no Lota. [ARTICLE]

He Kanikau no Lota.

Kanikau la he aloha, nou hoʻi e Lota e, Ko kino ua hala aku, i ke ala ʻula a Lono , Aia paha ka ʻuhane, i luna i ke ao uli, Lipolipo a Kanaloa, uʻi aʻe nei ka makua, ʻAuhea kuʻu keiki, kuʻu lei kuʻu milimili, Ua hala ua nalowale, haʻalele mai i ka pili, 1 ka poli o ka makua, auwe kuʻu keiki, Kuʻu hoa pili o kaua, kipu mai i ka moana, Kahiko mai ka lehua, , ka lehua o Kelakona, Kuu pua lei he a!oha, he haliʻa i ke keiki, ʻO ka wa heu-heu ʻole, ʻaʻohe wa i koe, A hea mai ka makua, auhea kuʻu ma-ma, Me kuʻu pa-pa hoʻi, lilo e i ka haka lewa, Hale anuanu o ka make, aloha wale ku pua, I kupu ohaoha mai, i ka hau kakahiaka, Mohala i ke awakea, ʻemo ʻole kona mae, Na pua o ka waimaka, e haloʻiloʻi mau nei, Hala wale ka manawa, a ka lau o ke aloha, Anuanu mai nei loko, i ke aloha o ke keiki, Nahenahe kuʻu manawa, i moku hia e ke aloha, Uluku mai ka houpo, anoninoni ka manaʻo, I manaʻo no hoʻi au, i lei mau ʻoe noʻu, I ke kau a ka hoʻoilo, mai na po anuanu, A mahana i ke keiki, auwe kuʻu keiki, Kuʻu hoa pili o ka po, e loliʻi ai o ke ao, Ko leo kaʻu i lohe, e mapu nei i ke kai, E pae nei i ka uka, i ke alo o Kaihalulu. E hoʻoipo ana me Lia, ka wahine a Kamalanaʻi,

Ko ʻuhane kino wailua, kaʻu ia e ʻike nei, E maʻalo ana i ka laʻi, i ke aka wailiʻula, ʻO ia wale no kaʻu aloha, ʻo ke aloha au i upu ai, Me kuʻu kane hoipo, he makuakane au, ʻO kahi aloha la e, auwe no hoʻi e, Kuʻu keiki o ka ua, o ka ua kea o Hana, ʻO ke kai hoʻohaʻi maka, nalu haʻi o Puʻuhele, ʻO ia kai he aloha, au e haliʻa nei, Kau mai ana na maka, ka haliʻa a kuʻu keiki, A hiki mai ke aloha, hiki pu me ka waimaka, I laila au haʻalipo hoʻonewanewa ke aloha, Lomi ana i ka iwi hilo, i ka pane poʻo o ke aloha, Aloha no hoʻi ʻoe, e ka lei o kuʻu kino, Kuʻu kino e ʻau wale nei, e ake ana e ʻike, I ka maka o kuʻu aloha, kama aloha ua hala, I ke ala hoʻi ʻole mai, nou mau ke aloha, E Lota e Lota e, Mele Kaui.