Ka Hoku o ka Pakipika, Volume II, Number 3, 30 October 1862 — Ka poe kakau moolelo, a kaao paha. [ARTICLE]

Ka poe kakau moolelo, a kaao paha.

He wahi kauoha ko'u i ka poe kakau moolelo, e like me Lonoapono, a me Kawelo, Keaniniula, Hiiakaikapoliopele, Keamalu, Laieikawai, a pela aku na kaao i koe, i hoolaha ole ia ma ka Hoku Pakipika. He manaolana ko'u e kakauia me kona ike a pau loa, me ke koe oia o kekahi ike one, a e pai no na Lono o ka Hoku Pakipika a pau loa me ka hakina ole o kekahi. Ua ike au, ua hakina ka moolelo o Hiiakaikapoliopele, ua hakina kona mau mele e pili ana i na "huli," a pehea la anei e loaa ai ia koena i na hanauna hope o kakou, ke makemake lakou e nana, aole no e loaa, e hele ana kakou i ka nalowale, e hele ana o Kau ka makuahine o M. G. Kapihenui i ka nalowale. E makemake ana ka hanauna Hawaii o na la A.D. 1870, a me A.D. 1880, a me A.D. 1890, a me A.D. 1990. No ka mea, eia ia'u kekahi olelo paa, "o na nupepa a pau i paiia ma ka olelo Hawaii, a i laweia e a'u mai loko mai o na aoao a pau, e hiki no ia'u ke humu Buke, a e hooilina no, no na hooilina. Aole au e haalele i kela nupepa, keia nupepa olelo Hawaii, a hiki i ko'u la e make ai, koe nae ka pepa liilii ano haawi wale, a pau i kekahi poe, a nele iho la." A e hiki no ia'u ke hooili aku i keia mau nupepa i humuhumu buke ia na hooilina, a nana paha ia e kuai aku me ka poe makemake mai, o ka poe o na la a'u i hai ae mei maluna. A he makemake no na kanaka oia mau la e ike i ka Buke 1, o ka Hoku Pakipika, a pela aku. Ua hiki aku ka'u palapala ia M. G. Kapihenui, no ka pau a pau ole paha o Hiiakaikapoliopele, hoole mai kela, aole i pau. Oia kahi mea hoikeike aku. J. H. Kanepuu. Moanalua, Oct 25, 1862.