Ka Hoku o ka Pakipika, Volume I, Number 32, 1 Mei 1862 — Hoku o ka Pakipika. He Kanikau aloha no Kaneeleele a me Kahololio. [ARTICLE]

Hoku o ka Pakipika.

He Kanikau aloha no Kaneeleele a me Kahololio.

Ou kaikaina mai ka pali o Hookuli, Mai ka nalu hee o ka aina, Mai ka piha kanaka la e Kiilau, Mai ka piina la o Pualaea, O'u kaikaina mai ka pai ala i ka hala, Hala aku nei olua kaawale ka pili, O'u kaikaina mai ka ua lu lehua a ka manu, Mai ke kehau makani he malanai, Na mea aloha o'u kaikaina aole iho nei e. O'u kaikaina mai ke one o Punahaa, Mai ka wai la e Honolii, Mai ka pele kani hone la e Haili, O'u kaikaina mai ka ua kani lehua o Leleiwi, Mai ke kai leo nui o Paikaka, Mai ka hale lana la i ka moana. Mai ka ale olelo la i Alenuihaha, A waena moana ike ia Kauiki, Na mea aloha o'u kaikaina, aole iho nei e, O'u kaikaina mai ka ua ulalena o Lilikoi, Ke kahiko mai la iluna o ke kukui, O'u kaikaina mai ke ae a ka makani he alani Mai ka pohu malino i ka lai o Hauola, Ola makou i ke ahe a ka makani he Kauaula Kuu mau kaikaina mai ka malu ulu o Lele, Mai na ale hulilua o Pailolo i ka moana, Mai ka malu kukui o Lanikaula, Na mea aloha o'u kaikaina aole ihoo nei e, O'u kaikaina mai ka wai o Niheukawa, Ia wai kahiko mai i ka pua weuweu, Mai ke kula wela i ka la o Puuoma, Mai ke one loa o Kamiloloa, O'u kaikaina mai ka wai hauna ili o Mau, A makou i noho ai i ka uka o Kapuna, O'u kaikaina mai ka lai o ke Kaao, Na me aloha o'u kaikaina, aole iho nei e, O'u kaikaina mai ka lai a ke Kioea, Mai ke kaha aiole o Palaau, Mai ka Lehua popohe la i Kaana, O'u kaikaina mai na kalo o Waikane, Aloha ke kula o Kaiolohia me ke one o Moohelaia, O'u kaikaina mai ke kai o Lui, Iwi ano aloha keia ia olua e na pokii, Ka mea aloha o na kaikaina aole ihoo nei e, O'u kaikaina mai ka lae o Makapuu, Mai ke kula loa o Kaea, Mai ka luna la e Ihiihi, I ka makani hau alialia o ke kaha, O'u kaikaina mai ka lae o Laeahi, Mai ke kula loa la e Kahala, Mai ka ua paupili o Makahuna, I ka wai waluwalu ili o Kewalo, Ka mea aloha o na kaikaina aole iho nei e, O'u kaikaina mai ka lai o ke Kaona, Mai ka ua popo kapa o Nuuanu, Anu makou i ka ua a Kawaahila, Pulu elo wale i ka ua Kiowao, O'u kaikaina mai ka ulu laau makai o Mamala, O'u kaikaina mai ke awa lau o Puuloa, Mai ka lae makani o Kalaelooa, Mai ka pohu o Waianae, Mai ka makani kuehu kai o Kaena, Kuu mea aloha o na kaikaina aole iho nei, O'u kaikaina mai ke kai loa o Kaieiewahoo, Mai ka wai Halau o Wailua, Mai ke kalukalu o Kapa, Mai ke kula wela o Kealia, I ke ao poonui la o Anehola, O'u kaikaina mai ka makani ehukahi o Kahili, Mai ka uluhala o Pooku, O'u kaikaina mai na hala o Naue, Ka mea aloha o olua aole iho nei e. Na S. Wahie. Honolulu, Kikihale, Aper. 10, 1862.